Read Tangkhul Naga HEBREWNAO 3 Bible Online

HEBREWNAO 3 - Tangkhul Naga bible

HEBREWNAO 3

¹Varena hokhui kahai kathara ivānaobing, ithumna hāngkaphata paokazata kala pāngmon kharei Jishuli phaninglu.

² Mosesna Varewui shimkhurli shitsanglak kahai thada Jishunala ali khāngkhuikhame Vareli ningtongda shitsanga.

³Shim kasaa china shim chili lāngmeida khayā kai. Chithada sāda Mosesli lāngmeikharda Jishuna tekmatei ngayiya.

⁴Shim kachiva̱ chiwui kasaa mi leisera, kala saikora kasaa chi Varena.

⁵ Mosesna Varewui shimli rao akha sāda ningtonglak eina shitsanga, kala naoda shokki kaji Varena kahāng chi ana shākhi mi.

⁶Kha Khristana anaomayara sāda Varewui shim ningtongda mayonmi. Ithumna kachihān chiwui vang khanao eina tangda ninglumtur eina singtitakha, ithum awui shimna.

⁷ Chieina Manglā Katharana kahāng thada, “Aja nathumna Varewui akhon shaakha,

⁸achālakha nawo-nayingarāna Vareli ngakaikashi thada ning mamararhaialu, lamhāngli kazat tharan chāng khayang thada.

⁹Chili athumna ili chāng tamyanga, kum hangmati ina athumli sākhami chi thatheilala, da Varena hānga.

¹⁰Chiwui vang eina mithot hili ina malungvātta hānga, ‘Athumna khayonmāng phaningchinga, iwui tuila manganāmana.’

¹¹Lungvāt eina ina khangashit sai; ‘Iwui ngasāmkakhui chili nathum khipākha mazanglakmara!’”

¹²Ivānaongarā! Kharinga Varivarawui eina mangareithui khavai zakkashi ning kala mashitkasang ot maphaning khavai ning ngasharlu.

¹³Moreina nathum khipālikha chipatta ning mamakang ngasak khavai “Aja” kaho hi leilakha nathum akha eina akha kasatkasang eina ngasoda thangkachida machin ngaroklu.

¹⁴Kharewui eina ithumna shitkasang khalei chi khangachang eina tangda singtitakha ithum Khristawui otsakrumasera.

¹⁵ Kathara lairikli hithada hānghaida lei, “Aja nathumna Varewui akhon shaakha; achālakha nawo-nayingarāna ngakaikashi thada, ning mamakanghaialu.”

¹⁶ Varewui akhon shālaga ngakaikashi khipākhala? Athum chiya Mosesna Egyptwui eina thānkashokbing maningmala?

¹⁷Kum hangmati Varena khipāli malungvātkhala? Morei kasābing kala lamhāngli thisang kahaibing chi maningmala?

¹⁸Athum ili ngasoda khangasām masamphanglakmara da Varena khangashit kasā chi khipālonglikhala? Ali ngakaikashibingli kahāng maningmala?

¹⁹Athumna mashitsangthuda mazangrarthuwa kaji ara ithumna theiya.