Read Tangkhul Naga JAMES 1 Bible Online

JAMES 1 - Tangkhul Naga bible

JAMES 1

¹Vare kala Proho Jishu Khristawui otram khangatha̱a Jamesna okathui peida chaiyāng eina khalei shang tharāda khanili shālam chiphunli.

²Ivānaobing, chāng khayang yur saikora, nathumna samkaphang tharan ka̱lā khamahaina da shānkhuilu.

³Kaja chikathā shitkasang chāng khayang china ngatar ngasaka kaji nathumna thei.

⁴Khangatar chi athei mathei ngasaklu, chithākha nathum kāshungchaohaida kala peichaohaida khikha khavāt maleimara.

⁵Kha nathumwui ngachaili kachikathā theithangkhamei vatta leiakha, kakharar maleila mingairareo eina mi saikorali khame Vareli seihā sāranu. Chieina ana mira.

⁶Seihā kasā tharan shitsangda ningkhamaong maleila pophalungra; khikhalajila ningkhamaonga ā chiya masina phanung-phanvāda khangaphao shamadruwui rawon kathāna.

⁷Chikathā mi china Prohowui eina khikha samphangra da maphaningaranu.

⁸Kaja a chiya ning khani sāda otsak kachida hilaka kaji makhalei mina.

⁹Khangazana avānao china ali juikhameili khangkākhami tharan ringpharanu kala

¹⁰ kashānga chinala nemkatā tharan ringphāranu, khikhalajila kashāng kaho hila awon thada ja̱tāhaora.

¹¹Zimikna malinglak eina kashok tharan arong chi ngahuihaowa kala ja̱tāhaoda chiwui khamathāla shimānhaowa. Chi tākam eina kashānga mi chila lan ngahomzatta leilakha shimānhaowa.

¹²Chāng khayangli shitkasang makhangachei mi chi sokhamina, kaja ana chāng khayangli nganingshapakha ishameili leikashebingli ngashitmi kahai kharingwui wungkuihon chi awui sāman sāda samphangra.

¹³Kachikathā mi akhali kasui kharā tharan, “Ili Varena suiya” da maphenalu; kaja Vareli makaphāna masuirarmana kala ana khipālikha masuimana.

¹⁴Kha khalattawui ningkachāngli kazat tharan ali kasuina.

¹⁵Ningkachāng chi chungkasang tharan morei shokka kala morei hakkasang tharan kathi shoka.

¹⁶Leikashe ivānaongarā, maminam ngasaklu.

¹⁷Kaphā lemmet kala thada khami saikora hi atungshongwui eina katāsera. Hi aka̱lā thada ngacheiung ngachei khavā makhalei kazingramwui kahor Avāva̱wui eina kharāna.

¹⁸Khamashung tui chiwui mangā eina ā khalattana ithumli raokthui ngasaka. Chieina ana sākahai saikorawui ngachaili ithum hi pharākhare kathā ngasai.

¹⁹Leikashe ivānaongarā, hi theilu. Mi kachiva̱na nganākakhuili thākranu, kha khamatui eina malungkhavātli ngaironhairanu kaji hi phaningunglu.

²⁰Miwui malungkhavātna Varewui khamashung khangarong ot sāvaiki kaji maningmana.

²¹Chiwui vang eina makathar kala makaphā-makhayā acham aram saikora chihohaida Vareli mayālu, kala nathumwui ningli lingsangmi kahai huimishapa tui chi malungkhanim eina khuisanglu.

²²Nakhalatta machipat khavai kashāmang eina mavaila chiwui athishurda otla sālu.

²³Khikhalajila mi akhana tui hi shālaga ot masaakha ka̱lāra̱ngayotli ngayolaga khalattawui azak kathei kathāna.

²⁴Kaja akhalatta ngayolaga zatthui kahai eina a khalattawui azak malai kahai kathāna.

²⁵Kha kachikathāna kākashung kala ningkhān khangasaka ainli saklak eina singda mayontitakha kala kashāmāng maningla otsak eina ngasoda saakha awui kasāsāli Varena somira.

²⁶Kachikathāna dharma leilaka da phaninglala maleli makhāmrarakha awui dharma chi aremana, chi akhalatta mikhanamna.

²⁷Varivara kala Avāva̱wui mangāli kashenga kala khamakhao makhalei dharma chi: marānao eina ra̱meinaowui kakhanangli yangkhami kala okathuiwui khamakhaoli makazang hina.