Read Tangkhul Naga JOSHUA 10 Bible Online

JOSHUA 10 - Tangkhul Naga bible

JOSHUA 10

¹Jerusalemwui awunga Adoni-zedekna, Joshuana Ai yuikhuilaga Jericho kala chiwui awungali kasā thāda sākazamserhaira, kala Gibeonli khalei mibingna Israelli mashitkhuilaga athum pamrumhaira kaji shālaga,

²ngacheelakhaowa; khikhalajila Gibeon hi kahaka keinungna, wungnaowui keinung thāda Ailila hakkhamei akhana kala chiwui mibing rai pinglaka.

³Chieina Jerusalemwui awunga Adoni-zedekna Hebronwui awunga Hoham, Jarmuthwui awunga Piram, Lachishwui awunga Japhia kala Eglonwui awunga Debir athumli pao chihovāda hānga;

⁴“Ili kharāngachonmilu, ithumna Gibeon sashimithaosa; kaja ngalei hina Joshua eina Israelwui mibingli mashithaira.”

⁵Chieina Amorwui awunga phangā, chiya Jerusalemwui awunga, Hebronwui awunga, Jarmuthwui awunga, Lachishwui awunga kala Eglonwui awunga, athumna athumwui raimi kazipkhuida Gibeonli ngasung khavai rairum vasāda rai sai.

⁶Kala Joshuana Gilgalli pamlakha, Gibeonwui mi chihorāda hānga, “Naraobingli napāng mayansāngnāhaila kharāngachonmilu; kala thākta kharākankhuimilu; kaja phungreiramli kapama Amorbingwui awunga saikorana ithumli rai sākhavai kuinamhaira.”

⁷Chieina Joshuana raimi saikora kala kapanga saikora khuiphungda Gilgalwui eina zatphokuwa.

⁸Kala PROHOna Joshuali hānga, “Athumli mangacheelu, kaja athumli ina napāngli horsangmihaira; athum mi khipānakha nali mangasungrarmara.”

⁹Chieina Joshuana Gilgalwui eina ngayā pongda zatlaga kashuirak eina rai atai.

¹⁰Kala PROHOna kashuirak eina athumli khangachee sāmida Israelwui mangāli horsangmi kala athumna chili mi kachungkha sathathailaga Gibeonwui eina kharomphokta Beth-horonwui shongshan kala Azekah eina Makkedah vāshungda sāthatvai.

¹¹Kala athumna Israelwui eina Beth-horonwui shongshanli yāmkhavā tharan PROHOna lunggui kahahak kazingram eina hortada Azekah vāshungda mi kachungkha thi; Israelwui mibingna raighai eina sakathatle theina tākkathatna chungmei.

¹²Chiwui thili PROHOna Amorwui mibing Israelwui pāngli mithang Joshuana Israelwui mangāli PROHOli hānga, “Zimik, na Gibeonli mangatha̱la nganinglu, kala Kachāng, na Aijalon tampākli nganinglu.”

¹³ Chithāda yur china athumwui yangkashebingli athut makhuiranglakha eina tangda, zimikna mangatha̱la nganinga, kala kachāngnala ngasāmmi. Hi Jasharwui Lairikli makapihaimala? Zimikna kazing alungthungli ngasāma kala zimik matunla langpongda pama.

¹⁴Hikathā zimiksho hi ridala aruihonla hithāda PROHOna mi akhawui tui khanganā mashoklakranga. Kaja PROHOna Israelwui vang ngararmi.

¹⁵Chiwui thili Joshuala kala ali khangaso Israel saikora Gilgal rāmrahli latunga.

¹⁶Awunga phangā hina yāmhaida Makkedahwui lungkhurli yāmngayina.

¹⁷Kala Joshuali hithāda rāhānga, “Awunga phangā chi Makkedah lungkhurli yāmngayinkasā theihaira.”

¹⁸Chieina Joshuana hānga, “Lungkhur chi lunggui kahak akha eina shungkhamhaolu, kala athumli mayon khavai mi hailu.

¹⁹Kha nathum chili mapamla yangkashebingli kharomthulu; kala athumli angaphankhuida athumwui keinungli mazang ngasakalu, kaja PROHO nathumwui Varena nathumwui pāngli horsangmi kahaina.”

²⁰Joshua eina Israelwui mibingna sorkhangasai sathatta mutmi kahai tharan kala shākkahaibing china athumwui raipan ngaveitit kahai keinungli ungzang kahai tharan,

²¹mi saikora Makkedah apamli Joshuawui rāmrahli kapong eina latunga; khipānakha Israel mibingwuitungli tui akhala mamatuimana.

