Read Tangkhul Naga COLOSSIANAO 4 Bible Online

COLOSSIANAO 4 - Tangkhul Naga bible

COLOSSIANAO 4

¹ Akhavābing, kazingramli nathumwui Akhavā leili kaji phaningda nathumwui raobingli mayangkheilakla mashun eina sālu.

² Mathāhailakla seihā sāchinglu, kala Vareli ningkashi mida nathumna seihā sālu kala ningngasharlu.

³Nathumna seihā kasā tharan Khristawui kathuka ngathum kahai chānpao hāshok khavai Varena atam kachā khuirāmi khavai pomilu, kaja hiwui vang I phātop zangda khaleina.

⁴Seihā sālu, chithākha ina matuiphalungki kaji chi tharzā eina matuishapra.

⁵ Mashitkasangbingliva atam yangda thangmeilak eina sālu,

⁶Nathumwui chānhān mathā ngasaklu kala ringphā ngasaklu, kala ngarakzak eina ngahānthei khavai sālu.

⁷ Tychicusna nathumli iwui kasākhavā saikora hāngmira: A hi Prohowui vang otsakharuma shitsangkapai ngahānkhangaia ichinā akhana.

⁸Ithumna kathada leilikhala da nathumna theipai khavai kala nathumli kasatsangda ringphā ngasak khavai hiwui vangmāng eina ina ali chihokharāna.

⁹Kala ali ngasoda nathumwui ngasotnao shitsangkapai kala ngahānkhangai leikashia ivānao Onesimuslila chihorāli. Hili kashokshok saikora anina nathumli hāngmira.

¹⁰ Ili ngasoda phātop kazanga Aristarchusna kala Barnabaswui achinā Markna shālam mili. (Markwui maramli nathumli hānghaira. A rāsākha mathada samphangmilu.)

¹¹Justusla kaho Joshuanala shālam chiphunli. athum hi ili ngasoda Vare wungramwui vang ot sakharuma Jihudiwui eina Vareshi sākahaibingna. Athumna ili tarākha ngachonmida lei.

¹² Nathumwui ngasota kala Jishu Khristawui rao Epaphrasna shālam chiphunli. Ana nathumwui vang Varewui kaphaning chili kahāng nganāda kākashung kala theishingkakhuia Vareshi thada nathumna nganingshap khavai atam kachida ningsanglak eina seihā sāmichinga.

¹³Ana nathumwui vang kala Laodicea eina Hierapoliswui mibingwui vang panglāk eina ot sai da ina shākhi mishapa.

¹⁴ Ithumwui leikashe khanong Luke kala Demasna aniwui shālam chiphunli.

¹⁵Ithumwui shālam hi Laodiceali khalei ivānaobing kala Nimphas kahova̱ eina awui shimli kazipkhangaruma Vareshibingli hāngmilu.

¹⁶Nathumna chithi hi pākhuihailaga Laodiceawui Vareshibinglila pāngasaklaklu kala Laodiceawui ivānaobingna chiphunrāki kaji chithi chi nathum pāphalungra.

¹⁷Kala Archippusli, “Prohowui otram ngatha̱ khavai nali mikahai ot chi sākuphalungra” da hānglu.

¹⁸ Paulwui shālam tui, kaji hi ipāng eina kagapina. I phātopli zangda lei da mamalaimilu. Varewui lukhamashan nathumli ngasomiranu.