Read Tangkhul Naga 2 TIMOTHY 4 Bible Online

2 TIMOTHY 4 - Tangkhul Naga bible

2 TIMOTHY 4

¹Kharingabinglila, kathebinglila bichar sāki kaje Vare kala Khrista Jishuwui miktāli kala ana Awunga sāda rāmungki jihaoda ina nali hi saklak eina kapona.

²Tui chi hāshoklu, kumkashok kumkazang mayangalu, theikhui ngasaklu, machinlu, katomlu, ningzingharingda tamkachithei machokchaihailu.

³Mibingna khamashung tamkachitheili mahengsangla athum khalattawui ningkachāngli kashur kala nganākhangai hāngkachithei ojābing kachungkha chili kharomkazat atam rāra.

⁴Khamashungli manganāsangla hāngkhanganao khararchānli ningchāngmeira.

⁵Kha nava ngarakzak eina sālu, kachotkachāng khānglu. Evangelist akhana sāran ot chi sālu, kala Varewui otram khangatha̱ akha sāda nana sāran ot chi ungshung ngasaklu.

⁶Iwui vanga ili shaothatki kaji atam nganailakhaira, kala iwui kapāng atam rāhaira.

⁷Ina kaphā khangarar chi ngararhaira, yongki kaji chi yonghaira, kala shitkasang chi ina mayonhaira.

⁸Chithang Zimiksho khangaronga mashunwona, imāngli maningla kha leikashi eina ngasoda ali khangaraibing saikorali miki kaji khamashung khangarongwui wungkuihon china ili ngaraili.

⁹Iwuili thākta rākhavai kashap eina tangda ngarānlu.

¹⁰Demasna aruihonwui okathuili leishimeihaoda ili chihohailaga Thessalonicali vāhaira. Crescensla Galatiali vāhaira kala Titusna Dalmatiali vāhaira.

¹¹Lukemāngna ili ngasopamda lei. Markli ngasorālu, ana iwui ot kasāli ngachonshapra.

¹²Tychicusli ina Ephesusli chihovāhaira.

¹³Troasli ina Carpuswui pāngli haimi kahai kachon eina lairikbing, matailak eina sāhui eina sākahaibing chi na kharā atamli khuirāmilu.

¹⁴Mari kasā Alexanderna ili zakshilāk eina sai. Awui otsak chiwui vang Prohona sāman miranu.

¹⁵Ali ngasharlu, kaja ithumwui paokaphā hili ana panglāk eina yeta.

¹⁶Ina I khalattawui vang phayetkharethang iwui vang nganingmi khavai mi khipākha maleisāmana, saikorana nothāhaowa.

¹⁷Kha Prohona nganingmi kala ili pangshapla mi. Chieina Gentilebing saikorana nganāsang khavai paokaphā chi ina hāshokshaphaowa; a kala ili shaothat khavai khak tāki kaji chiwui eina kanshokmi.

¹⁸Prohona makaphā kachiva̱wui eina kanshokmida awui zingwungramli thānzangmira. Ishamei ali mashimānda tekmateichingranu. Amen.

¹⁹Priscilla eina Aquilali kala Onesiphoruswui shimkhurli shālam chiphunli.

²⁰Erastusna Corinthli pamhaowa. Trophimus kazāhaoda ali ina Miletusli nothāhaowa.

²¹Kashap eina tangda si marāranglakha rākhavai hotnālu. Eubulusna nali shālam mili; Pudens, Linus, Claudia kala ichinā ngarā saikoranala shālam chiphunli.

²²Prohona nawui manglāli ngasomiranu. Varewui lukhamashan nathum saikorali ngasomiranu.