Read Tangkhul Naga 1 THESSALONICANAO 5 Bible Online

1 THESSALONICANAO 5 - Tangkhul Naga bible

1 THESSALONICANAO 5

¹ Ivānaobing, hiwui pongli atam eina otshot chi katharān shokrakhala kaji ina nathumli kakapi darkar masāmana.

² Kaja khalena ngayāshong kharā thada Prohona rāra kaji hi nathumna theikazak kahaina.

³ Mibingna, “Ara chingrihaira kala kalākashi maleimana” da kahāng tharan naokhara̱ thada kashuirak eina athumwuitungli kashimān rāra, chili yāmshok khavai maleisāmara.

⁴ Kha ivānaobing, nathum tangkhamangli maleimana, chiwui vang eina Prohowui latkharā Zimiksho chi khale thada kashuirak eina rālala matakhak kahai masālu.

⁵ Nathum saikora kahorwui kala ngahunwui naongarāsera. Ithum tangkhamang eina ngayāwui naongarā maningmana.

⁶ Chiwui vang eina kathebing thada ithum mapihaiasa, kha mikringmeida mathingmeisa.

⁷ Mibingna ngayāshong piya kala khamaripbing china ngayāshong maripa.

⁸ Kha ithum kahorwui naongarā sāhaokada mathingphalungra. Ithumna shitkasang eina leikashi hi thikhom thada khomra kala huikhamiwui kachihān hi raikuihon thada ngahonphalungra.

⁹ Varena ithumli awui malungkhavāt samphang khavai kapangkakhui maningmana, kha Proho Jishu Khristawui mangā eina kahui samphang khavai kapang kakhuina.

¹⁰Ana thimi kahaiwui vang ithum thihaisālala, ringsālala, ana kharā chitharan ali ngasoda okthuirumra.

¹¹Chiwui vang eina aruihon nathumna sāda khalei chithada nathum akha eina akha kasatsang ngarokta ngachon ngaroklu.

¹² Ivānaobing, nathumwui ngachailila ot kasaa kala Prohona kapangkhuida nathumli thānkhame, machinkhame athumli khayāshilu.

¹³ Athumna sākhami chiwui vang athumli khayākashi kala leikashi eina saklak eina sāmilu da poli. Nathum khangama̱ khangazai maleila okthuirumlu.

¹⁴ Ivānaobing, ngachāng makakaali machinmi khavai, ngacheekazarbingli katommi khavai, khangazanbingli ngachonmi khavai, mi saikorali ja̱mi ngarok khavai nathumli poli.

¹⁵ Mi khipānakha khayonwui vang khayon masāroralu, kha atam kachida akhana akhawui vang kala mi kachiva̱wui vang kaphā sākhami hi nathumwui kharin ngasālu.

¹⁶ Atam kachida ringphāchinglu,

¹⁷ Mathāhaila seihā sāchinglu.

¹⁸ Kashoshok ot saikorawui vang ningshilu; Khrista Jishuli khangarumwui vang nathumli hi Varena sāngasakngailaka.

¹⁹ Manglā Katharawui mei mamit ngasakhailu,

²⁰ kasatkhami chānpao chili maningkachaialu,

²¹ ot saikora chāng tamyanglu, kaphā chi singtitlu,

²²makaphā katonga chi chihochaohaolu.

²³ Ithumwui Proho Jishu Khrista rāthanghon nathumli khipānakha kaphen malei khavai chingri kahai khame Varena nathumli apong aning anangva̱li tharchaomiranu kala nathumwui manglāla, ningla kala phasāla mayonmiranu.

²⁴Nathumli hokakhuia ava ningkatongana; ana chi sāmilakra.

²⁵Ivānaobing, ithumwui vangla seihā sāmilu.

²⁶ Shimkhurwui mili leishilak eina samphangkakhui thada shitkasanga mi saikorali shālam sākhuilu.

²⁷ Chithi hi ivānaobing saikorawui mangāli pāchithei khavai ina Prohowui ming singda kakasona.

²⁸ Ithumwui Proho Jishu Khristawui lukhamashan chi nathumli ngasomiranu.