Read Tangkhul Naga HEBREWNAO 11 Bible Online

HEBREWNAO 11 - Tangkhul Naga bible

HEBREWNAO 11

¹Mik eina matheiranglala samphanglakra da ningnganungda chihantit kaji hi shitkasangna.

²Achālakhawui mibingna shitkasang mangā eina Varewui khamayā samphanga.

³Shitkasang mangā eina ithumna theishingkhui kaja apuk-apagva̱̱ hi Varewui tui eina sākhui. Chieina theikapai otbing hi mik eina matheikhararra chiwui eina sākakhuina.

⁴ Abelna Cainli mathāmeida Vareli pha̱kaphayā chigatkashap hi shitkasang mangā einana. Shitkasang mangā eina mi akha sāda ana Varewui mayākhami chi samphanga, khikhalajila awui kachigat chi Varena khuisangmi. Abel thihaisālala awui shitkasang otsak china aruila ithumli matuichingda lei.

⁵ Shitkasang mangā eina kathi kaho mathei khavai Enochli Varena khuikāhaowa. Varena khuikāhaoda khipākhana ali masamphangluithuwa. Ali makhuikāranglakha ana Vareli ningyāng ungngasakhairasai da Kathara Lairikli hānghai.

⁶Shitkasang maleila khipānakha Vareli ningyāng maung ngasakrarmana. Vareli kharā mi chiya Vare lei kala ali kaphā mili sāman mira kaji shitkasang leiphalungra.

⁷ Mik eina matheikharar naoda shokki kaji Varena hāngkhamathin tharan Noahna nganākasang chi shitkasang mangā einana. Varewui kahāng nganāda ashi shimkhurli huikakhuiya marikhong chi sākhui. Chiwui atheiva, okathuili khayon mihailaga shitkasang mangā eina kharā khamashung khangarong chi ana Varewui eina samphanga.

⁸ Shitkasang mangā eina Abrahamna Varewui kaho nganāda ngashit kahai ngalei chi samphang khavai, ana kali vānikhala kaji matheila zata,

⁹shitkasang mangā eina ana Varena ngashitmi kahai ngalei chili ayarwui mi thada asoma, Varewui ngaraikachā ngashitkhami samkaphanga Isaac eina Jacob thada ala kachonshimli okthui.

¹⁰Kaja Varena sakakā kala semkhami shimphung khalei keinung chiwui vang ana honchinga.

¹¹ Sarahna naothei chathailala, ali ngashitkhame chi mangapatmana da shitkasangwui vang nao khavaiwui pangshap samphanga.

¹² Chieina kathi eina ngaraichā kahaia mi akhawui eina ara̱-azā kazingramwui sirā kala shamadrupheiwui situi ngayāda shoka.

¹³ Mibing hi shitkasangwui alungli thisera. Varena ngashit kahai athum masamphangmana, kha katāva̱wui eina ngashāntheida ringphai kala okathuili athum hi kha̱mi kala yāmkazatabingna kaji mayai.

¹⁴Hikatha kahāngabing hiya ramsom phākazatna da tharzā eina chithei.

¹⁵Athumna chiho kahai ram chili maphaningshonmana, phaningungsi kaja athum latungluilapai.

¹⁶ Kha athumna phākhamei ram, kazingramwui ramsom ningchānga. Chiwui vang eina athumna Vareli athumwui Vare kaho hili makhayakmana; kaja athumwui vang ana keinung akha ngarānmihaira.

¹⁷ Chāng khayang tharan shitkasang mangā eina Abrahamna Isaacli pha̱phayā khavai chigata kala ngashit kahai samkaphanga a china akhamāng kaje anaomayarali chigatkida mangangmana.

¹⁸ Awui pongli hithada hānghai, “Isaacwui eina nawui ara̱-azā tarākha shokngasakra.”

¹⁹Varena Isaacli kathiwui eina ringngasakluishapa da Abrahamna shitsanga, kala kachangda Isaacli thiki kajiwui eina samphangkhuilui.

