Read Tangkhul Naga JOSHUA 8 Bible Online

JOSHUA 8 - Tangkhul Naga bible

JOSHUA 8

¹Kala PROHOna Joshuali hānga, “Mangacheelu, lah ningla masuitālu; raimi katonga khuiphunglu kala ngakarthuida Aili shanglu. Yanglu, Aiwui awunga, awui mibing, awui keinung kala awui ngalei ina napāngli sangmihaira;

²kala nathumna Jericholi kala chiwui awungali kasā thāda nana Ai kala chiwui awungalila sāmira; athumwui lan eina sha̱keimang nathumna ngapaikhuira; keinung chiwui zingtunshong ngathirai sālu.”

³Chieina Joshuana ngakarthuida raimi saikorali thānlaga Aili shanga kala Joshuana rai kapinga mi thingthumrā kapangkhuilaga ngayāshong chihoshanga.

⁴Kala ana athumli hānga, “Yanglu, nathum keinungwui zingtunshong ngathirai sāra; keinungwui eina tāda mathuipaimana, kha shaksālaga ngarānpinghailu;

⁵kala I eina ili khangaso mibingna keinung chili vāra. Kala athumna ithumli kharomkashok chitharan kharewui thāda, ithum yāmhaora;

⁶kala keinung chiwui eina athumna ithumli kharom khavai shokser ngasakra, kaja ‘Athum kharewui thāda yāmluihaira’ da athumna hāngra. Chieina ithumna athumwui eina yāmhaora;

⁷chitharan nathumna rimkasāwui eina shokta keinung chi zangkhuira; kaja PROHO nathumwui Varena keinung chi nathumwui pāngli sangmira.

⁸Kala nathumna keinung chi khui kahai tharan, nathumna keinung chi mei eina thottāhaolu, PROHOna hāng kahai thāda sāra; ina nathumli hi kakasona da theilu.”

⁹Chieina Joshuana athumli chihovāda Ai eina Bethel aniwui amatak Aiwui zingtunshong ngathirai asai; kha Joshuava chithang ngayā mibingli ngasopama.

¹⁰Kala Joshuana ngathorthakva̱ ngakarthuida mibingli kazipkhui, kala Israelwui ararbingli ngasoda Ai mibingwui mangāli shanga.

¹¹Kala Ali ngasokazata raimi saikora keinungwui mangāshong shangnganaida Aiwui zingtunshong kathuka apam akhana mataklaga rairum vasāpama.

¹²Kala ana keinung chiwui zingtunshong Bethel eina Aiwui ngachaili ngathirai sākhavai mi thingphangā shikha kaziphai.

¹³Chithāda raimibing kachungana keinungwui atungshong kala chiwui rai khangakapbingna zingtunshong kazipa, kha Joshuava chithang ngayā tampāk chili pama.

¹⁴Kala Aiwui awungana chi kathei eina keinungwui mi saikorali totot hokhuilaga ngathorshong Israelli ngarar khavai Arabahvākwui atungshong shokuwa; kha keinungwui khanukvāk rairim sāda lei kaji a matheithuwa.

¹⁵Kala Joshua eina Israelwui mibing saikora athumwui mangāli makhayui thāda lamhāngvāk yāmvā khaninghaowa.

¹⁶Chieina keinung chili khalei mi saikorali athumli kharomvā khavai hokhui, kala athumna Joshuali kharomvāmamānda keinung chiwui eina khuithuiserhaowa.

¹⁷Aili lah Bethelli Israelnaoli kakharomli makazang mi khipakha maleisamana, athumna keinung shohaiphunglaga Israelli kharomthuihaowa.

¹⁸Chieina PROHOna Joshuali hānga, “Nawui pāngli khalei kazei chi Aivāk katingvālu; kaja ina napāngli horsangmira.” Chieina Joshuana awui pāngli kasinga kazei chi keinungvāk katingvai.

¹⁹Kala rairim sāda khaleibing china athumwui pam eina thaklāk eina shoka, kala ana apāng katingkākhaleoda, athumna keinungli ngasamzangda khuihaowa; kala athumna katotlak eina keinung chi mei sa̱tāmihaowa.

²⁰Chieina Aiwui mibingna ngareikhaung tharan, yanglu, keinung chi meikhut ngapuirut eina kazing kāshunga; kala athum hishongla chishongla yām khavai pangshap maleithuwa, kaja lamhāngvāk yāmvā kahai mibing chi athumwuishong hanungrāsai.

²¹Kala Joshua eina Israel saikora, ngathirai kasābingna keinung chi khuihaida meikhut kazing kāshung kahai kathei eina mibingna hanungda Ai mibingli sāthat ngakānhaowa.

²²Kala kaikhana keinungvāk eina rai kala khangatei kaikhana chivāk rāda Israelna athumli kuinamhaowa, kala Israelna athumli mayāmshok ngasaklakla shaothatserhaowa.

²³Kha Aiwui awungali athumna kharing eina tukkhui, kala Joshuali khuiungmi.

²⁴Israelna Aiwui mibing chili lamhāngli kharomvāda athum saikora chili akha eina tangda mashākla raighai eina yaitupthat kahaiwui thili, Israel saikora Aili latvai kala chili leikasā saikora raighai eina sāthatserhaowa.

²⁵Kala chithang sākathat sha̱naola mayarnao Aiwui mi saikora, thingtharāda khanina.

²⁶Kaja Aiwui mi saikora masāthat ngakānranglakha eina tangda Joshuana apāng eina awui kazei katingkashok chi makhuitāmana.

²⁷PROHOna Joshuali kaso kahai athishurda Israelna sha̱kei eina horkathān kahai thongthāng chimāng ngaponkhui.

²⁸Chithāda Joshuana Ai mei sa̱tāhaowa, kala katang makhavai ramcho sāngasak kahai chi ajala chithāda lei.

²⁹Joshuana Aiwui awungali thingtungli thāngda ngazin eina tangda kāngyuihai, kala zimik katun eina athumna awui angun chi khuitāda keinung ngaveili phum khavai Joshuana kasoi, kala lungkhor kahaka khorda, lungkhor chi aja eina tangda lei.

³⁰ Chiwui thili Joshuana Israelwui PROHO Varewui vang Ebal Kaphungli hanphut akha sakai.

³¹ PROHOwui rao Mosesna Israelwui mibingli kaso kahai, ain lairikli kapi kahai thāda “Masākakhaiya kala mari eina makashāna ngalungwui hanphut” na kala chiwuitungli athumna PROHOli rikkatā kachigat kala ningyatchigat sai.

³²Kala chili, Israel mibingwui mangāli, ana Moseswui ain lungphek akha kapihaikasā chi ngalungbingwuitungli kapisanga.

³³ Kala Israel saikora, kha̱miranu, athum ramnaobingranu, athumwui khararnaobing, kala otva̱bing kala athumwui bichar samibingli ngasoda PROHOwui tuingashit oko kaphunga Levi pāngmonbingwui mangāli, oko chili mai ngareingasungda nganinga; tangkhaina Gerizim Kaphung mangāvāk nganinga kala tangkhaina Ebal Kaphung mangāvāk nganinga. Hi PROHOwui rao Mosesna khareli Israelwui mibingli somi khavai kasohaikasāna.

³⁴Kala chiwui thili ainli kapi kahai athishurda sokhami tuila khonkashi tuila ain saikora ana pātai.

³⁵Mosesna kaso kahai chili Joshuana Israel katonga, sha̱nao, naoshinao kala athumwui alungli pankharuma kha̱mi saikora chiwui kazip chili, mapāshokkhangakān tui akhala maleimana.