Read Tangkhul Naga 1 THESSALONICANAO 2 Bible Online

1 THESSALONICANAO 2 - Tangkhul Naga bible

1 THESSALONICANAO 2

¹Ivānaobing, ithumna nathumwuili kharā chi arema maningmana da nathumna thei.

² Nathumli marāranglakha, Philippili rekharekta ithumli maishi khangasak chi nathumna thei, kala chili ngasung khavai tarākha leisālala paokaphā chi nathumli hāshok khavai ithumli malungkaping sangmi.

³Kaja ithumli tamkachithei hi makhamashung, makathar kala minamda sākakhaibing maningmana.

⁴Kha Varena mayāmida ithumli horsangkhami paokaphā, ana hāngngasakkhangai chi khamatuina. Hi mikumoli maningla kha ithumwui wuklung katheia Vareli ningyāng ungngasak khavaina.

⁵ Ithumna sotkhamasao tui mamatuimana kaji nathumna thei kala karāmda masāmana kajila Varena shākhina.

⁶ Khristawui paokazatbingna da hāngngayilala, nathumwui eina nilala, khangateibingwui eina nilala, ithumna mibingwui masot maphāmana.

⁷ Kha ava̱va̱na anaongarāli sophayolak eina khanganao thada nathumwui ngachaili ithumna malungnimlak eina sai.

⁸ Nathumli hiyākha leikashiwui vang Varewui paokaphāmāng mikhangai maningla, ithum khalatta eina tangda chigatngai, kaja nathumli leishilāka.

⁹Ivānaobing, ithumna ngalangzarda ot panglāk eina kasā chi nathumna phaningungra; Varewui paokaphā chi nathumli tamchitheilakha, nathum khipākha makhanang khavai, ithumna ngashun ngayā mateila ot sai.

¹⁰Shitkasanga nathumli ithumna kasā acham aram chi kathara, khamashunga kala khayon makhaleiana kaji nathum kala Varena shākhina.

¹¹ Ava̱va̱na anaongarāli kasā thada ithumna nathum ava̱va̱li chithada sai kaji nathumna thei.

¹² Nathumli awui khamung kala tekhamatei chili zangrum khavai kaho Varewui ningyāngkhaung mirin chikathā ringkhavai ithumna kasatta ninglum ngasaka kala hāngchithei.

¹³ Khiwui vang eina ithumna atam kachida Vareli ningkashi khamikhala kajiwui apong khangateila lei. Ithumna nathumli Varewui paokaphā khuikharā tharan nathumna nganai kala miwui chānpao maningla Varewui chānpaolaka da kakhuila khuisanga. Kaja shitkasanga nathumwui alungli Varena ot sāda lei.

¹⁴ Ivānaobing, Judea ngaleili khalei Varewui churchbing, Khrista Jishuli kazanga mibingli kashok tākam eina nathumlila shoka. Jihudibingwui pāngli athumna kachotkachāng samkaphang chithada nathumla nathumwui miyurwui pāngli kachotkachāng samphanga.

¹⁵ Jihudibingna Proho Jishulila, marānbinglila shaothata, ithumlila rekhareka kala Vareli malungvāt ngasaka kala mi saikorali mamayāmana.

¹⁶ Huikhami khuirāki kaji paokaphā chi Gentilebingli mahāshok khavai ithumli athumna hapa.

¹⁷ Kha ivānaobing, atam kasha̱nakha ithum phasāwui pak-khangarok leihaisālala, ningliva nathumli theingaishun eina leili.

¹⁸Nathumli rāngailaka, Paul ina rākida hotna khani-kathum shihaira, kha Satanna hapkhanohaowa.

¹⁹ Kaja ithumwui Proho Jishu kharā atamli awui mangāli ithumwui kachihān, ringkaphā khayuiwui lāngso khavai chi nathum maningla khangatei khipā leikhala?

²⁰Nathum hi ithumwui mathān khavai kala mai kākhavailaka.