²⁰ Shitkasang mangā eina Isaacna Jacob eina Esauli shokki kajiwui vang somi.

²¹ Shitkasang mangā eina athitlam Jacobna awui khāmshui ngazunglaga Vareli khorumda Josephwui nao kachiva̱li somi.

²² Shitkasang mangā eina Josephna thinanai, Israelnaobingna Egyptwui eina yāmshokki kaji tui hāngmi, kala ali chifaki kajiwui ponglila hāngsera.

²³ Shitkasang mangā eina Moseswui ava̱ eina avāva̱na ali pharā kahai thili kachāng kathum thumhai. Khikhalajila nao chi ichamchama nao maningmana da anina thei, chiwui vang eina awungawui hukhumlila khangachee maleimana.

²⁴ Shitkasang mangā eina Mosesna kharar chitharan Pharaohwui naongalāva̱wui naona da maho ngasakngaithuwa.

²⁵Moreilungli kasha̱kha ringphāki kajiwui vanga Varewui mibingli ngasoda kakhanang kaphung ana ningchāngmei.

²⁶Egyptwui lan saikorale Messiahwui vang maikashi phāmeikhāra da ana theikhui; kaja naoda samphangki kaji sāman chimāngli yanga.

²⁷ Shitkasang mangā eina Mosesna awungawui malungkhavātli mangacheela Egypt chihohai; mik eina matheikharar Vareli mik eina kathei tākam eina, ana masa̱naungmana.

²⁸ Shitkasang mangā eina ana Makānkhami Phanit mayonda khāmongli ashee ikror ngasaka. Chieina kathewui kazingraona Israelwui naochizaibingli masāthatmana.

²⁹ Shitkasang mangā eina Israelnaobingna Red Sea kaho ngayi chi ngalei katheng kakān thada kāna; kha Egyptnaobingna kakān tharan tara̱li hikthatserhaowa.

³⁰ Shitkasang mangā eina Israelnaobingna Jericholi shinithang kakui eina chiwui phākho minkhaihaowa.

³¹ Shitkasang mangā eina khayorva̱ Rahabna Vareli ngakai kashebingli ngasoda kathili mazangmana, kaja ana rairui kazata khanili zunkhui ngasaka.

³² Chili lāngda khi hāngra? Gideon, Barak, Samson, Jeptha, David, Samuel kala marānbingwui tui hāngser khavai atam maleimana.

³³ Shitkasang mangā eina athumna khangarar apam kachida wungram yuikhuiya, mashun sāngasaka, ngashitmi kahai samphanga, kazingkha̱ khamor khalapmi,

³⁴khamalinga mei shimitmi, raighaiwui eina nganaishoka, khangazanwui eina pangshap samphanga, raili pingshuna, ayar ngaleiwui raimili kashamshapa.

³⁵Shitkasang preinaobingna thikahaiya athei-asābing kharing eina samphangluishita. Phākhamei mirin ringshok khavai kaikhava ningkakhān maningchāngmada rekakharek kachotkachāng phunga.

³⁶Kaikhali mana̱shida kashaola shaowa; khangatei kaikhali pheipāng khalaplaga phātop sanga.

³⁷Athumli ngalung eina horthata, ngahunpattala hātkhai, raikhai einala yorthata. Athumna mehui, yaohui ngahonda okthui kala kachām-khangai rekakharek mirin kala kachotkachāng phunga.

³⁸Okathui hi athumwui vang khikha makannāthuwa! Yāmkazatbing thada athumna kaphungli, khangaili, lungkhur thingkhurli ngayinzata.

³⁹Shitkasang mangā eina athumna kayākha khamathā ot sāchitheihairakhala? Chithālala Varena ngashitmi kahai chi athum masamphangmana,

⁴⁰khikhalajila ithumwui vang mathākhamei akha ngarānmihaira, chiya ithum mazangla athummāngli kāshungchao kahai chi masamphang ngasakmara.