Read Tangkhul Naga JAMES 2 Bible Online

JAMES 2 - Tangkhul Naga bible

JAMES 2

¹Ivānaongarā, tekhamateiwui Proho Jishu Khristali shitkasangbing sāhaoda, mimai yangda ot masālu.

²Kaja kashānga mi akhana sinā khutop sang, kashankachon mathālak eina ngavailaga kala kachāma akhana chonshi ngavailaga nathumwui kazippamli rālaga

³nathumna kashankachon mathada khangavaipāli “Hili pammilu,” kala kachāmapāli “Chili nganingsālu” lha “Ngalei chili pamlu” da hāngakha

⁴nathum khalattana nachināli ngatei ngasaka kala makaphā ningngai eina bichar sai.

⁵Nganāmilu, leikashiya ivānaobing, Vareli leikashebingli ana ngashitmi kahai wungram chiwui shimluikat kala shitkasangli kashānga mi ngasā khavai okathuili kachāmabingli Varena kapangkhui.

⁶Kha nathumna kachāma mili mautshitmana. Nathumli singkakharenga kala karotshimli shimenkhavā chi kashāngabing maningmalā?

⁷Nathumli Varena khami khayākakā mingpho chili khamashāta chi athumna.

⁸ Kathara Iairikli kapi kahai, “Nawui khongnainaoli nakhalatta leikashi thada leishilu” kaji wungnaowui ain hi nathumna kachangkhat ungshung ngasakta leiakha nathumna khamashung ot kasāna.

⁹Chi maningla mimai yangda saakha nathumna morei sai, chieina nathumli ain china ain sākakhaibingna da khuira.

¹⁰Kaja kachikathāna ain katonga mayonlala kateo akha kaihaiakha saikora sākhai kahai kathāna.

¹¹ Kaja “Maphophaalu” da kahānga a china “Kashaola mashaothatalu” da hāngranu. Nana maphophālala shaothathaiakha ningkhami kakaiya ngasā kahaina.

¹²Ningkhān khangasaka ainwui azingli bichar sāki kaji mi thada matuilu kala ot sālu.

¹³Kaja bichar kasā tharan lumashanmi kahai makhaleia ā chili Varena malumashanmimara, kha bicharliva lukhamashana yui.

¹⁴Ivānaongarā, mi akhana “I shitsanga” da hānglala ot kasā maleiakha china khi tongzākhala? Shitkasang china huimishapralā?

¹⁵Avānao akha lah azarva̱ akha kashankachon simasailak eina ngavailaga, thangthangwui zākhavaila masamphangla leida

¹⁶nathumwui ngachaili akhana “Chingri eina ungulu, lumturhairanu, kathola thotinghairanu” da hānglaga awui khavātwui vang khikha mamiakha chi kahāngwui tongkazā khi leikhalā?

¹⁷Chithada sāda shitkasangla chipapama, otsak maleiakha shitkasangmāng kathina.

¹⁸Kachikathā mina “Nawui shitkasang lei kala iwui otsak lei” da hāngra. Ots maleila nawui shitkasang ili chitheilu, ina iwui shitkasang otsak eina nali chitheira.

¹⁹Vare hi akhamānga da nathumna shitsanga. Chi phālakhaira. Chipeela chithada shitsanga kala ngacheelaka.

²⁰He mangkhama̱bing! otsak maleila shitkasang hi aremana kaji hi chithei ngasakngailā?

²¹ Ithumwui avāva̱ Abrahamna awui naomayara Isaacli hanphuttungli kapha̱ tharan awui otsak chieina mashungkhami maningmalā?

²²Awui shitkasang eina otsak ngaruma, kala shitkasang chi otsakna kāshung ngasaka da nathumna thei.

²³ Kala hithada hāngkahai tui chi ungshunga, “Abrahamna Vareli shitsanga kala ningtongda shitkasangwui vang khamashung khangaronga da ali shānkhui”, kala ali Varewui ngasotnao hoi.

²⁴Nathumna thei kaja shitkasangmāng eina maningla otsak eina mili mashung ngasaka.

²⁵ Chithada sāda khayorva̱ Rahablila Jehudiwui rairui kazatbingli rāzang ngasaklaga shongfa khangatei eina shiunkhamiwui vang awui otsak eina mamashungkhui ngasakmala?

²⁶Manglā mazangakha pha̱sāmāng kathina, otsak mazangakha shitkasangmāng kathina.