Read Tangkhul Naga HEBREWNAO 6 Bible Online

HEBREWNAO 6 - Tangkhul Naga bible

HEBREWNAO 6

¹Khristawui pongli theiphokdhadhar kajiwui arah chi horhailaga kāshungmei khavai sausa. Kathe otsakbingwui eina ningkhangatei kala Vareli shitkasang haokaphokwui shimphung chili singtitta maleichingsa.

²Ra̱kahik, pāng khāngkāda sokhami, kathiwui eina ringkhangasaka kala katang makhavai bichar hikathā tamkachithei himāngli maleichingsa.

³Ithum mangāshong muivausa! Varena mayāmiakha ithumna hi sāra.

⁴Varewui kahor samphang kahaibingna kazingramwui sokhami mazapyanghailaga, Manglā Katharawui apongla samphanghailaga,

⁵Vare tuiwui khamathā kala, rāki kaji thotwui pangshapla mazapyanghailaga,

⁶mai ngareithui kahaibing! Athumli ning ngateilui khavai khuiungluiki kaji masākapai otna, kaja Varewui Naomayarali athumna krushtungli shāoshānluishitta yarui mangāli maishi ngasakta lei.

⁷Zingrot tārorda mazimkakhui kala lui khavābingwui vang kānkhanā arongbing khar khangasaka ngalei chili Varena somi.

⁸ Kha ka̱shāt eina khawomāng kaphor ngalei chi kānkhanā maleimana; chili Varena khonshikapaiwui kalāshāt lei kala mei eina shimān ngasakra.

⁹Leikashebing, hikathā tui hānglaga, nathumwui vanga huikhamiwui phākhamei sokhami lei da shitsangchaowa.

¹⁰Vareva mashun bichar sākhamena. Chiwui vang eina nathumna sāmi kahai otsak lah katharabingli ngachonkhami eina nathumna ali leikashi chithei kahai kala aruila athumli ngachonmida khalei chi ana mamalaimara.

¹¹Nathumwui kachihān chi ungshungchao khavai nathum kachiva̱na khanao eina tangda mayontit kaji hi ithumwui ningkachāngna.

¹²Chiwui vang eina nathumli ngachāng makakā mi mangasā ngasakngaimana, kha Varena ngashitmi kahai chi samphang khavai shitkasang eina lāngkatha̱bing kathā sāngasakngai.

¹³ Abrahamli ngashitkhami tharan Varena sāki kaji ot chiwui vang shākhi sai. Ali hakkhameia maleithuda khangashit kasā tharan a khalattawui mingli mingzai.

¹⁴Ana hānga, “Ina somida nawui ara̱-azā kachungkha mira da shākhi kasāna.”

¹⁵Abrahamna khāngkatheiwui vang Varewui ngashit kahai chi samphanga.

¹⁶Kachikathāna khangashit kasā tharan ali reikhameiya kachikathā akhawui mingli mingzaiya kala khangashit chi kupkhui.

¹⁷Varena ngashitmi kahai samphangki kajebingli, awui kharin chi mangacheilākmana kaji hi theishingkhui ngasakkhangaiwui vang khangashit chili shākhi sāmi.

¹⁸Chili khamataia khani lei, chiya mangacheipaiki kaji kala Varena maningmana majiki kaji china. Chieina awuili ningkhalum samphang kahai ithumwui vanga ithumwui mangāli haimi kahai kachihān chili singtit khavai panglāk eina kasatmiya.

¹⁹ Kachihān hi ithumwui mirinwui pokkhui khavai katha sāda lei. Hiya kalākashi makhalei, makhangapatana, chonrān chi kānzangda zangkhamei kathara shim chili zangshunga.

²⁰ Ithumwui vang eina Jishuna chili rida zanghaira, kala Melchizedek thada katang makhavai pāngmon kharei sāhaira.