Read Tangkhul Naga 2 THESSALONICANAO 2 Bible Online

2 THESSALONICANAO 2 - Tangkhul Naga bible

2 THESSALONICANAO 2

¹ Ithumwui Proho Jishu Khrista latrāluiki kaji kala ali ngasoda ithum kaziprumki kajiwui pongli ivānaobing nathumli kapona,

² Kaja Prohowui Zimiksho rāhaira da khamatui china nathumwui ningli mapa̱ngapā kala makhanang ngasakalu. Hi ithumna khamarānli, hākashokli kala kakapili kahāngna da mibingna kaphaning thai.

³ Mi khipānakha nathumli khikhikhawui apong eina machipat ngasakalu. Kaja naomeikap kaji Ngakaikashi atam kala meifali vāki kaje Makaphā-Makhayā chi mashokranglakha eina tangda Zimiksho chi marāmara.

⁴ Ana, varena da kahobing kala khokharumwui otsak saikorali yetra kala ā khalatta saikora chiwuitungli chipamkhuira. Varewui khorumshimli eina tangda vāzanglaga Varena da kāpamra.

⁵ Nathum maphaningungmala? Saikora hi nathumli ngasopamlakha ina hāngserhaira.

⁶Thalala aruichang chi mashok khavai kahapa akha lei kala chi khikhala da nathumna thei. Retkahai atam chili Makaphā-Makhayā chi shokrāsāra.

⁷Matheikharara Makaphā-Makhayā ā chi ara ot sāphokhaira, kha kahapapā china shongfa machikāranglakha eina tangda shokki kaji chi mashokfamara.

⁸ Chiwui thili Makaphā-Makhayāpa chi khipākhala kaji phongshokra kha Proho Jishuna kharā tharan awui khamor eina kashoka khaksuina ali suithathaora kala Prohona kharāwui kahān china ali shimānchao ngasakra.

⁹ Makaphā-Makhayā china Satanwui pangshap eina shokta mina masākharar makhamashung kala matakhak kahai ot kachungkha sāchitheira,

¹⁰kala shimānki kaje athumli makaphā-makhayā ot kachungkha eina minamra. Athum shimānra, kaja kahui samphang khavai khamashung chi athumna makhuisangthu kala maleishithuwa.

¹¹ Chiwui vang eina khayonwui pangshap china ot sāda makhamashung chi shitsang khavai Varena athumwui alungli khayonwui pangshap chi chihovai.

¹²Chiwui athei chiya khamashungli mashitkasang kha morei kasāli ringkaphā athum chili yonngasakra.

¹³ Prohona leikashe ivānaobing, ithumna nathumwui vang atam kachiva̱li Vareli ningshiphalungrali. Kaja Manglāwui pangshap eina nathumli Varewui kathara mibing kala nathumna khamashungli shitkasangwui mangā eina nathumli huikhui khavai kapangkhui.

¹⁴Ithumna paokaphā tamkachithei mangā eina Varena nathumli hokhui, kala ithumwui Proho Jishu Khristawui tekhamatei samphang khavaina.

¹⁵ Chiwui vang eina ivānaobing, ithumna nathumli pao hākashokli nilala, chithi kakapili nilala khamashung tamchithei kahai chili singtitta nganingchinglu.

¹⁶ Ithumli leishikhami kala awui lukhamashanlungli makhangachei malungkaping kala kachihān khame ithumwui Proho Jishu Khrista kala ithumwui Avāva̱ Varivarana,

¹⁷kaphā ot chi sāshap khavai kala kaphā chiwui vang matuishap khavai nathumli katommiranu kala pingngasakranu.