Read Tangkhul Naga JOSHUA 16 Bible Online

JOSHUA 16 - Tangkhul Naga bible

JOSHUA 16

¹Josephwui ara̱-azāli khayar shimlui chi Jericho ngalemli khalei Jordan eina haophokta Jerichowui tara̱ khalei zingshoshong lamhāng vāshunga, kala Jericho eina shanglaga Bethelwui kaphungram shangshunga;

²Bethelwui eina Luz shanga, laga Ataroth vāshunglaga Archinaobingwui leiretli shangza̱ya;

³chiwui eina zingtunshong tāda Japhletnaobingwui thari, chiwui eina Khamaze Beth-horon eina tangda tashungchaowa, chiwui thili Gezer tāda shamadru eina tātanga.

⁴Josephwui mibing, Manasseh eina Ephraim shangna athumwui shimlui samphanga.

⁵Ephraim shangli athumwui shimkhur athishurda shimlui mi: athumwui shimlui thari zingshoshong Ataroth-addar eina haophoklaga Khamato Beth-horon vāshunga,

⁶chiwui eina thuilaga thari chi shamadru vāza̱ya; atungshong Mich-methath eina tanga; chiwui eina zingshoshongwui thari chi Taanath-shiloh vākuikhuilaga kānvāshumda zingshoshongwui eina Jan-oahli vātai,

⁷Jan-oahwui eina tashumda Ataroth, chiwui eina Naarah vālaga Jericho aza̱khuida Jordanli tātanga.

⁸Tappuah eina haophoklaga thari chi zingtunvāk Kanah kong kala chi shurlaga shamadru eina atanga. Hithāda Ephraimshili shimkhurwui athishurda shimlui mi.

⁹Manasseh shili yarkahai lamwui lunglila Ephraimshiwui keinung kala kha̱ kachungkha lei.

¹⁰ Chithālala athumna Gezerli somkapam Canaannaobingli makashamhaimana, chieina Canaanwui mibingna aja eina tangda Ephraimshili ngasopamda lei, kha athumli thoukai sāngasakta raonao sapama.