Read Tangkhul Naga JOSHUA 22 Bible Online

JOSHUA 22 - Tangkhul Naga bible

JOSHUA 22

¹Chiwui thili Joshuana Reuben, Gad kala Manassehwui shang tangkhaili hokhuiya,

² kala athumli hānga, “Nathumna PROHOwui rao Moseswui ningkhami saikora mayonhaira kala ina nathumli kakaso saikora nganāhaira;

³nathumna nachinā ngarāli kharewui eina thuilaga aja rāshungda mahorhaimana, kha nathumwui Varena sālu kaji athishurda ningsangda sāhaira.

⁴Ara PROHO nathumwui Varena nathumwui achinā ngarāli ana ngashit kahai athishurda ngasāmkhui ngasakhaira; chiwui vang eina ara ngareikhuida PROHOwui rao Mosesna nathumli Jordan kong lākhavāk mikahai ngalei nathumwui shim chili ungulu.

⁵PROHOwui rao Mosesna nathumli mikahai ningkhami eina ain chi mayontitlu, nathumwui PROHO Vareli leishi khavai, awui apong saikorali zatkhavai, awui ningkhamibing mayon khavai, kala ali ngavaptit khavai kala ali nathumwui ning manglā tongda otram ngatha̱ khavaina.”

⁶Chieina Joshuana athumli somi, kala athumli shivathaowa; kala athumna athumwui shimli unghaowa.

⁷Atam chitharan Manasseh shang tangkhaili Mosesna shimlui Bashanli mihairasai; kha khangatei tangkhaili Jordanwui zingtunvāk athum chinao ngarāwui ngalemli Joshuana mi. Kala Joshuana athumli kachichāwui shimli kashiun chitharan ana athumli somi,

⁸ana athumli hānga, “Nathumwui shimli, lan kachungkha, sha̱kei, sinā, lupā, kori, mari kala kashankachon kachungkha eina ngasoda ungulu; yangkashebingwui eina ngaponkakhui lan chi nachinā ngarālila ngayarmilu.”

⁹Chieina Reubennaobing, Gadnaobing kala Manassehwui shang tangkhai athum shim hanunghaowa, Canaan ngaleiwui Shilohli khalei Israel mibingwui eina pakthuihaowa, PROHOna Mosesli kaso kahai thāda athumna samphang kahai athumwui ngalei Gileadli hanunghaowa.

¹⁰Kala athumna Canaan ngalemli khalei Jordanvāk katā eina, Reubennaobing, Gadnaobing kala Manasseh shang tangkhai athumna Jordan chili hanphut kahakva akha sākhui.

¹¹Israelwui mibingna chi kashā eina hānga, “Yanglu, Reuben, kala Gad kala Manasseh shang tangkhai mibingna Canaan ngaleiwui zimikshovāk Jordanli hanphut akha sakāhaira, apam chi Israelnaobingwui vākna.”

¹²Kala Israelwui mibingna chi kashā eina, Israel ashangva̱ Shilohli kazipkhuida athumli rai sākhavai ngazeka.

¹³Chieina Israelwui mibingna pāngmon Eleazarwui naomayara Phinehasli, Reuben, Gad kala Manasseh shang tangkhaili chihovai,

¹⁴kala ali ngasoda Israel shang kachiva̱wui akhavā, saikora chi Israel shang ngachaiwui eina shimkhur ava̱va̱wui akui athum tharā vai.

¹⁵Athumna Gileadwui ngaleili Reuben, Gad kala Manasseh shang tangkhaili, vāda athumna athumli ahānga,

¹⁶“PROHOwui yarui ashangva̱na hithāda hānga, ‘Khisāda PROHOli kashurwui eina aja Israelwui Varewui eina ngareithuihaida PROHOli ngakaishida nathum khalattana hanphut akha sakāda mikhanam hi khikhala?

¹⁷ Ithumna Peorli morei sāshap sākahai chiwui eina ithum khalatta arui eina tangdala mapheomiranga; kala chiwui vang PROHOwui mibingwuitungli kazātkashi kharāna,

¹⁸chieina nathum aja PROHOli kashurwui eina ngareithuihaorala? Kala aja nathumna PROHOli ngakaishiakha awui malungkhavāt chi akhama Israel ashangva̱wuitungli tāra.

¹⁹Kha ara, kalikhada nathumwui ngalei chi makhaoda leiakha, PROHOwui Tabernacle khaleipam PROHOwui ngaleili kāzanglaga ithumwui alungli nathumwui shimlui rākhuilu; PROHOliva mangakaishialu, lah ithumwui PROHO Varewui hanphut chili lāngda nathumna khangatei sākakā chieina ithumlila ngakaikashe ngasa ngasakpaishina.

