Read Tangkhul Naga JOSHUA 20 Bible Online

JOSHUA 20 - Tangkhul Naga bible

JOSHUA 20

¹Chiwui thili PROHOna Joshuali hānga,

² Israelwui mibingli hānglu, “Ina Mosesli hāngkahai thāda ngayin khavai keinungbing kapangkhuilu,

³chieina kachikathāna matheila, lah matheithangmeila mi sathathaiakha chili yāmngayinra; katheshina athut khuikhavai raakha nathumwui vang yāmngayin khavaina.

⁴Sakathatana hikathā keinung akhali ayāmsangda zangkhavai ngaveili ranganingda, keinung chiwui khararnaobingli awui tuishot hāngchitheira; chiwui thili athumna ali keinungli khuizangda apam mira kala chili ali pamngasakra.

⁵Kala katheshiwui mina ali kharomrāsālala, sakathatpa chili kakharompawui pāngli athumna mamisangmara, kaja ana awui khongnaili kharewui yangkashi leida lah thatheilaga sākathat maningmana.

⁶Kala ali yarui ashangva̱ mangāli bichar sākhavai manganingranglakha eina tangda, kala sākathat atamli pāngmon kharei sākasā chi mathiranglakha eina tangda ana keinung chili pamra: chiwui thili ana yāmrā kahai keinung kala akhalattawui shimli latungpaira.”

⁷Chieina athumna Naphtaliwui kaphungramli khalei Galileewui Kadesh, kala Ephraim kaphungramwui Shechem, kala Judah kaphungramwui Kiriath-arba (chiya Hebron) hibing kapangkhui.

⁸Kala Jordan makānda Jerichowui zingshoshong lamhāngwui kaphung khanganili khalei Reubenshi shangwui eina Bezer, Gadshi shangwui eina Gileadli khalei Ramoth, Manassehshi shangwui Bashanwui Golonbing hi kapangkhui.

⁹Keinungbing hi Israelwui mibing saikorawui vang, kala athumli ngasoda ram kazat saikorawui vangna, kaja kachikathāna makathei eina mi sathathaiakha, athumna keinungbing hili yāmsangra, chithāda sāda ana ali athut hāngsangki kajipāwui pāngli mathimara, kala yarui ashangva̱na ali bichar masāranglakha eina tangda, ana chili yāmngayinra.