Read Tangkhul Naga PHILIPPINAO 4 Bible Online

PHILIPPINAO 4 - Tangkhul Naga bible

PHILIPPINAO 4

¹Chieina ivānaobing, nathumli ina kayākha leishida honlikhala? Nathumna ili ringphā ngasaka kala nathumwui vang I mai kālaka. Mha, chithada Prohowui vang nganingtitki kajina.

²Euodia eina Syntyche, nani Prohowui mangāli chonnaoni kathāna da mayā ngaroklu da poli.

³ Ili ningtongda otsakruma nathumla sha̱nao khani hili khangachonmilu da poli. Khikhalajila ani khani hi pao hākashokli, Varewui kharinga lairikli aming yikahai Clement inili ngasoda panglāk eina ot sārumsai.

⁴Atam kachida Proholi ringkhangarumwui vang mathānchinglu. Ina hāngluishitli: mathānlu!

⁵Nathumwui ja̱mi kathei chi mi kachiva̱li chitheilu, Proho rāki kaji nganailakhaira.

⁶ Khiotkhawui vang malungmaringalu, kha ningkashi eina ngasoda nathumna khavavāt chiwui vang Vareli seihā sāda polu.

⁷Mikumona maphaningvākharar Varewui chingri kahai china nathumwui wuklungla, ningla Khrista Jishuli khangarumwui alungli haimira.

⁸Naomeikapta, ivānaobing, khamathā masot samphangkhangayi, khamashung, ningkahak, mashun, kathar, khamathā kala khayakakā hikathā hi nathumwui ningli shāptithailu.

⁹ Tui eina nilala, otsak eina nilala, nathumna iwui eina tamkhui kahai kala samphang kahai chiwui athishurda sālu; chieina chingri kahai Varena nathumli ngasomira.

¹⁰ Atam kasāngkhawui thili nathumna ili mamalaila phaningungkhamiwui vang Proholi ningshi. Nathumna ili malaihaowa kaji maningmana, kha atam makachāwui vang chithā kahaina.

¹¹I khavāt leikahaiwui vang hi kahāng maningmana, kaja iya iwui khalalei chi shapa kaji tamkhuihaira.

¹²Khi ngavāphalungra kala khi henda leiphalungra kaji ina thei. Apam kaji, atam kajida thailala, tholala, pemlala, vātlala, ot saikorali ningyāng ungkatheiwui ngathum kahai awor chi ina tamkhuihaira.

¹³ Ili pangkhangasaka Khristawui mangā eina ina ot saikora sāshapsera.

¹⁴Iwui kakhanangli nathumna phungkharum hi nathum ning kālaka.

¹⁵Philippinaobing, ina paokaphā hāshokkhare kachāng, Macedoniawui eina kathui tharan, nashi churchmāngna ili ngachonmi kaji nathumna thei. Nashimāngna iwui ringkaphā, ringkashi phungrumma.

¹⁶ Thessalonicali leilakha nathumna ili khangachon mirāchinga.

¹⁷Nathumna thada khami ot chi ningkachāng maningmana, kha nathumwui otsak khamathā chi mataisang ngasakngai.

¹⁸Nathumna khami chi peida samphangserhaira, shapshaphaira. Epaphroditusnala nathumna khangachon chi khuirāmida ara khikha mavātlakmana. Hi Varewui mangāli khuisangkapai nganamkaphā pha̱kaphayā kathāna.

¹⁹Kala Khrista Jishuwui mangā eina iwui Varena nathumwui darkar kasā saikora chi ngarumsangmiranu.

²⁰Ithumwui Avāva̱ Varivarali katang mavaila tekmateichingranu. Amen.

²¹Khrista Jishuli khalei kathara mi kachiva̱li shālam mili. Ili ngasokapama shitkasangbingnala nathumli shālam mili.

²²Hili khalei Varewui mibing, matailak eina wungreiwui konungli khaleibingnala nathumli shālam mili.

²³ Proho Jishu Khristawui lukhamashan china nathum saikorali ngasomiranu.