Read Tangkhul Naga JOSHUA 4 Bible Online

JOSHUA 4 - Tangkhul Naga bible

JOSHUA 4

¹Yur katonga chi Jordan kankāser kahai eina PROHOna Joshuali hānga,

²“Mibingwui eina mi tharāda khani shang-shang kachiva̱wui eina mi ava̱va̱ khuilaga athumli kasolu,

³Jordan alungthungli pāngmonbingna nganing kahaipam chiwui eina ngalunggui tharāda khani khuilu kala ngalungbing chi khuiphungda aja ngayā nathum ngasām khavaipamli shunhailu.”

⁴Chieina Joshuana Israel mibingwui eina kapang kakhui mi tharāda khani shang kachiva̱wui eina mi ava̱va̱ chili hokhui.

⁵Kala Joshuana athumli hānga, “Jordan alungthungli PROHO Varewui oko mangāli kanvāda nathum Israel shangwui mashing athishurda ngalunggui ava̱va̱ nathum yartuili ngava̱khuilu;

⁶kaja hina nathumwui vāng khudam ngasāda, naoda rāki kaji atamli nathumwui naongarāna ‘Ngalunggui hiwui kakhalat khikhala?’ da ngahānra,

⁷chitharan PROHOwui tuingashit oko mangāli Jordanwui tara̱ chi thenghaowa kaji nathumna athumli pheichitheira. Jordan khamakān chitharan Jordanwui tara̱ thenghaowa. Chiwui vang eina ngalungguibing hi Israel mibingli katang makhavai phaningung khavai ngasāra.”

⁸Chieina Israelwui mibingna Joshuawui kakaso athishurda sai kala PROHOna Joshuali kaso kahai athishurda Israelwui mibing shangwui athishurda Jordan alungthungwui eina ngalung tharāda khani khui; kala ngava̱khuida athum ngasām khavaipamli kaziphai.

⁹Kala pāngmonbingna tuingashit oko chi ngava̱laga khanganing Jordan alungthung chili Joshuana ngalung tharāda khani shoma; kala chi aja eina tangda lei.

¹⁰Kaja Mosesna Joshuali kaso kahai athishurda PROHOna Joshuali sāluda kaso kahai saikora makupranglakha eina tangda oko chi khangava̱ pāngmonbingna kong alungthung chili nganinga. Mibingna katotsisi eina makānkai;

¹¹mibing saikora makānkā kahai eina pāngmonbingna PROHOwui oko chi ngava̱laga yarui mangāshong makānkai.

¹²Mosesna kasohaikasā athishurda Reubenwui naomayarabing, Gadwui naomayarabing kala Manassehwui shang tangkhai, raisāri shaksāda Israelwui mibingli rithuihaowa.

¹³Raimi thing hangmati shikha raisāri shaksāda PROHOwui mangāli rai sākhavaiwui vāng Jericho tampākli vāhaowa.

¹⁴Chithang PROHOna Joshuali Israel saikorawui mangāli aming reingasaka. Moseswui thot peida ali khangachee thāda, athumna Joshuali ngacheerarang eina nganinga.

¹⁵Kala PROHOna Joshuali hānga,

¹⁶“Tuingashit oko kaphunga pāngmonbingli Jordanwui eina shok khavai hānglu.”

¹⁷Chieina Joshuana pāngmonbingli, “Jordanwui eina shoklu” da kasoi.

¹⁸PROHOwui tuingashit oko khuikaphunga pāngmonbing chi Jordan alungthungwui eina zatphokta athumwui phei ayar kathengli shoknaikasang eina, Jordanwui tara̱ chi hanungda kharewui khalong thāda kong pemda longluihaowa.

¹⁹Mibingna kachāng kharewui katharāthang Jordan kānda Jerichowui thari zingshoshong Gilgalli rāmrah asāpama.

²⁰Kala Jordanwui eina kakhui ngalung tharāda khani chi Joshuana Gilgalli shomhaowa.

²¹Kala ana Israelwui mibingli hānga, “Naoda rāki kaji atamli nanao ngarāna avāva̱ ngarāli lungkhor hi khiwui vangkhala? da ngahānakha,

²²Israelna Jordan hi katheng eina khamakānwui kakhalatna da nathumna nathumwui naongarāli hāngchitheira.

²³Kaja PROHO nathumwui Varena ithum saikora mamakānkupranglakha Red Sea theng khangasak thāda, PROHO nathumwui Varena nathum mamakānseranglakha eina tangda Jordanwui tara̱ theng ngasaka,

²⁴chithāda sāda okathuiwui mi saikorana PROHOwui pāngwui pangshap hakkhamahā chi theira; chieina nathumna PROHO nathumwui Vareli ngacheechingra.”