Read Tangkhul Naga 2 TIMOTHY 1 Bible Online

2 TIMOTHY 1 - Tangkhul Naga bible

2 TIMOTHY 1

¹Khrista Jishuli ngarumhaoda ithumna samkaphanga ngashitmi kahai mirin chi hāshok khavai Varena mayāda Khrista Jishuwui paokazata Paul ina;

²khaluma inaomayara Timothyli kagapina. Avāva̱ Varivara, kala ithumwui Proho Khrista Jishuna nali lukhamashan, phaningkhami kala chingri kahai miranu.

³Ishawo-ishayi ngarāwui thada mashun-makhui tharlak kahai eina ina Vareli otram khangatha̱wui vang ali ningshi. Kala ngashun ngayā mateila seihā kasā kachiva̱li nali phaningungda ningshi.

⁴Nawui chāra̱ katā chi phaningungda ning tāphuphai khavai nali samphangngailak eina lei.

⁵Nashāyi Lois eina nashāva̱ Eunicewui shitkasang katha nawui ningkathar shitkasang chi ina phaningunga kala chi nali leichingrada shitsangchaowa.

⁶Ina pāng parda seihā sākhami tharan Varena nali lemmet mikahai chi leiching khavai phaningung khangasakna.

⁷Kaja Varena ithumli ngacheekazarwui manglā mamihaimana, kha pangshapwui, leikashiwui kala khalatta ngarinkashapwui manglā chi mi.

⁸Chieina Prohowui vang shākhi kasāli makhayakalu; awui vang phātop kazanga iwui vangla makhayakalu. Kha Varena pangshap mikahai athishurda paokaphāwui vang kachot phungrumlu.

⁹Varena ithumli huimi kala a khalattawui mibing ngasā khavai hokhuihaira. Hi ithumwui kaphā otsakwui vang maningmana, kha awui lukhamashan kala kharin chiwui vangna.

¹⁰Ara ithumwui huikhame kharā eina phongmihaira. Ana kathiwui pangshap shimān ngasakhaira kala paokaphāwui mangā eina makathi mirin chi phongmihaira.

¹¹Paokaphā hi hāshok khavai kala tamchithei khavai Varena ili kapangkhui.

¹²Chiwui vang eina ina kakhanang ringkashi hi samkaphangna. Kaja ina khipāli shitsanghairakhala kaji nathumna thei, kala zimiksho chi maungshungranglakha eina tangda ana ili chisin kahai chi ana mayonmishapa da ina theishingkhuihaira.

¹³Nawui vang shurpai khavai ngayoyan thada ina tamchithei kahai khamashung tui chi singtitlu, kala Khrista Jishuwuili khalei shitkasang kala leikashi chili leichinglu.

¹⁴Ithumwui wuklungli khalei Manglā Kathara chi eina nali chisin kahai chi mayonlu.

¹⁵Asiali khalei mi kachiva̱ iwui eina mai ngareithuihaira kaji nana thei. Athumwui ngachaili Phygelus eina Hermogenesla zanga.

¹⁶Prohona Onesiphoruswui shimkhurli lumashanmiranu, kaja ana iwui kachot vānngasakchinga.

¹⁷Kaja ana Romeli rāshungkhaleoda ili masamphangranglakha eina tangda phāshang phatai.

¹⁸Khanaowa zimiksholi Prohowui phaningkhami awuitungli tāshungmiranu. Ephesusli leilakha ana iwui vang kayākha samikhala kaji nanala katheina.