Read Tangkhul Naga 2 THESSALONICANAO 1 Bible Online

2 THESSALONICANAO 1 - Tangkhul Naga bible

2 THESSALONICANAO 1

¹ Paul, Silas, kala Timothywui eina— Ithumwui Avāva̱ Varivara kala Proho Jishu Khristawui alungli khalei kala Thessalonicawui churchli kagapina:

² Ithumwui Avāva̱ Varivara kala Proho Jishu Khristawui lukhamashan kala chingri kahai nathumli tāshungmiranu.

³ Ivānaobing, nathumwui vang atam kachida ithumna Vareli ningshi. Hi ithumna sāngayilāk kahai otna, khiwui vangkhala kaja nathumwui shitkasang mataisangmamānda lei kala akhana akhawui vang leikashila mataisangmeihaira.

⁴Nathumli rekakharek kala kachotkachāng khami tharan nathumwui ningzinghākharing kala shitkasang khangatar chi theida ithumna Varewui churchbingwui miktāli nathumwui mangā eina lāngsoi.

⁵Saikora hina Varewui bichar hi khamashungana kaji chithei kala nathumna samphangda khalei kachotkachāngwui athei sāda Vare wungramli zangkhangayena da shānkhuira.

⁶Varena phāvaira kaji chi ana sāra, nathumli kachotkachāng khamibingli, ana kachotkachāng mira,

⁷chotkahaia nathumlila, ithumlila ana ngasāmkhui ngasakra. Jishuna, pangshap khaleiya awui kazingraobingli mei eina ngasoda kharā chitharan;

⁸Vareli makhuikasangbing kala ithumwui Proho Jishu Khristawui paokaphāli makhanganābingli tandi mira.

⁹Katang makhavai shongrān chi athumna samphangda Prohowui kala sāshap pangshapwui tekhamatei chili mazangmara.

¹⁰Ana rāthanghon shitkasangbingna ali tekmatei ngasakra kala maiyā ngasakra. Nathumla chili zangra, khiwui vangkhala jilaga ithumna tamchithei kahai paokaphā chili nathumna shitsanghaowa.

¹¹ Chieina ithumna nathumwui vang seihā sāmichinga. Nali hokhui kahai mirin chiwui athishurda ringshapta awui pangshap eina kaphā kasā kala shitkasangwui otsak kachiva̱ chi ungshung khavai ithumna Vareli poli.

¹²Hithada sāda ithumwui Varivara kala Proho Jishu Khristawui lukhamashan mangā eina Jishu Khristawui mingli nathumli tekmatei ngasakra.