Read Tangkhul Naga HEBREWNAO 1 Bible Online

HEBREWNAO 1 - Tangkhul Naga bible

HEBREWNAO 1

¹Achālakha awo ayibingli Varena kachungkha shida matuiya kala apong kachungkha eina marānbingli shichinda hāngmi.

²Kha khanaowa atam hiliva Naomayarali shichinda ithumli hāngmihaira. Apuk-apaga hi awui mangā eina sai kala ot saikora awui sāngasaka.

³Anaona Varewui tekhamateiwui kahān chi hāna kala Varewui azak tākamhai. Awui tui china apuk-apaga hi ringkhangasakna. Mikumowui morei pheokhami samphang kahaiwui thili, ana kazingramli Reikhamatai Varewui yāshong pama.

⁴Varena Anaomayarali khami aming china kazingraobingwui amingli reikhamei thada athumli Anaomayara reimeida sākahaina.

⁵ Kaja Varena kazingrao khipāli, “Na Inaomayarana; ina nali aja pharākhuihaira” jikhala? Lha kazingrao khipākhawui vang “I awui Avāva̱ sāra, a iwui Naomayara sāra” da hāngkhala?

⁶ Varena awui naochizai Naomayarali okathuili chihokharā tharan hithada hānga, “Varewui kazingrao saikorana ali khorumranu”

⁷ Kazingraobingwui pongli ana hānga. “Varena awui kazingraobingli masi sāngasaka, kala awui raobingli meiwon sāngasaka.”

⁸ Kha Anaomayarawui pongli hithada hānga. “He Varivara! nawui wungpamkhong mashimānda leichingra! Nawui mibingli nana mashun eina mungra.

⁹Nana khamashungli leishi kala khanguili ningkachai. Chiwui vang eina Vare, nawui Varena nawui ngasotnaobingli lāngmeikharda ringkaphāwui thao chi nali neomihaira.”

¹⁰ Kala “Proho! haophokkhareli nana okathui sākhui, kala kazingramla napāngthem otsakna.

¹¹Saikora chi shimānserhaora, kha na leichingra; athum saikora kachon thada chamserhaora.

¹²Katuma phahon thada nana khaluikhuihaora, kala chibing chi ngacheikhuihaora, kha nava chichingra, kala atam zingkum kakum mavaimara.”

¹³ Kha kazingrao khipālikha ana “Iwui yāshong pamlu, yangkashibingli nawui pheinai masā ngasakranglakha eina tangda” da mahānglakmana.

¹⁴Athum hi kahui samphangki kaje athumli otram ngatha̱mi khavai chihorā kahai sheba sāme manglābing maningmala? Kala huimiki kajibingli ngachonmi khavai chihokharā manglā maningmala?