Read Tangkhul Naga COLOSSIANAO 1 Bible Online

COLOSSIANAO 1 - Tangkhul Naga bible

COLOSSIANAO 1

¹Khrista Jishuwui paokazata Paul kala ithumwui ichinā Timothy inina Varewui ningkachāng athishurda —

² Colossaeli khalei Khristawui lungli shitsangkapai shitkasangbingli shālam chiphunli. Ithumwui Avāva̱ Varena nathumli lukhamashan eina chingri kahai miranu.

³ Nathumwui vang ithumna seihā sākhami tharan ithumwui Proho Jishu Khristawui Avāva̱ Vareli atam kachiva̱li ningkashi mi.

⁴Kaja Jishu Khristali nathumwui shitkasang kala Vareshinao saikorali leikashi chi ithumna shāhaira.

⁵Nathumli khamashung chānpao—Pao Khamathā, rimeikapta rāhāngkachithei tharan china nathumli kachihān mira kaji chi nathumna shāhaira. Chieina shitkasang kala leikashina pheisin sāda khalei nathumwui kachihān chi kazingramli mathālak eina pharimihaida lei.

⁶Nathumna Varewui lukhamashan pao shāthanghon kala chi mashunga da theikhuithanghon eina thuida paokaphā hina sokhami khuirāmichingda lei kala okathui apam saikoralila ngayaovāda lei.

⁷ Nathumna Varewui lukhamashan pao hi ningtonglak eina Khristawui otram khangatha̱ ithumwui mathun Epapharaswui eina kashāna.

⁸Manglāna kasatmida nathum kayākha leishi ngarokhala kaji ana ithumli hāngchitheihaira.

⁹ Chiwui vang eina nathumwui pao shāthang eina thuilaga atam kachida manglāna khami thangkhamei kala theishingkakhuilungli Varewui awor china nathumli chipemmi khavai sāmichinga.

¹⁰Chieina Prohowui ningkachāng athishurda nathumna ringshapra kala atam kachida ali ningyāng ungngasakshapra. Nathumwui mirin china khamathā ot kachungkha sāshapra kala Vareli mataimeida theikhuira.

¹¹Nathumli Varewui tekhamatei pangshap china yāng kāngasakranu. Chithada, sāda nathumna ot saikorali ja̱khami eina khāngshapra.

¹²Varena awui miyurbingwui vang ngarānmi kahai wungram chili nathumwui sharukla zangngasakhaowa kajiwui vang khamathān eina ngasoda Avāva̱li masotchikatlu.

¹³ Ana tangkhamangwui eina ithumli kanshokmida awui khaluma Naomayarawui wungramli khuiungmihaira.

¹⁴Ara ithumli ningkhān ngasakhaira, kaja ithumwui morei pheomihaira.

¹⁵ Khrista hi mik eina matheikapai Varewui sakrinna. A hi pharākhare Naomayarana kala sākahai ot saikorawuitungli ā hakmeithuiya.

¹⁶Khikhalajila kazingramlila, okathuilila, mik eina theikapaila, matheikapaila, manglāwui pangshapla, akhavābingla, khamunga-bingla, pangshap kasingabingla Varena ot saikora hi awui mangā eina kasāna. Varena haori-haorang hupva hi awui mangā eina sai kala awui vangsera,

¹⁷ Ot saikora hi masāranglakha Khrista leisai kala ot saikora chi kachichāwui angayei makailakla leisai.

¹⁸ Ana awui phasā, kaja churchwui akuiana, haokaphoka, kathebingwui eina pharāshok kharena. Chieina ot saikorali ana mataimeikap kajina.

¹⁹Varewui khangachā saikora chi Naomayara khalattawuili peida leiser kaji hi Varewui kaphaningna,

²⁰kala awui manga eina okathuilila, kazingramlila khalei saikora krushwui ashee china chingri eina ali ngashimkhui khavai sai.

²¹Atam akhali nathumwui makaphā otsak kala ningphaninwui nathum Varewui eina tāda leisai kala awui yangkashe ngasāsai.

²²Kha ara awui Naomayarawui phasāthitwui mangā eina ana nathumli kathar eina, kasheng eina chuk-khara̱ maleila chikat khavai awui ngasotnao sangasakhaira.

²³Paul ina paokaphā chiwui otram khangatha̱ sāda kazingramwui azingli khalei manglākapai yur kachiva̱li tamchithei kahai nathumna shākahai paokaphāli kachihān chi mangacheila nganingtitta shitsangchinglu.

²⁴Ara ina nathumwui vang kachotkachāng samkaphang hi ringphai, kaja Khristana awui phasā, kaja churchwui vang kachotkachāng maphungkhangakan chi kāpei khavai ina iwui phasāli kachotkachāng phungda khalei hina ngachonmida lei.

²⁵ Varena ili churchwui otram khangatha̱ akha sāngasaka. Hi nathumli ngachon khavai ana ili sākhangasakna. Otsin hiya ana hāngmi kahai chānpao saikora chi hāngchithei khavaiwui vangna.

²⁶ Thot-thotli thumhaikasā kathuka tui chi ara awui kathara mibingli phongmihaira;

²⁷kathuka tui hi awui mibingli chithei khavai kala miyur saikorawui vang kayākha tekhamatei tuikhala da chitheikhangai hi Varewui khangarānna. Kathuka tui chiya Khrista nathumwuili zanghaoda Varewui tekhamatei chili nathumla zangrumhaira.

²⁸Chiwui vang eina ithumna mi kachiva̱li Khristawui pongli hākashokna, kashap eina tangda thangkhamei tui eina ithumna mi kachiva̱ hi Khristawui lungli kākashunga mi akha sāda Varewui mangāli zangkhavai athumli machina kala tamchithei.

²⁹Hi ungshung khavai Khristana ili khami yāng pangshap shichinlaga ina ngararda ot sai.