²⁰ Zerahwui naomayara Achanna shitkasang kaida sākazam kahai otbing kakhuiwui vang eina malungkhavāt chi Israel katongawuitungli matāmala? Awui moreiwui vang amāng mashimānmana.’”

²¹Chieina Reuben, Gad kala Manasseh shang tangkhaina Israel shimkhurwui wungva̱-wungvābing chili ngahānkāda hānga,

²²“Pangshapa, PROHO Vare, Pangshapa PROHO Vare! Ana thei; kala Israel khalattanala theiranu! Kalikha hi ngakaishida lah PROHOli shitkasang kaida kasāna jiakha, ithumli tandi miranu!

²³hanphut sākakā hi PROHOwui thi kashurwui eina mai ngareithui khavai, lah rikkatā kachikatranu, tharāzatchigatranu, ningyatchigatranu, chigat khavaina jiakha, PROHO khalattana chiwui angalang hāngsangranu.

²⁴Maningmana, kha ithumna khangacheewui eina kasāna, kaja naoda nathumwui naongarāna ithumwui naongarāli ‘Nathumna PROHO Israelwui Vareli khi khangashit leikhala?

²⁵Kaja, PROHOna ithum eina nathum Reubennaobing eina Gadnaobingli Jordanna thari sāmihaira, PROHOwuili nathumwui yar maleimana,’ chieina ithumwui naongarāli nathumwui naongarāna, PROHOli khokharum ngasām ngasakhaipaishina.

²⁶Chiwui vang eina ithumna kahāngna, ithum arui hili rikkatā kachigatwui vang, lah pha̱phayā khavaiwui vang maningla hanphut akha sākāsa,

²⁷kha hina nathum eina ithum, kala ithumwui thili shokrāda khalei naothot ngachaili shākhi sākhavai, kala ithumla PROHOwui mangāli rikkatā kachigat, pha̱kaphayā kala ningyatchigat sāda otram ngathapaira; chi maningakha nathumwui naongarāna ithumwui naongarāli PROHOwuili nathumwui yar maleimana da hāngpaishina.

²⁸Kala ithumna chukmaja̱ya, kalikhada rārāda khalei atamli ithumli lah ithumwui naongarāli chithāda hāngakha ithumna, ‘Yanglu! ishava ngarāna sākahai, PROHOwui hanphut sākakhui leida lei, hi rikkatā kachigatwui vangla, pha̱kaphayāwui vangla maningmana, kha ithum eina nathumwui ngachaili shākhi akhana’ da ngahānkāra.

²⁹Awui tabernacle mangāli khalei ithumwui Vare PROHOwui hanphut maningla rikkatā kachigat, tharāzāt kachigat, lah pha̱kaphayā hanphut khangatei sakāda PROHOli ngakaishiki kaji kala PROHOwui eina mai ngareithuihaoki kaji chiya ithumwui eina katāva̱li thuiranu!”

³⁰Pāngmon Phinehas kala ali ngasokazata ashangva̱wui akuibing, kala Israel shimkhurbingwui wungva̱-wungvābingna, Reubennaobing, Gad kala Manassehwui kahāng tui chi shālaga, china athumli ningyāng ungngasakhaowa.

³¹Chieina pāngmon Eleazarwui naomayara Phinehasna Reubennaobing, Gad kala Manassehli hānga, “Aja PROHOna ithumli ngasomi kaji ithumna thei, kaja nathumna PROHOwui mangāli khikha zakkashi masāmana kala nathumna Israelwui mibingli PROHO pāngwui eina kanmihaira.”

³²Chiwui thili pāngmon Eleazarwui naomayara Phinehas kala akuibing, Gilead ngaleili khalei Reuben kala Gadbingwui eina hanthuihaida Canaanli khalei Israelwui mibingli latunga, kala tui saikora athumli unghānga.

³³Kala pao chi shālaga Israelwui mibing ningyāngunglakhaowa; kala Israelwui mibingna Vareli sochikatta athumwuitungli zakkashi mamatuiluimana kala Reubennaobing eina Gadnaobingna kapam ngalei chi masākazamluimara da hānga.

³⁴Reubennaobing eina Gadnaobingna hanphut chili shākhi hoi; “Kaja,” athumna hānga, “Ithumwui ngachaili PROHO hi Varelaka kaji chi hina shākhi akhana.”