²²Chieina Joshuana hānga, “Lungkhur khamor chi sholu, kala awunga phangā chi lungkhur chiwui eina khuishokta ili khuirālu.”

²³Kala athumna chithāda sai, kala Hebron, Jamuth, Lachish kala Eglonwui awungabingli akhuishoka.

²⁴Kala athumna awungabing chi Joshuali khuikhaung eina, Joshuana Israelwui mibing saikorali hokhuida, ali ngasokhavā raimiwui akuibingli hānga, “Rānganaimeida awungabingwui akahungli nathumwui phei eina nailu.” Chieina athumna rānganai, kala athumna athumwui akahungli ranai.

²⁵Kala Joshuana athumli hānga, “Mangacheelu, lah ning masuitālu; pingmeida malung zangmeilu, kaja nathumna khangarar nathumwui yangkashebing saikorali PROHOna hithāda samimi jira.”

²⁶Khaleilaga Joshuana athumli ngaphitthatserhaowa, kala ana thing ava̱va̱li ngazin eina tangda athumli hokthanghai.

²⁷Kha zimik katun tharan, Joshuana kasoda athumna thingtungwui eina khuitālaga athumna ngathum khavai lungkhur chili horsanghaowa, kala lungkhur chi athumna ngalung khorphinhaowa, chi aja eina tangda lei.

²⁸Kala Joshuana Makkedah khuithang ngalei chiwui awunga kala mi saikora raighai eina sāthatserhaida khipākha machakshoklakmana. Jerichowui awungali kasā thāda Makkedahwui awungalila chithāda yuikhui.

²⁹Chiwui thili Joshuali Israel saikorana ngasoda Libnahli vai, kala Libnahli vāngarara;

³⁰kala ngalei chila awungala PROHOna Israelwui pāngli horsangmiserhaida mi saikora raighai eina sāthatserhaowa; ana chili khipākha mataimimana; kala ana Jerichowui awungali kasā thāda chiwui awungalila chithāda yuikhui.

³¹Kala Joshuali Israel saikora ngasoda Libnahwui eina zatphokta Lachishli vai; kala athumna ngalei chi akuinamda ngarara:

³²kala PROHOna Lachish ngalei chi Israelwui pāngli horsangmi, kala ana kakhanethang ngalei chi khuida mi saikora raighai eina Libnahli kasā thāda sāthatserhaowa.

³³Chieina Gezerwui awunga Horamna Lachishli ngachon khavai rai, kha Joshuana awunga eina mibing saikora sāthatserhaida khipākha mataimana.

³⁴Kala Joshuana Israel saikorali ngasoda Lachishwui eina Eglonli vai; kala chili athumna akuinamda ngarara;

³⁵kala athumna chithang ngalei chi yuikhui, kala mi kachiva̱li raighai eina sāthatserhaida ana Lachishli kasā thāda sāthatserhaowa.

³⁶Chiwui thili Joshuana Israelnao saikorali ngasoda Eglonwui eina Hebronli vai; kala athumna chili vāngarara,

³⁷kala ngalei chi khuihaowa, kala chiwui awunga kala chiwui keinungbing, kala mi kachiva̱ Eglonli kasā thāda raighai eina sāthatserhaida mi akhala mataimana.

³⁸Chiwui thili Joshua eina Israel saikorana, Debirli hanungda chili ungngarara,

³⁹kala ana chiwui awungabing kala chiwui keinungbing khuiserhaida chiwui mi saikora sāthatserhaowa; kala mi akhala mataishokmana; ana Hebron eina Libnah kala awungali kasā thāda Debir eina chiwui awungalila sai.

⁴⁰Chieina Joshuana ngalei katonga, phungreiram, Negeb kala angako eina phungreiphei kala awungabingli yuiserhaowa; ana akhala mataimimana; kha manglā kazanga saikora PROHO Israelwui Varena kakaso athishurda sāthatserhaowa.

⁴¹Kala Joshuana Kadesh-barnea eina thuida Gaza, kala Goshenwui ngalei saikora kala Gibeon vāshungda yuiserhaowa.

⁴²Kala Joshuana ngalei eina awungabing saikora sakkhali khotkha sai, khikhalajila PROHO Varena Israelwui vang ngararmi.

⁴³Chieina Joshuana Israel saikorali ngasoda Gilgal rāmrahli latunga.