Read Tangkhul Naga HEBREWNAO 12 Bible Online

HEBREWNAO 12 - Tangkhul Naga bible

HEBREWNAO 12

¹Chiwui vang eina ithumwui vanga kuimareida khayanga shākhi kachungkha leihaoda, hapkakhano saikora kala ngathānshang ngathāntā da khalei morei chi hortāhailaga ithumwui shongzā khangakhui chili makhunlak eina zatsa.

² Haokaphok eina thuilaga akatang eina tangda ithumwui shitkasang phumhaiki kaja Jishuli yangchingsa. Ana krushli ngacheeda mayāmmana! Kha ali ngaraida khalei khamathān chiwui vang, krushtungli kathiwui maishātli ana khikha mahengsangmimana, kala ara Varewui wungpamkhong yāshong pamda lei.

³Morei kaphungbingna ali kaphen chi ana kathada khāngmikhala kaji phaninglu. Chithākha nathum malungkharing kala ning suikatā maleimara.

⁴Kaja moreili khangararwui vang nathumli shaokathat mashokrangli.

⁵ Varena awui nao thada malung pingkhavai kahāng chi malaihairala? “Inaomayara, Prohona hāngkhamachinli paisor eina makhuialu, kakharar tharan ning masuitālu.

⁶Prohona leikashe mili rākka kala anaomayarana da khuikasanga kachiva̱li tandi mi.”

⁷Avāva̱wui tandi khamiwui kachot chi khānglu; nathumwui kakhanang china nathum Varewui naobingna kaji chi theira. Avāva̱na tandi makhami nao khipā leikhala?

⁸Naongarā saikorali khamachin thada nathumli mamachinakha awui nao akachangbing maningmana.

⁹Okathui avāva̱ ngarāwuishong jiakha athumna ithumli machina kala ithumna athumli khayāshi. Chithākha Manglāwui avāva̱li kayākha sakmeida khayākashi eina ngasoda ringrakhala?

¹⁰Phasāwui avāva̱ ngarāna athumwui ningkachāng athishurda kasha̱khawui vang ithumli machina. Kha Varena awui kathar chili zangkhavai ithumwui kaphāwui vang machinmi.

¹¹Kasha̱khawui vang machinkhami saikora hi ringkaphā maningla kakhanangmāng thai, kha naodava, machinkhami eina kharāk samkaphangbing china khamashung khangarongwui chingri kahai athei samphanga.

¹² Chieina chiwut kahai napāng katingkālu kala nganukzok kahai napheikhuk pangkā ngasaklu!

¹³ Khangatar shongfali zatlu, chithākha khangasong phei chi masheishimara, honda kharai samphangra.

¹⁴Mi kachiva̱li chingri eina ngasopamda kathar eina okthuilu, chi maningakha Proholi khipākha kathei masamphangmara.

¹⁵ Varewui lukhamashanwui eina khipākha mangareithui khavai ngasharlu, khipākha kakhā thing kaphor thada chiwui hu eina yaruili makhonzār ngasakalu.

¹⁶ Khipākha khongkhai akhawui vang eina khararpam yorzākahaia khamathang-khamarang kala shitkasang makhalei Esau kathā mangasaalu.

¹⁷ Nathumna thei kaja naoda ana avāva̱wui sokhami chi ningchāngda samphanglui khavai phālala ali khalanhaowa, kaja ana chāra̱ tāda kahaolala ningngatei khavai atam masamphangluimana.

¹⁸ Israelnaobingwui thada nathumna sāza̱kapai Sinai kaphungwui mei, tangkhamang, khangami, siphan zingrot,

¹⁹talla̱khon kala tuikhon chili kharā maningmana. Mibingna khamatui akhon chi maningla khangatei mashā ngasak khavai poi.

²⁰ Kaja “Sāyur eina tangda kaphung chili sākaza̱a chili lunggui eina horthata” da kakaso chi manganārarmana.

²¹ Katheimāngla ngacheenāhaida Mosesna hānga, “Ina ngacheenāhaida kathira,”

²²Kha nathumna Zion kaphungli kala kharinga Varewui keinung, kazingramwui Jerusalemli, kazingrao thingthingna lumlaoda kakazip,

²³kazingramli aming kapi kahaia naochizaibingwui kazip kala saikorawui bicharwo Vare, kāshung kahaia khamashungbingwui manglā,

²⁴ kadhara tuingashitwui tuisak sāme Jishu, kala Abelwui asheeli mataimeida lukhamashan tui khamatuia ikror kahai ashee chili lāngmeida phākhamei ngashitkhami chili rāhaira.

²⁵ Chiwui vang eina ngasharlu, matuida khalei tui chi makhuikasang masaalu. Okathuili tharkhamatheng tui hāngkhami chili makhuikasang athum chi mayāmshokrarthuwa. Chithaakha kazingramwui eina khamatuia chiwui eina yāmshokkida kayākha sakrakhala?

²⁶ Chitharan awui akhon china okathui nganuk ngasaka, kha ara ana ngashitmihaira, “Okathuimāng maningla, kazingramla zangda ina akhashida nganuk ngasakfara.”

²⁷“Akha shida” kaji tui china tharlak eina theikhuiya kaja sākahaiya ot saikora khanukshimitserhaora, laga makhangatha̱ chimāng leimara kajina.

²⁸Makhangatha̱ wungram ithumna samkaphangwui vang ningshisa. Varena ningyāng ungkhavai kakhayak khangachee eina ngasoda ali ningshida khorumsa.

²⁹ Kaja ithumwui Vare hiya kachuia meina.