Read Tangkhul Naga 2 TIMOTHY 2 Bible Online

2 TIMOTHY 2 - Tangkhul Naga bible

2 TIMOTHY 2

¹Chiwui vang eina inaomayara, Khrista Jishuli zangda samkaphang lukhamashan chiwui alungli kapinga ngasālu,

²kala shākhi kachungkhawui mangāli iwui eina shākahahai chi mi khangateibinglila tamchitheishapki kaje shitsangkapaia mibingli chisinlu.

³Khrista Jishuwui kaphā raimi akha sāda kachotkachāng phunglu.

⁴Akhavāli ningyāng ungngasaki kaji raimi khipānakha yarui ashangva̱wui mirin maphāzatmana.

⁵Khangareoa china ayinwui athishurda mangahanakha sāman masamphangmara.

⁶Heithei hātkhare samphangkhangayia chi ot panglāk eina kasaa luikhavā mi china.

⁷Ina nali kahāng hi phaningkazaklu, khikhalajila chi Prohona nali bhap tāngasakra.

⁸Ina paokaphā hākashokli tamkachithei kathiwui eina ringshok kahaia kala Davidwui naotun Jishu Khristali phaningunglu.

⁹Paokaphā hākashokwui vang ina kachotkachāng phunga kala yomnao thada marikhanghui sanga. Kha Varewui tui chiya manarhaipaimana.

¹⁰Chiwui vang eina kapangkhui kahaibingna katang makhavai tekhamatei eina ngasoda Khrista Jishuwuili huikhami chi samphangpai khavai ina ot saikorali kakhāngna.

¹¹Hi khamashunga chānsam tuina: “Ithum ali thirumakha, ithumnala ali ringrumra.

¹²Ithumna khāngakha, ithumla ali ngasoda mungra. Ithumna ali mamayākha ithumlila ana mamayāmara.

¹³Ithumna maningtonglala, ava ningtongchinga. kaja ava akhalatta maminamana.”

¹⁴Prohowui mangāli makankhanā tui mangayāt ngarok khavai athumli phaningung ngasaklu kala hāngmachinlu. Chiwui kaphā khikha maleimana, kha khanganābingli shimān ngasaka.

¹⁵Varewui pao mashungrik eina tamkachitheia akha sāda nawui otwui vang makhayakla Varewui miktāli tongchaoda mayākhami samphang khavai sālu.

¹⁶Mibingli Varewui eina yāmkhangasaka kachipat ngaphat-ngayātli mazangalu.

¹⁷Athumwui tamkachithei chi aphili kakazā kazātyur kathāna. Hymenaeus eina Philetus ani khani hi chikathā tamkachithei mina.

¹⁸Anina ringkhalui hi maleimana da tamchitheilaga mibingli mashongachei ngasakta khamashungwui eina lachāthuihaowa.

¹⁹Kha Varewui khangazipa shimphunga chi mangachei ngasakrarmana, kala chiwuitungli hithada kapihaida lei: “Prohona awui mibingli thei kala Prohowui mina kajibing chi makhamashungwui eina latungphalungra.”

²⁰Shim kahaka akhali lupāsā eina sināwui khorkhongmāng maleimana, kha ngaleiwuila, thingwuila lei kala kaikhava saklak eina shichin khavaina, khangatei kaikhava ichamchamlak eina shichinna.

²¹Kachikathā mina makaphāwui eina akhalatta tharngasakhaiakha, kasaka otwui vang shichinra, kaja khamathā ot sākhavai awui akhavāli chigat kahaina.

²²Yaron ngalāwui khamathang chi horhaida ningkathar eina Proholi khangakao mibingli ngasoda khamashung khangarong, shitkasang, leikashi kala chingri kahai phālu.

²³Mangkhama̱ kala ning makhaleiwui ngaphat-ngayāt chili mazangalu. Hikathā eina naoda kakharar shoka kaji nala thei.

²⁴Prohowui otram khangatha̱ miva makharar ngarokphalungmara, kha mi saikorali lumashankatha, kaphākasā, kala khāngkathei ojā ngasāphalungra.

²⁵Yangkashebingli kaphā eina mashungkakhui ngasāphalungra. Chithākha Varena athumli ningngatei ngasakta khamashung theikhui ngasakpai.

²⁶Chieina athumna ning phākhuida, chipeena rao sākhavai tuknar kahaiwui eina athum yāmshokpaira.