Read Tangkhul Naga COLOSSIANAO 2 Bible Online

COLOSSIANAO 2 - Tangkhul Naga bible

COLOSSIANAO 2

¹Nathumwui vangla, Laodiceali khaleibingwui vangla kala ili masamphanglakrang kajebingwui vangla ina kayākha chotta ot sākhala kaji hangga,

²pingmeida kala leikashina kompeimida theishingkakhuiwui eina kharā ngashitmi kahai chi samphang khavai ina hi kasāna; chithākha athumna Varivarawui ngathum kahai Khrista chi theira.

³ Khrista hi Varewui thangkhamei kala aworwui thumkahai lan saikora shokhavai shona.

⁴Ina nathumli kahāngna kaja makhamashunga ngaphat-ngayāt kasā chi kayākha khamashung thada theisālala china nathumli mangui ngasakhaialu.

⁵Kaja nathumli ina mangasopamsālala nathumwui vang phaningmichinga, kala nathumna Khristali shitkasang chi ngaziplak eina khalei chi theilaga ringphai.

⁶Nathumna Khrista Jishu hi Prohona da khuisang kahaiwui vang ali ringrumlu.

⁷Nathumwui angayung awuili sa̱khuititlu, nathumwui mirin awuitungli sākālu kala nathumli tamchithei kahai thada nathumwui shitkasang pangsang ngasaklu. Kala ningkashina pemtinghailu.

⁸Ngasharlu kaja Khristawui eina kharā maningla awo-ayiwui eina maron-maron tamchitheikharā, apuk-apaga khamunga makaphā manglāwui eina kharā kala mikumowui thangkhamei mareimarāwui eina kashok china nathumli rao masā ngasakalu.

⁹Kaja Khristana mikumo sāda okthuilakha Varewui tharkhamatheng saikora chi ali leisera.

¹⁰ Chieina ali ngashikta okthuikharumlungli nathumli kākashunga mirin chi mihaira. Ava manglāwui khamunga kala sāshap pangshapa saikorawuitungli khamunga akhavāna.

¹¹Khristali khangarumwui alungli nathumli ahui rimshokhaira, mikumona kasā rimkashok maningla, kha khalattawui morei pangshapwui ningkhānkhami Khristana kasa rimkashokna.

¹²Kaja nathumli ra̱hikkhami tharan nathum Khristali ngasoda chifarum kahaina, kala ali kathiwui eina ringkhangasaka sāshapa Vareli shitkasang mangā eina ra̱kahikwui otsak hieina nathumla Khristali ngasoda ringshokrumhaira.

¹³Moreiwui vang kala ain makhangavā miyur ngasāsāhaoda nathum atam akhali manglāwui pongli thida leisai. Kha ara nathumli Varena Khristawui mangā eina ringngasakhaira kala ithumwui morei saikorala pheomihaira.

¹⁴Leiman kazangwui eina ara kokmichaohaira.

¹⁵ Ana yuihaida makaphāwui khangamkharei kala sāshap pangshap saikora khikha maningmana da yarui mangāli kashankachon kharai thada phonglāk eina sāchithei.

¹⁶ Chiwui vang eina nathumna khishak-khizāra kajinilala, kathara zimiksho khamayonli nilala, changwokwui pongli nilala kala sabbathwui pongli nilala mi khipānakha bichar masaaranu.

¹⁷ Hikathā ot saikora hiya naodawui amahā kathāna. Kha akachanga chiya Khristana.

¹⁸Theivākashap pangshap leihaowa da kateili phāmeiya da kaphaningbing, phākharekbing kazingraoli khokharumwui vang juimeiada kaphaningbingna nathumli mangui ngasakhailu. Chikathā mibing chiya maram makhaleilila okathui lāngsot ningngai eina matuikhangai matui,

¹⁹ kala churchwui akui Khristali athum mazangluimana. Khristawui mangā eina phasāwui akai katongali kashakazā mizai kala phasāwui akai katongali akha sāngasakta Varena haksang ngasakkhangai athishurda haksanga.

²⁰ Nathum Khristali thihaira kala apuk-apagali khamunga manglābingwui pangshap eina ningkhānhaira. Chithākha khiwui vang nathumna masākhangayi ot sāda khaleikhala? Kala khisāda hikathā ainbing,

²¹“Hi masāza̱alu”, “Hi mamazapalu”, “Hi masingalu.” kaji hi mayāhaokhala?

²² Hikathā hiya shichin kahaiwui thili shimānhaoki kaji mikumona semkakhuiya ayin kala tamkachitheimaya.

²³Kachangkhat eina hāngsa jiakha hikathā ayinbing hiya kazingraobingli khorum khavai tandi kasā phākharekbing kala phasāli rekharekta kachotkachāng khamebingli shikachinna. Kha ayinbing hi phasāwui khamathang lungli shimān ngasak khavai pangshap maleimana.