Read Tangkhul Naga COLOSSIANAO 3 Bible Online

COLOSSIANAO 3 - Tangkhul Naga bible

COLOSSIANAO 3

¹ Khristali ngasoda nathumli ring ngasakhaira, chiwui vang eina Varewui yāshong Khristana awui wungpamkhongli pamda khalei kazingramwui otbing chili nathum ningshailu.

²Nathumwui ning chi okathuiwui otbingli maningshaialu kha kazingramwui otbingli ningshailu.

³Kaja nathum thihaira kala nathumwui mirin chi Khristali ngasoda Varewui lungli thumkahaina.

⁴Nathumwui kachangkhat mirin chiya Khristana kala ana latkharā tharan nathumla ali ngasoda awui tekhamateili zangrumra.

⁵Chiwui vang eina nathumna okathui phasāwui ningkachāng kaja, sopkhamasap, makathar, khamathang-khamarang, makaphāli ningkachāng kala kākharām (kaja kākharām hi meoma̱li khokharum kathāna) hikathāthā hi chithitphalungra.

⁶Hikathā otsakbingwui vang Varewui malungkhavāt chi awui kahāng makhanganābingli tāra.

⁷Atam akhali nathumwui mirin chikathā ningkachāngna mungda leilakha nathum chikathā mirin ringsai.

⁸Kha ara nathumna malungkhavāt, khamathang, yangkakharingwui kaphaning saikora horhaiphalungra. Nathumwui khamor eina kazei tui kala shuikhangarui misuichān mamatuiphalungmara.

⁹Nathum akha eina akha makapik ngarokalu, kaja nathumna sākasā kachama otsak saikora chi horserhaida kadhara mi ngasāhaira.

¹⁰ Hiya kasā Akhavā Varena a khipākhala da theishingkhui khavai awui sakrinlungli atam kachida nathumli dharngasakchingda lei.

¹¹Hithada sāda Gentilebing eina Jihudibing, ahui rimkashok eina marimkashokbing, makākashunga Scythianaobing kala raonao eina ningkhān kahaibing khangatei maleiluimana, kha saikorali khalei Khrista hi tongtingana, Khrista saikorali lei.

¹² Nathum Varewui mina, ana nathumli leishiya kala awui mi sākhavai kapangkhui. Chiwui vang eina nathum khalatta lumashankathei, ningaikashi, khangahui, malungkhanim kala ja̱khami hi kachon khangavai thada ngavailu.

¹³Nathum akha eina akha ya jimi ngaroklu. Khristana pheokhami thada nathum akha eina akha pheomi ngarokphalungra.

¹⁴Kala hāngda khalei magunbing hili, kāshunglak eina khokkha sākhavai ot saikora khalaprumkhame leikashi chi ngarumsanglu.

¹⁵Khristana khami chingri kahai china nathumwui wuklungli mungranu, kaja chili nathumli asā akha sākhavai Varena hokakhuina, chiwui vang ningshilu.

¹⁶ Khristawui tui hi nathumwui wuklungli pemtinghai ngasaklu. Nathum akha eina akha theithangmeilak eina tamchithei ngaroklu kala machin ngaroklu. Laa einala, masotlaa einala kala kathara laa einala Vareli nathumwui wuklungli ningkashi eina ngasoda sochikatlu.

¹⁷Kala nathumna ot kasāli nilala, tui khamatuili nilala Avā Vareli ningkashi mida otsak kachiva̱li Proho Jishuwui ming eina sālu.

¹⁸ Preiva̱ ngarā, gahara ngarāli hamsanglu, kaja chi Vareshibingwui sākhangayi achamna.

¹⁹Gahara ngarā, preiva̱ ngarāli leishilu kala masāshialu.

²⁰Naongarābing, atam kachida nava̱ navāwui kahāng nganālu, kaja china Vareli ningyāng ungngasaka.

²¹Ava̱ avā ngarā, naongarāli malungmavāt ngasakalu, ning suitāhaipaishina.

²²Raobing, nathumwui akhavāli athumwui miktāli ningyāng ungkhavaimāngwui vang maningla ot saikorali athumwui kahāng nganālu. Ot kasā saikorali Proholi khayākashiwui vang ningtonglak eina sālu.

²³ Mibingli otram khangatha̱ maningla Proholi otram khangatha̱na da phaninglaga kasāsā chi ningtonglak eina sālu.

²⁴Prohona awui mibingwui vang ngarān kahai sāman chi nathumli mira kaji hi phaningungchinglu. Kaja nathumna otram ngatha̱da khalei Khrista chi Akhavā chilaka.

²⁵Makaphā kasā mi chili awui otsak athishurda kashong rāngra, kachiwui vangkhala kaja Varena mi kachiva̱li mimai mayangla bichar sai.