Read Tangkhul Naga PHILEMON 1 Bible Online

PHILEMON 1 - Tangkhul Naga bible

PHILEMON 1

¹Khrista Jishuwui vang eina phātop kazanga Paul kala ivānao Timothy inina ithumwui ngasota kala otsakruma Philemon;

²nawui shimli kazip khangaruma churchwui mibing, izara̱ Apphia kala Khristawui raimi sākhangaruma Archipusli kagapina.

³ Ithumwui Avā Varivara kala Proho Jishu Khristana nathumli lukhamashan kala chingri kahai miranu.

⁴ Iwui seihā kasā kachiva̱li nali phaningungchinga, kala Vareli ningkashi michinga.

⁵Kaja Proho Jishuli nawui shitkasang kala katharabing saikorali nawui leikashi pao ina shāhaira.

⁶Shitkasangabing thada nali ot sākhangarum hina Khristali ithum ringrumda sokhami samphangda khalei chi thukmeida theikhuipaira kaji hi iwui seihā kasāna.

⁷Leikashiya ivānao, nawui leikashi china ili tarākha khamathān kala kakatom miya, kaja shitkasangbing saikorali nana ning ringphā ngasakhaowa.

⁸Chiwui vang eina Khristawui alungli nachinā akha sāda, sāki kaji chi sākhavai nali kakasoli pingshapa.

⁹Chithālala leikashiwui mangā eina Khristawui mathun akha sāda kala awui vang eina arui phātopli narkahaia, Paul ina nali makasola kapona.

¹⁰ Khristawui lungli inaomayara ngasā kahaia Onesimuswui mahut eina ina kapona kaja phātopli leilakha I awui manglāwui avāva̱ sākahaina.

¹¹Khareli nawui vang makannāsāmana, kha ara nawui vangla, iwui vangla kānnai.

¹²Ali nawuili chihorāluishitli; iwui ningkatongla zanga.

¹³Paokaphāwui vang eina I phātopli leilakha nawui mahut sāda ili otram ngatha̱mi khavai ali ngasopamngai.

¹⁴Kha ili ngachonmi khavai nali tandi masāngaimana; nawui ningkatong chi eina vaingasakngai. Chieina nana mayākhami maningla ina khikhikhala masālakmara.

¹⁵Nana ali ngasopamchingpai khavai atam kasha̱khawui vang Onesimusna nawui eina thuikahailapai.

¹⁶Ara a hi raona jilala raoli mataimeikhārda Khristawui lungli leikashe chinaongarā akha sāhaira. Iwui vanga a hi aman saklaka. Kala Prohowui lungli rao kala chinaongarā akha sāda a hi nawui vang aman kayākha sakmataimeirakhala!

¹⁷Chiwui vang eina ili nawui ot sākhangaruma akhana da phaningakha ili nana samphangkhuiki kaji thada ali samphangkhuimilu.

¹⁸Nali khayon sahaisālala kala leiman zangsālala chi ina runra.

¹⁹Paul ina ipāng eina hi kagapina, Ina runra—naphasā, namanglā tongda ili leiman zanga kaji kahāng maningmana.

²⁰Chieina ivānao, Prohowuilungli nawui eina khangachon hi samphang ngasakmilu. Ining ringphā ngasakmilu.

²¹Nawui kahāng khanganāli shitsangda, ina kapoli lāngmeida samilakra kaji theida ina hi kagapina.

²²Chili lāngda iwui vang shim kā akha ngarānmihaisalu, kaja nathumwui seihā kasā ngahānkāmida Varena nathumwuili rālui ngasakra kajiwui kachihān lei.

²³Khrista Jishuwui vang ili ngasoda phātop zangkhangaruma, Epaphrasna shālam mili

²⁴ Kala ili ot sakhangarumbing, Mark, Aristachus, Demas kala Luke longnala shālam chiphunli.

²⁵Proho Jishu Khristawui lukhamashan chi nathumli ngasomiranu.