Read Tangkhul Naga JAMES 3 Bible Online

JAMES 3 - Tangkhul Naga bible

JAMES 3

¹Ivānaobing, nathum kachungana ojā mangasaaranu, khikhalajila nathumna thei kaja tamkachitheia ithumli sakmeida bichar sāra.

²Ithum saikora khangui kachungkha lei. Khamatuili khangui makhaleia chi kāshungchao kahaia akhalatta aphasāli ngarinkashapa mina.

³Siguili ithumwui kahāng nganā khavai akhamorli yāchan sangmilaga ithumna vāngasakkhangai apamli vāngasaka.

⁴Jahaslila yanglu, chiyākha kahaka ot kaphung chi masimāngna phanzatshaplala kahuiya mipā china huikhavai kateowa akapnao chieina vāngasakkhangai apamli vāngasakshapa.

⁵Chithada sāda male hi pha̱sāwui kateowa akai akhana kha kahaka ot sai. Meipā kateonao akhana ngahong chumpava̱ kathada chuitāshapkhala kaji phaningyanglu.

⁶Male hi mei kathāna. Okathuili male hina khayon otmāng sai, kala phasā akai sāda phasā katongali maphāngasakmana. Kazeiramwui mei chi thotsangda mirin chuitā ngasaka.

⁷Sāyurla, vānaoyurla, ngarikazat phara̱pharā, kala khaihyur kachiva̱ nuingasakpai, chi eina mikumona nuingasakserhaira.

⁸Kha maleli khipānakha manui ngasakrarmana, hiya makaphā manuikapaiya, kathirina pemtinghai.

⁹Male eina ithumwui Proho kala Avāva̱li sochikata kala Varewui sakrin khuilaga sākahai mikumolila khonshiya.

¹⁰Khamor akhawui eina masotkhamila, khonkashila shoka. Ivānaobing chikathā chi mashok ngasakphalungmara.

¹¹Ura̱ok akhawui eina kashima eina kakhā tara̱ shokthathuipaila?

¹²Ivānaongarā, khaorārongna fashongthei mamatheimana, drakhārongna khaorāthei mamatheimana; rumra̱li khamathing tara̱ maungshokmana.

¹³Nathumwui ngachaili thangkhamei kala theishingkakhui khipā leikhala? Thangkhameiwui khangahuilungli ana awui kaphā mirin chi awui otsak eina chitheiranu.

¹⁴Kha nathumwui wuklungli mikpaikashi, ningkakhā, ichāchāwui kaphaning leiakha lāngsoda khamashung chili makapikalu.

¹⁵Chikathā thangkhamei chi kazingramwui eina kharā maningmana, okathuiwui eina kharāna; kaja manglā makazang kala chipeewui otsakna.

¹⁶Mikpaikashi ichāchāwui kaphaning khaleipam chili khonkazār kala makaphā otsak katonga lei.

¹⁷Kha atungshongwui eina kharā thangkhamei chili rimeikapta kathar, chiwui thili chingrihaikapai, tākui kahai, mayā khangarok, lukhamashana kapem kala kaphā atheimānga, phākakhaning kala ningmakathar maleimana.

¹⁸Khamashung khangarongwui heithei chiya chingrihai khavai kasābingna chingri eina yaosang kahaiwui atheina.