Read Tangkhul Naga 1 THESSALONICANAO 4 Bible Online

1 THESSALONICANAO 4 - Tangkhul Naga bible

1 THESSALONICANAO 4

¹Ivānaobing, naomeikapta Vareli ningyāng ungngasak khavai nathum kathada okthuirakhala kaji ithumwui eina tamkhuihaira. Hi nathumna ringda khalei mirin chipapama. Ara Proho Jishuwui mingli nathumna chili mataimeida ringkhavai kapona.

²Proho Jishuwui ming eina ithumna nathumli tamchithei kahai chi nathumna thei.

³ Nathumna tharda leikhavai khamathang-khamarangwui eina ningkhānchao kahai hi Varewui ningkachāngna.

⁴ Nathumwui alungli mi kachiva̱na apreiva̱li kathar eina kala khayākākapai apong eina kathada okthuirumrakhala kaji theiphalungra.

⁵Vareli makatheibing thada phasāwui khamathang-khamarang eina maokthuipaimara.

⁶Khipākha hiwui pongli achināli khalāng masāpaimara, kala hikathā khalanga mili Prohona kashong lāngra da nathumli rida hānghaira.

⁷Varena ithumli khamathang-khamarangwui lungli okthui khavai hokakhui maningla kha katharwui alungli okthui khavai hokakhuina.

⁸Chiwui vang eina tui hili mahengkasangapā china mikumoli maningla kha nathumli Manglā Kathara sangkhame Vare chili mahengkasangna.

⁹Shitkasang khangaruma avānaobingli leishilu kajiwui pongli nathumli kapiluishit kaji darkar masāmana. Nathum khalatta akha eina akha kathada leishi ngarokrakhala kaji chi Varena nathumli tamchitheihaira.

¹⁰Kala nathumna Macedoniawui ngalei katongali khalei avānaobing saikorali chithada leishi. Chieina ivānaobing, nathumna chili mataimeida sākhavai kapona.

¹¹ Ithumna rida hāngkahai thada chingri kahai mirin ringkhavai, na khalattawui otli ningkasang kala nathumwui pāng eina ot kasā chi nathumwui mirinwui kharin ngasā ngasaklu.

¹²Chithākha nathumli mashitkasangbingna khayāshira kala nathum khipālikha mapozāmara.

¹³ Ivānaobing, nathumli thikahai athumwui pongli khamashung tui chi theingasakngai, chieina nathumna kachihān makhaleibing thada wukmakhanangmara.

¹⁴ Jishu thihaira kala ringluishithaira kaji ithumna shitsanga. Chiwui vang eina ali shitsangda thikahaibingli Varena Jishuli ngasoda hokuiluira kaji ithumwui shitkasangna.

¹⁵Ithumna tamkachithei hila Prohona tamchithei kahai chipapama. Prohona rāthang ringkasābingna kathebingli marimara.

¹⁶ Chithang ningkhamiwui kakaso khavao, kazingrao akhavāwui akhon, kala Varewui talla̱khon eina ngasoda Proho a khalatta kazingramwui eina rāra. Khristali shitsangda thikahaibingna rida ringshokra.

¹⁷Chiwui thili ringda khaleibing ithumla athumli ngasoda muiyālungli Proholi ngarok khavai kazingli khuikārumra.

¹⁸Chiwui vang eina nathum akha eina akha tui hi eina kasatsang ngarokchinglu.