Read Tangkhul Naga JOSHUA 3 Bible Online

JOSHUA 3 - Tangkhul Naga bible

JOSHUA 3

¹Ngathorthakva Joshuana ngakarthuida Israelwui mi saikorali thānphungda Shittimwui eina zatphokuwa kala athum Jordan makānranglakha kongpheili vāngasāma.

²Kakathumathang otva̱bingna rāmrahlungli zangvāda

³mibingli kasoi, “Leviwui pāngmonbingna PROHO Varewui tuingashit oko chi ngava̱kakā theikhaleoda, nathumwui pam eina zatphokra kala chili shurlu,

⁴chieina nathumna vāki kaji shongfa nathumna theira, kaja nathum hili marālakranga. Kha nathum oko chiwui eina khuining thingkhani khalāda zatphalungra; marānganaipaimana.”

⁵Kala Joshuana mibingli hānga, “Nathum khalatta tharmatheng ngasaklu, kaja akhama PROHOna nathumwui alungli matakhak kahai ot sāra.”

⁶Kala Joshuana pāngmonbingli hānga, “Tuingashitwui oko chi ngava̱kāda mibingwui mangāli zatvālu.” Chieina athumna tuingashit oko chi ngava̱phungda mibingwui mangāli zata.

⁷Kala PROHOna Joshuali hānga, “Aja eina thuida Israel saikorawui mangāli ina naming reingasakra kala Mosesli ina ngasokhami thāda nalila ngasomi kaji athumna theikhuira.

⁸Kala tuingashit oko kaphunga pāngmonbingli nana hithāda hāngra, ‘Nathumna Jordan kongwui tara̱li zangkashung chitharan chili nganinglu.’”

⁹Kala Joshuana Israelnaobingli hānga, “PROHO nathumwui Varewui tui rānganākhuilu.”

¹⁰Kala Joshuana hānga, “Chiwui thili, kharinga Vare nathumwui alungli lei kaji nathumna theikhuira kala makahatlakla ana Canaannaobing, Hitnaobing, Hivnaobing, Periznaobing, Girgashnaobing, Amornaobing kala Jebusnaobingli nathumwui miktāli kashamshokra.

¹¹Yanglu, okathui saikorawui PROHOwui tuingashit oko chi Jordanli nathum saikorawui mangāli ngava̱kāra.

¹²Chiwui vang eina mi tharāda khani Israel shang-shangwui eina mi ava̱va̱ kapangkhuilu.

¹³Okathui saikorawui PROHOwui ningkhami oko ngava̱kazata pāngmonbingwui pheimayā Jordan tara̱li zangkhanai eina atungshong eina longkatā tara̱ chi ngasāmhaora kala phākho thāda nganinghaora.”

¹⁴Mibingna Jordan kānkhavai kachonshim eina kashok tharan athumwui mangāli tuingashit oko ngava̱kazata pangpmonbingna rida zata,

¹⁵kala oko khangava̱ pāngmonbingwui pheina Jordan tara̱li naiza̱khaleoda, (māhā peida chiwui kongphei saikora tara̱ pemda longa),

¹⁶atungshong eina longkatā tara̱ chi khāmhaowa kala chiwui juikakā china atungshong longshangda Zarethan ngalemli khalei Adam keinung shangshunga kala azingshong Salt Sea eina Arabah shamadrushong longkatā chi katatshathaowa; kala mibingna Jericholi yangngasungda kankāhaowa.

¹⁷Kala Israelnaobingna ngalei katheng chili kānlakha, PROHOwui tuingashit oko kaphunga pāngmonbing china mi saikora makānkupranglakha eina tangda Jordan kong alungthungli nganinga.