Read Tangkhul Naga JOSHUA 1 Bible Online

JOSHUA 1 - Tangkhul Naga bible

JOSHUA 1

¹PROHOwui rao Moses thikahaiwui thili, Moseswui otram ngatha̱me Nunwui naomayara Joshuali PROHOna hānga,

²“Iwui rao Moses thihaira; chiwui vang eina ara ina Israelwui mibingli miki kaji ngalei chili zangkhavai na eina mibing saikora ngakarthuida Jordan kānulu.

³ ina Mosesli ngashit kahai thāda napheina chonkasang apam kachiva̱ ina nali mikahaina.

⁴Lamhāng kala Lebanon hi eina thuida kongrei, Euphrates kong, zingtunshong Great Sea shangshungda khalei Hitnaobingwui ngalei saikora, nawui ngalei ngasāra.

⁵ Nawui mirin peida nawui mangāli khipānakha mangasungrarmara; ina Mosesli ngasokhami thāda nalila ngasomira; chieina ina nali machihomara kala mahorhaimara.

⁶ Pingmeida malung zangmeilu; kaja mibing hili mirada avāva̱ ngarāli ina ngashit kahai ngalei chi akhui khavai nana mibingli thānzangra.

⁷Pingmeida malung zangda sāmalu, iwui rao Mosesna mikahai ain saikorawui athishurda ning ngasharlak eina mayontitlu; chiwui eina uivāk lah yāvāk mangareithuihaialu, chieina nana kazatpam kachida maikhayā samphangra.

⁸Ainwui Lairik hi mahorhailakalu, kha ngashun ngayā machukpamlu, chithakha kapi kahai kachiva̱wui athishurda ning ngasharda sāshapra; chithāda nawui shongfa mataisangda nana maikhayā samphangra.

⁹Pingmeida malung zangmeilu, da ina nali makasomala? Mangacheealu, kakhanangla makhanangalu, kaja nawui PROHO Varena nawui kazatzatpamli ngasomira.”

¹⁰Chieina Joshuana mibingwui otva̱bingli kasoi,

¹¹“Rāmrah kachiva̱li vāda mibingli kasolu, ‘Nathumwui kashakazā khangarān sālu; kaja kathumthangwui alungli PROHO nathumwui Varena mikahai ngalei chili vāzangda akhuikhavai Jordan hi kānki kajina.’”

¹² Kala Reubenwui mibing, Gadwui mibing kala Manasseh shang tangkhaili Joshuana hānga,

¹³“PROHO nathumwui Varena nathumli ngasām khavai apam akha ngarānmira, kala ngalei chi nathumli mira da PROHOwui rao Mosesna nathumli kasoda hāngkahai tui chi phaningunglu.

¹⁴Nathumwui preiva̱ngarā, nathumwui naongarābing kala sha̱keibing Jordan kānda Mosesna nathumli mikahai ngalei chili pamsāra; kha nathumwui alungli rai kapinga saikora raisāri shaksāda nachināngarāwui mangāli Jordan kānkāra kala athumli ngachonra,

¹⁵PROHOna nathumli kala nachināngarāli mangasām ngasakranglakha eina tangda kala PROHOna athumli mikahai ngalei chi athumna khuikahaiwui thili; nathumwui ngasā kahai ngaleili Jordan kankāda zingshoshong PROHOwui rao Mosesna nathumli mikahai ngalei chili hanungda pānra.”

¹⁶Chieina athumna Joshuali ngahānkai, “Nana ithumli kakaso saikora ithumna sāra, kala nana chikahoho apam chili ithum vāra.

¹⁷Ithumna otsak saikorali Moseswui tui khanganā thāda, nawui tui nganāra; nawui PROHO Varena Mosesli ngasokhami thāda nalila ngasomiranu!

¹⁸Nawui ningkhamili ngakaikashe, kala nana kakasosoli nawui tui makhanganā mi chili shaothatra. Pingmeida kala malung zangmeida sāmalu.”