Read Tangkhul Naga PHILIPPINAO 3 Bible Online

PHILIPPINAO 3 - Tangkhul Naga bible

PHILIPPINAO 3

¹Naomeikapta, ivānaobing. Prohowui mingli mathānlu, ina rida kapi kahai chi hāngluikida ngachang machatmana, chi nathumwui vāngla phākhavaina.

²Makaphā ot kasā; ahui rimshokphalungra da kasā fa kathabing chili ning ngasharlu.

³ Akachang ahui rimkashok samphang kahaibing chi ithumna, athum maningmana, kaja ithumna Vareli awui Manglawui pangshap eina khoruma kala Khrista Jishuli ngarumda ithumwui mirinli mathāna. Ayarwui otsak khangalangli ithumna mashitsangmana.

⁴ Inala chikathāli shitsangpai. Nathum kachikathana ayarwui otsak khangalangli shitsangpai da phaningakha, ina langmeikharda phaning khavai apong lei.

⁵Kachishata thang ili ahui rimshoka. I Benjaminwui shimkhurli kapharā Israelnao akhana, kākashunga Hebrewnaona, Jihudiwui ain khamayonli yangsa jiakha iva Phariseena,

⁶kala ainli lungsansāhaoda ina Vareshinaobingli rekhareksai. Ainwui kakaso khamayona hikathā mili mashungmipai jisi kaja iva khayon makhaleia ngasāra.

⁷Kha ina tongkazāna da phaningkasā chi ara Khristawui vang eina kashimānna da theikhuihaira.

⁸Chimāng maningmana; iwui Proho Khrista Jishuli theikakhuiwui aman kasak chiwui vang eina ot saikora aremana da shānkhui. Awui vang eina ina ot saikora horhaira; chibing chi khamakhaowa thothap kathana da ina khuiya, chithākha ina Khrista chi samphangpai

⁹kala ali ngarumchaohaipai. Ain khamayonwui vang I khalattawui khamashung khangarong chi I maleiluimana. Ara ina khalei chiya shitkasangli pheisinda Varewui eina kharā, Khristali shitkasang manga eina khami khamashung khangarong china.

¹⁰Ina ningkachāng chiya Khristali kathei, awui ringkhalui pangshap mazapkhayang, awui kachotkachāng phungkhangarum kala awui kathi thada kathi,

¹¹ilila kathiwui eina ringshok ngasakra kaji iwui kachihānna.

¹²Ina hi samphangchaohaira kala I kāshungchaohaira kaji maningmana; kha Khristana ili yuikakhuiwui sāman chi yuikhui khavai ina hotnāchingda lei.

¹³Mha, ivānaobing, ina sāman chi samphanghaira da phaningchao majimana, thalala ina phaningda khalei chiya iwui khanukshong khalei chi malaihailaga, mangāshong khalei chili vāshung khavai ina kashap chi hotnāda lei.

¹⁴Chiwui vang eina Khristawui mangā eina atungshong Varena ili kahowui sāman chi samphang khavai atāzanshong angatar eina ina kharomzatta lei.

¹⁵Ithum manglārinwui pongli kāshung kahai saikorana chithada phaningphalungra. Kha kachikathāna ngateida kaphaning leiakha chila Varena nathumli chitheimira;

¹⁶chithālala arui rāshungda ithumna shurrā kahai ainzā athishurda mangāshong muivāsa.

¹⁷ Ivānaobing, iwui kasākhavā tamkhuilu kala ithumwui kasākhavā tamkhui kahai athumli munlak eina yanglu.

¹⁸Ina nathumli hāngchinghaira kala aruila chāra̱ eina ngasoda kahāngna: Khristana krushtungli thikhamiwui kakhalat mashok khangasak mirin kharing mi kachungkha lei.

¹⁹Athum meifali vātangsera, kaja phasāwui ningkachāngli phākazat chi athumwui vare ngasāhaowa; khayakkhamarao otsakli athumna langsoi, athum okathui otmāngli phaninga,

²⁰kha ithuma kazingramwui ruichumnaona kala chiwui eina rāki kaje Huikhame Proho Jishu Khristali ithum honda lei.

²¹ Awui pangshap chi eina ot saikora awui azingli leingasakta ithumwui khikha masākhavai phasā hi awui tekhamatei phasā thada onngasakhaora.