Read Tangkhul Naga 2 THESSALONICANAO 3 Bible Online

2 THESSALONICANAO 3 - Tangkhul Naga bible

2 THESSALONICANAO 3

¹ Ivānaobing, naomeikapta, nathumwui ngachaili kashok thada Prohowui chānpao hi thāklāk eina ngayaovāshum khavai kala khayākashi eina khuisang khavai ithumwui vang seihā sāmilu.

² Makaphā-makhayābingwui eina Varena ithumli kanshokmi khavai seihā sāmilu, kaja mi kachiva̱na pao chi shitkasang maningmana.

³ Kha Proho hiya ningtongda shitsangkapaiana. Ana nathumli pangshap mida makaphāwui eina mayonmira.

⁴Ithumna nathumli hāngchithei kahai chi sāda leili kala sāchingra da chihāna kala kachihān hi Prohona ithumli sangkhamina.

⁵Varewui leikashi hakmeida theikhui khavai kala Khristawui ja̱khami chi nathumli leikhavai Prohona thānmichingranu.

⁶ Ivānaobing ithumwui Proho Jishu Khristawui mingli kakasona kaja ithumna hāngchithei kahai makashur kala ngachāng makāla okkathuia navānaobingli mangasoalu.

⁷ Ithumna kasā tākam eina nathumla sāphalungra kaji nathumna thatheihaira. Nathumli ngasopamda leilakha ithum ngachāng makakā ot masālakmana.

⁸ Ithumna khipākhawui kashakazā lem eina mashak-mazāmana kala khipākhalila makhanang ngasakla ngashun ngayā mateila ngalang zarda ot panglāk eina sai.

⁹ Chi ithumwui mashun makhaleiwui vang maningmana, kha nathumna ngayolaga sha̱khui khavai kasāna.

¹⁰ Ithumna nathumli ngasopamda leilakha hi kasochinghaira, chiya “Ot masākhangai mi chi maphazāranu.”

¹¹ Khikhalajila nathumwui ngachaili mi kaikha ngachāng makāmada miwui ot kasāli hapkhanolak eina okthuida lei kaji pao shai.

¹² Hikatha mibingli Proho Jishu Khristawui ming singda, athumwui ot shukshuk sākhavai kala kachichāwui kashakazā pheikhui khavai kakasona kala khamachinna.

¹³ Kha ivānaobing, nathumna kaphā ot kasāli ngachāng machatphalungmara.

¹⁴Ithumna kachiphun chithi hiwui tuili mashitkasang mi kaikha leisālapai. Leisākha chikathā mi chili machuttithailu kala ali khangasola mangasoalu, chieina a khayakhaora.

¹⁵Kha ali yangkashena da makhuihaila achinā akhana da machinlu.

¹⁶ Ara chingri kahaiwui Proho a khalattana nathumli atam kachiva̱li kala apong saikorali chingrihai ngasakranu. Prohona nathum saikorali ngasomiranu.

¹⁷ Ipang eina hi kagapina; Paul ina kachiphun shālamna. Chithi kachida hithada ina shoi sai. Hi iwui khangachā akapitna.

¹⁸ Ithumwui Proho Jishu Khristawui lukhamashan nathum saikorali ngasomiranu.