Read Tangkhul Naga 1 TIMOTHY 1 Bible Online

1 TIMOTHY 1 - Tangkhul Naga bible

1 TIMOTHY 1

¹Ithumwui kachihāna Khrista Jishu kala ithumwui Huikhame Varewui kakaso eina Khrista Jishuwui paokazata Paulwui eina,

²shitkasangwui pongli kachangkhat inao sārān kaje Timothylina: Avāva̱ Vare kala ithumwui Proho Khrista Jishuna lukhamashan, phaningkhami kala chingri kahai miranu.

³Ina Macedoniali vauki kaji tharan pokahai thada, nali Ephesusli leisā ngasakngai. Chithākha apam chili mi kaikhana minama pao tamchitheida khalei chi matamchithei khavai kasoshapra.

⁴Ngaphat-ngayāt shok khangasaka khararchān kala awo-ayibingwui mitun aming hāngkachithei chi thāngasak khavai hānglu. Chikathā chi shitkasang eina theikashapa Varewui angarān angayeili khikha kankhanā maleimana.

⁵Ithumna kakaso hiwui ningrin chiya, kathara wuklung, tharzā kahai mashun-makhui kala kachangkhatwui shitkasang eina kharā leikashi chi mataisang khavaina.

⁶Mi kaikhana hi horhailaklaga aremawui ngaphat-ngayātli akachang sāhaowa.

⁷Athum khalattawui tui kala khiwui apongli khamatuikhala kaji matheilaga Varewui ain tamkachitheia mi sāngai.

⁸Ithumna thei kaja ain hi mathada singakha phai.

⁹Hi mamalaiphalungmara, kaja ain hi kaphā mibingwui vang kasā maningmana, kha ain sākakhaibing, kahāng makhanganābing, Vareli makathei, morei kaphungabing, dharma lah manglārin makhalei, ava̱ avāli shaokathatbing, mi sākathatbing,

¹⁰shuikhangaruibing, khamathang-khamarangbing, khalee-kasa̱bing, kapiklaga minama shākhi khamibing lah khamashunga tamkachitheili masho-ngachei khangasakbingwui vangna.

¹¹Tamkachithei chi tekhamatei kala sokhame Varewui eina kharā, chi chishāt khavai ili horsangmi kahai paokaphāli samphanga.

¹²Ili ot sākhavai pangshap khame ithumwui Proho Khrista Jishuli ningshi. Kānārada khuimida awui otram ngatha̱ khavai ili kapangkhuikhamiwui vang ningshiya;

¹³khareli ina ali mashāta, rekhareka, kala chipata. Kha Varena ili lumashanmi kaja I mashitsangmana, chieina ina kasā chi I matheisamana.

¹⁴Khrista Jishuwui lungli khalei shitkasang kala leikashi eina ngasoda ithumwui Prohowui lukhamashan chi iwuitungli mavātlakla heirormi.

¹⁵Hi khuisangkapai kala shitsangkapai khamashunga chānjamna. Khrista Jishuna morei kaphungbingli huimi khavai okathuili rai. Chiwui ngachaili I morei phungmeikapa.

¹⁶Kha naoda kateibingna ali shitsangda makashimān mirin samphang khavaiwui ngayoyan sāda Khrista Jishuwui kākashung ja̱khami chiwui eina theikhui khavai Varena ili lumashankhamina.

¹⁷Kathi makhangavā, mik eina matheikharar, thot kachida awunga sāda khalei akhamāng kaje Vareli katang mavaila khayāshiranu, kala tekmateiranu. Amen.

¹⁸Inaomayara Timothy, nawui maramli hāngkahai marāntui chiwui athishurda ningkhami hi ina nali horsangkhamina. Nana mathāmeida ngararpai khavai tuibing chi raisāri sāda shichinlu.

¹⁹Kala nawui shitkasang eina mashun-makhui chi tharzā eina haipaira. Kachikathāna mashun-makhui chi manganāsangthuda athumwui shitkasang chi arema ngasā ngasakhaira.

²⁰Athumwui ngachaili ina tandi khami sāda Satanwui pāngli horsangmi kahai chili Hymenaeus eina Alexanderla zanga. Hi athum kachipat tui mamatuilui khavai tamkhui khavaina.