Read Tangkhul Naga HEBREWNAO 10 Bible Online

HEBREWNAO 10 - Tangkhul Naga bible

HEBREWNAO 10

¹Ain hiya akachanga chiwui kākashung kala khangazip maong maningmana, hiya rāki kaji khamathā otbing chiwui aka̱lāna. Ngaraikachā pha̱kaphayā chi katang mavaila kumshirinda rāchigatchinga, chithākha hithada kachigatwui vang ainna kathada Vareli zangkida kharābingli kāshung ngasakpairakhala?

²Vareli khokharumbingli moreiwui eina tharmikachanga jisi kaja moreiwui khayon chi athumwui ningli maleiluimara kala pha̱kaphayāla maleiluimara.

³Kha kumshirinda pha̱kaphayā kasā hina athumwui morei phaningungching ngasaka.

⁴Seishee, mesheena morei mapheorarlakmana.

⁵ Chiwui vang eina Khristana okathuili rānanai ana Vareli hānga. “Pha̱kaphayā kala kachigat nana maningchāngmana, kha nana ili phasā phonmihaira.

⁶Rikkatā kachigat kala moreiwui vang kachigatli nana ningyāng khaung maleimana.

⁷Chieina ina hānga, O Varivara, nawui kaphaning sākida, I hili lei, lairik khalui chili iwui pongli kapi kahai thada.”

⁸Rimeikapta ana hānga: “Pha̱kaphayālapai, kachigatlapai lha hanphutli sha̱kei rikkatālapai kala morei sonthui khavai pha̱kaphayālapai, chili nawui ningkachāng kala ningyāngkhaung maleimana.” (Pha̱kaphayā saikora hi ainwui athishurda kachigatna kaji thatheilaga ana chi kahāngna.)

⁹Chieina ana hānga, “Nawui kaphaning sākida I hili lei, he Varivara” Chieina kachama pha̱kaphayā chi shimān ngasakhailaga Khristawui pha̱kaphayā chi mi.

¹⁰Chiwui vang eina Varena ningkachāng chi Jishu Khristana kasāwui vang awui phasā akhashi chigatkhami china morei tharmida kupchaohaira.

¹¹Jehudiwui pāngmon kachiva̱na thangkachida awui sākhangayi otram khangatha̱ ot chi sai kala ngaraikachā pha̱kaphayā chi kachungkhashida pha̱phayai; kha china morei makhuithuirarlakmana.

¹² Kha Khristana moreiwui vang katang makhavaiwui pha̱kaphayā akhashi chigatmihailaga Varewui yāshong pamhaowa.

¹³Ara ana chili, awui yangkashebingli Varena awui pheinai masā ngasakranglakha eina tangda ngaraipamda lei.

¹⁴Morei tharmi kahaibingli akhashida pha̱phayāmi kahai china kāshung ngasakhaira.

¹⁵Manglā Katharanala ithumli awui shākhi mi. Rimeikapta ana hānga.

¹⁶ “Rārāda khalei atamli ina athumli tuingashit sāki kaji chi hina da Prohona hānga: Ina iwui ainbing hi athumwui wuklungli sangmira. Kala chi athumwui ningli kapisangmira.”

¹⁷Chiwui thili ana hānglui, “Ina athumwui khayon kala moreila maphaningungmiluimara.”

¹⁸Saikora hi pheomihaiakha moreiwui vang kachigat che masāvailuimana.

¹⁹Chiwui vang eina ivānaongarā, Jishuna thimi kahaiwui vang Tharmathengmeikap kaji Apamli ithumla zangpaihaira.

²⁰Rānkham kahai kachon—chiya aphasāwui mangā eina ithumwui vang kadhara kala kharinga shongfa ana shomihaira.

²¹Varewui shim khamayona ithumwui kahaka pāngmon akha leihaira.

²²Chieina ningkathar kala makhangapat shitkasang eina kala khayona chukkhamaja̱wui eina tharmi kahai wuklung eina ngasoda tara̱ kathar eina phasāla ra̱vaihaida ithum Vareli nganaimeisa.

²³Ithumna kachihān chili singtitsa, kaja ngashit khame a chiya ningtonglaka.

²⁴Akhana akhali ningngaishida kaphā ot sākhami, leikashi chithei khavai ngachon ngaroksa.

²⁵Mi kaikhana kasā thada masāla ithumva mamalaihaila kazipngarumchingsa. Kala akha eina akha mataimeida kasatsang ngaroksa kaja Prohowui Zimiksho chi rānganaihaira kaji nathumna mik eina thei.

²⁶Khamashung kaho chi theikahaiwui thili, sāphalungra da morei sāchingakha moreiwui vang pha̱kaphayā maleiluimana.

²⁷ Kha taikahai saikorana, rāki kaji bichar kala Vareli ngakaikashebing saikorali mei eina shimān ngasaki kaji chili khangachee eina ngaraira.

²⁸ Moseswui Ain makhanganā mi kachiva̱li, mi khani lah kathumna shākhi mihaiakha, lukhamashan maleila shaothata.

²⁹ Chithākha Varewui naomayarali makachāpa, moreiwui eina tharmi kahai Varewui tuingashitwui asheeli paisor eina kaphaninga mi, lukhamashanwui Manglāli mana̱kashe mi chi khi ngasāra? Awui tandi kayākha sakmeirakhala da phaningyanglu!

³⁰ “Athut kakhui chi iwuina; ina hāngsangmira,” da kahāngapa chili ithumna thei; kala hithadala hānga, “Prohona awui mibingli bichar sāra” da kahāngpa chi thei.

³¹Kharinga Varewui pāngli tākazang hiya khangachee khangacham otna.

³²Nathumna Varewui kahor samphang kahai chiwui thili kachot kachungkha samphanglala maikashi masamphanglak kaji atam chi phaningunglu.

³³Mararakli yarui mangāli khayak ngasaka, zakshilāk einala sai. Mararakliva rekakharek samkaphangbingli ot sakruma.

³⁴Phātop kazangbingli nathumna chotruma, kala nathumwui ot ngapaithuihailala kashimān chiwui vang ringphai, kaja makashimān kala phākhamei lan ngarānhaida lei kaji nathumna thei.

³⁵Chiwui vang eina nathumwui ning khanganung masuitāhaialu, khamataia sāman samphangra.

³⁶Varewui ningkachāng athishurda sākhavai kala ana ngashit kahai chi samphang khavai nathum khāngthei khavai sālu.

³⁷ Kaja hithada kathara Lairikli kapihaida lei. “Kasha̱khawui thili rāki kaje chi rāra; masāngmara.

³⁸Iwui khangaronga china shitkasang eina ringra, kha ana ngalanakha, awuitungli iwui kapen maleimana.”

³⁹Ithum ngalanthui kahaia kala shimān kahai yur maningmana; kha shitsangda huimi kahai yurna.