Read Tangkhul Naga JOSHUA 9 Bible Online

JOSHUA 9 - Tangkhul Naga bible

JOSHUA 9

¹Jordan kānda khalei kaphungram Lebanonshong Great Sea shangshungda kala khanem tampākli khalei Hit, Amor, Canaan, Periz, Hiv kala Jebuswui awungabingna shokta khalei otshot hi kashā eina,

²athum akha eina akha khokkha sāda Joshua kala Israelli ngarar khavai khangashit sāhaowa.

³Kha Gibeonli kapambingna, Joshuana Jericho eina Aili kathāda yuihaokhala kaji shālaga,

⁴athumna awor sāda gadhātungli porāshi akāk, drakhāra̱ sangkhavai chiphokakhui khao,

⁵athumwui pheili chiphokakhui pheihop, kala tanar kahai kachon ngavai kala morthut kahai khamuikao da khuiphunga.

⁶Kala athumna Gilgal rāmrahli Joshua eina Israelwui mibingli asamphangda hānga, “Ithum katāva̱wui eina kharāna; chieina arui ithumli tuingashit akha sālu.”

⁷ Kha Israelwui mibingna Hivnaobing chili hānga, “Nathum hiwui luinganaili khalei mi thai; chithakha ithumna nathumli kathāda tuingashit sapairakhala?”

⁸Athumna Joshuali hānga, “Ithum nawui raobingna.” Chieina Joshuana athumli hānga, “Nathum kachikathā mikhala? Kala kachiwui eina kharākhala?”

⁹Athumna ali ngahānkai, “Naraobing katāva̱wui eina kharāna; khikhalajila nawui PROHO Varewui ming chiwui vang kharāna, kaja Egyptli ana kasā kala awui chānpao ithumna shāhaira,

¹⁰ chili lāngda Jordan kānda khalei Amorbingwui awunga khani Heshbonwui awunga Sihon eina Ashtarothli kapama Bashanwui awunga Ogli kathāda sākhala kaji ithum shāhaira.

¹¹Kala ithumwui khararnaobing kala ramwui mi saikorana ithumli hānga, nathumwui pāngli shongzawui vang kashakazā ngarānphungda, athumli asamphangda hānglu, ithum nathumwui raona, ara ithumli tuingashit akha rāsāmilu.

¹²Ithumwui khamui yanglu; ithumna nathumli samphang khavai kazatli ithumwui shongzawui vang kashakazā sākhavai shimwui eina zatphokthang lumsai, kha ara yanglu, kaohaida morhaira;

¹³Ithumwui drakhāra̱ sangkhavai khao hi chipemthang kadhar eina leisai, kha yanglu ara wuthaira; kala ithumwui kachonbing eina pheihop yanglu, shongfa kasāngkha zathaida ara tānārhaira.”

¹⁴Chieina mibingna athumwui kashakazā chi zāngaruma, kala PROHOwui eina apong mangahānkhuimana.

¹⁵Chiwui vang eina Joshuana athumli masāthat khavai chingri kahai tuingashit akha sai kala yarui ashangva̱wui kathāna saikorana shākhi mi.

¹⁶Athum tuingashit sāda kathumthang kākahaiwui thili, mibing chi athumwui luinganaili khalei mibingna kaji shāhaowa.

¹⁷Kala Israelwui mibingna zatphokta athumwui keinungli kakathumathang vāzanga. Athumwui keinungbing chiya Gibeon, Chephirah, Be-eroth, Kiriath-jearim hibingna.

¹⁸Kha Israelnaobingna athumli masāthatmana, khikhalajila yarui ashangva̱wui kathānabingna Israelwui PROHO ming singda Israelwui Vareli shākhi sāmihairasai. Chieina yarui ashangva̱na kathānabingli ngurngur matuihaowa.

¹⁹Kha kathānabing china yarui ashangva̱li hānga, “Ithumna PROHO, Israelwui Varewui ming singda shākhi sāmihaira, ara athumli ithumna masāza̱luipaimana.

²⁰Athumli hithāda sāra, athumli ringngasakra, maningakha athumli shākhi sākahaiwui vang eina chiwui malungkhavāt ithumwuitungli tāshunghaipaishina.”

²¹Kala kathānabing china hānga, “Athumli ringngasakra.” Chiwui vang eina akhavābingna kahāng thāda athumli yarui ashangva̱wui vāng thingkapha eina tara̱ katā sāngasaka.

²²Joshuana athumli hokhuida hānga, “Khiwui vang nathumna ithumli kapikta, ithumwui luinganaili leilaga, ithum katāva̱ eina rai da hāngkhala?

²³Ara chithāda sāda nathumli khonshihaira, chieina iwui Varewui shimkhurwui vang nathum raonao sāda kaikhana thing phāra kala kaikhana tara̱ tāmira.”

²⁴Athumna Joshuali ngahānkai, “Khikhalajila nawui PROHO Varena awui rao Mosesli kasoda ngalei katonga hi mira kala ngalei hili kapama mi saikora nathumwui mangāli sāthathaora kaji naraobingli kahāngwui vang ithumna ithumwui mirinwui vang ngacheenahaida hithāda kasāna.

²⁵Ara ithum nawui pāngli leili: nawui mikyanli ithumwui vang kaphā khamashung chi nana sāmilu.”

²⁶Chieina ana athumli chithāda sai, kala Israel mibingwui pāng eina kanmida athumli masāthatmana.

²⁷Kha Joshuana athumli yarui ashangva̱ kala PROHOwui hanphutwui vang thingkapha, tara̱ katā sāngasaka. Athumna aja eina tangda ot hi PROHOna kakapang pamli sāda lei.