Read Tangkhul Naga JOSHUA 7 Bible Online

JOSHUA 7 - Tangkhul Naga bible

JOSHUA 7

¹Kha sākashimānli zangkahai otbingwui apongli Israelwui mibingna shitkasang kaihaowa; kaja Judah shangnaoli Zerahwui naomayara Zabdi, Zabdiwui naomayara Carmi, Carmiwui naomayara Achan china sākathān kahai ot kakhuihaowa kala Israelwui mibingli PROHOwui malungkhavāt mei thāda chuihaowa.

²Joshuana Jerichowui eina Bethelwui zingshovāk Betha-ven ngalemli khalei Ai chili mibingli chihovāda hānga, “Ngalei chili vālaga ara̱yanglu.” Chieina mibing china vālaga Ai ayangkui.

³Kala athumna Joshuali latungda hānga, “Mi saikora mavāranu kha thingkhani kathum sha̱kha varanu kala Aili ngararanu; mi katongali mavā ngasakalu; kaja athum kateokhamānga.”

⁴Chieina mibing chiwui eina thing kathum sha̱kha vai; kha athum Ai mibingwui eina yāmuwa,

⁵kala Aiwui mibingna Shebarimwui ngaveikhur eina tangda ngahomtai kala athum thumrāda tharuk sha̱khali shaothathaowa. Chi theilaga mibing malungkaping shimānhaida ngacheeranghaowa.

⁶Chieina Joshuana awui kachon serkhaklaga Israelwui khararnaobingli ngasoda athumwui kuili hotla neolaga PROHOwui oko mangāli ngazin eina tangda ngakhumzangda pama.

⁷Chieina Joshuana hānga, “Iyavo, O Proho VARE, khisāda mibing hili Jordan kānda khuirāsakhala? Amorbingwui pāngli misangda thikhavai kasāla? Ithum Jordan makānla lākhavāk pamsasi kaje phāmeira!

⁸O Proho, Israelna athumwui yangkashibingwui eina yāmthui kahai tharan ina khi hāngrakhala?

⁹Kaja Canaannaobing kala ngalei chili kapambingna hi shālaga ithumli rakuinamra, kala ithumwui ming okathuiwui eina katathaora; kala nawui hakkhamahā mingwui vāng nana khi sārakhala?”

¹⁰PROHOna Joshuali hānga, “Ngakarthuilu, khisāda hithāda khorumpamkhala?

¹¹Israelna morei sāhaira; ina athumli kaso kahai iwui tuingashit chonmakānhaira; sāshimān kahai ot athumna khuihaira kala leekhuilaga kapikta athumwui otlungli thumhaida lei.

¹²Chiwui vang Israelwui mibing athumwui yangkashebingli mangasungkhararna. Athum yangkashebingwui eina yāmhaowa, kaja athuma shimānkapai otbing kathā ngasāhaira. Nathumwui alungwuili khalei otbing chi masākazamranglakha eina tangda, ina nathumli mangasomiluimara.

¹³Nganingkālu! mibingli thar ngasaklu kala hānglu, akhamawui vāng nathum khalatta tharlu; kaja Israelwui PROHO Varena hithāda kahāngna: ‘O Israel, nathumwui alungli sākathān kahai otbing leidalei; nathum alungwui eina otbing chi makhuithuiranglakha eina tangda, nathumwui yangkashebingli nathum mangasungrarmara!’

¹⁴Chiwui vang akhama ngathor nathumli shangbingwui athishurda khuirāra; kala PROHOna hākakhui shang chi shimkhurbing eina rāra; kala PROHOna hākakhui shimkhur chi shimlākwui mi mashing eina rāra; kala PROHOna hākakhui mi mashing chi mi ava̱va̱ eina rāra.

¹⁵Kala sākathān kahai ot kakhuia a chili kala otbing saikora mei eina riktāra, kaja ana PROHOwui tuingashit chi chonmakānhaira kala Israelwui alungli ana kakhayak ot sāhaira.”

¹⁶Chieina Joshuana ngathorthak thuida, shang-shang eina Israelli khuikharā eina Judah shangli khuihaowa;

¹⁷kala ana Judah shangli nganaida khuirai, kala Zerahwui shimkhurbingli khuihaowa; kala ana Zerahwui shimlak eina khuirai, kala Zabdili khuihaowa;

¹⁸kala ana Zabdiwui shimlak mi ava̱va̱ khuikharā eina Judah shangwui Zerahwui naomayara Zabdi, Zabdiwui naomayara Carmi, Carmiwui naomayara Achanli khuihaowa.

¹⁹Chieina Joshuana Achanli hānga, “inaomayara, Israelwui PROHO Vareli tekmatei ngasaklu, kala ali masotmilu; ara nana khi sāhaokhala kaji ili hānglu; iwui eina mathumhailu.”

²⁰Kala Achanna Joshuali ngahānkai, “Kachangkhat eina, Israelwui PROHO Varewui mangāli I morei sāhaira; kala ina sākahai ot chi hina:

²¹horkathānhaikasā lanbing chiwui ngachaili Shinarwui kachon khamathā akha, kala shekel shākhani kharita lupāsā kala shekel hangphangā kharita sinātang, chi kathei eina ina ngamarda ningchanghaowa, kala khuihaowa; kala yanglu, chibing chi iwui kachonshimwui leikhur akhali lupāsā eina mazinglaga phumhaida lei.”

²²Chieina Joshuana mi chihovai, kala athumna kachonshimli ngasamvai; kala yanglu, awui kachonshimli lupāsā eina mazinglaga ngaleili chuiphumhaisai.

²³Kala athumna otbing chi kachonshimwui eina khuishoklaga Joshua eina Israelwui mibing saikorali khuiungmida PROHOwui mangāli pheichithei.

²⁴Chieina Joshua eina Israel saikorana Zerahwui naomayara Achanli, awui lupāsā, kachon, sinātang, kala awui naomayarabing eina naongalāva̱bing, kala awui seivā, kala gadhā, kala yao, kala awui kachonshim, kala awui khalalei saikora eina ngasoda athumna Achor tampākli khuishanga.

²⁵Kala Joshuana hānga, “Khisāda nana ithumli chot ngasakhala? Aja PROHOna nali kachot khuirāmihaira.” Chieina Israelnaobing saikorana athumli ngalung eina horthatta athumli mei eina riktāhaowa.

²⁶Kala athumna awuitungli ngalung khorda wonrā sākahai chi aja eina tangda lei; hithāda PROHOwui malungkhavāt suitāhaowa. Chieina apam chili aja eina tangda Achor Tampāk da hoi.