Read Tangkhul Naga 1 PETER 4 Bible Online

1 PETER 4 - Tangkhul Naga bible

1 PETER 4

¹Khristana kachotkachāng phunghaokada nathumla Khristawui kaphaning thada phaning khavai ngarānlu. Khiwui vangkhala jilaga phasāli kachotkachāng samphang kahaibing moreili mazangluimana.

²Chiwui vang eina ara hiwui eina thuida nawui okathuiwui mirin hi mikumowui ningkachāng eina maningla Varewui kaphaning eina okthuilu.

³Nathumwui mirinli mashitkasangbingna kasā thada sopkhamasāp, khamathang, khamarip, lumlaokasa kala khangama̱ khangazai, kameoli kapha̱ hikathathamāng sākasā chi shaphaira.

⁴Ara nathumna athumli ngasoda makaphā-makhayā chili makazangwui vang matakhakhaoda athumna nathumli khamashātna.

⁵Kha athumna kharingbinglila, kathebinglila bichar sāki kaje Vareli athumwui sākahai saikora chiwui hishap misera.

⁶Hiwui vang eina kathebingli eina tangda Paokaphā hi tamchithei kahaina kaja mikumo thada phasāli bichar sāhailala, Varewui thada manglā eina ringkhavaina.

⁷Ot saikora ngachangki kaji nganaihaira; khalatta ngarinda kala ngasharda seihā sāshap khavai ngarānlu.

⁸Akha eina akha leishi khangarok hina mataimeikap kajena, khiwui vangkhala kaja khayon-khamāng kasā saikora leikashina pheomishapa.

⁹Ning khamakhao maleila mathānthathup kha̱mishimāli ngahānlu.

¹⁰Varivarana ngatateida khami lukhamashanwui kaphaa kashina sāda, mi ava̱va̱li lemmet ngatateida mikahai chi akhana akhawui vang kānnā khavaili shichinlu.

¹¹Pao hākashoka a china Varewui pao hāshokphalungra; otram ngatha̱mena Varena ali mikahai pangshap chieina ngatha̱phalungra. Chithada sāda katang makhavai tekhamatei Khristawui mangā eina Vareli masot mipaira. Amen.

¹²Leikashe ivānaobing, nathumna kachotkachāngwui chāng khayang samkaphang chili ngateihang kahai otshotnada matakhak kahai masaalu.

¹³Kha Khristawui kachotkachāng phungkhangarumana da ringphālu. Chithada sāda awui tekhamatei chi phongshokthanghon nathum ringkaphāna pemtinghaora.

¹⁴ Khristawui thi kashurwui vang mina zeiakha nathum ringphālu; hiwui kakhalata tekhamatei manglā, Varewui Manglā chi nathumwui lungli lei.

¹⁵Nathumwui ngachaili kachikathā mi akhana mi sākathatwui vang, khaleewui vang, ain kakaiwui vang kala yomsakwui vang kala mi kateiwui otli sheikakhautwui vang kachotkachāng samkaphangna jiakha ringphā khavai maleimana.

¹⁶Kha shitkasanga mi akha sāda kachotkachāng samphangakha chiwui vang makhayakalu. Khristawui ming samkaphangwui vang Vareli ningshitha̱ki kajina.

¹⁷Bichar sāki kaji atam chi rāhaira, kala bichar chi Varewui shimkhur mibingli rira, kala hi ithumwui eina haophokra jiakha, Varewui Paokaphāli mashitkasang athumwui akatang chi katharali?

¹⁸Hithada kapihaida lei: “Khamashung khangarongalila saklak eina huikhuiakha makathara morei kaphungbing kali vaura?”

¹⁹Chiwui vang eina Varewui kaphaning athishurda kachotkachāng kaphungbingna khamashung ot sāranu kala athumwui manglā makhangachei Kasā Akhavāli horsangchaoranu.