Read Tangkhul Naga 1 PETER 5 Bible Online

1 PETER 5 - Tangkhul Naga bible

1 PETER 5

¹Ila churchwui arar akha sāda nathumwui church ararbingli kapona: I Khristawui kachotkachāngwui shākhi khame akhana kala rāphongmiki kaji tekhamatei chili ila zangrumra.

²Nathumwui pāngli Varena horsangmi kahai yaobingli mathālak eina homlu, Varewui ningkachāng athishurda yangmilu, tandi thada masāla mathanthathup sālu, amanwui vang maningla sāngairereo ngatha̱milu.

³Nathumli mikahai athumwuitungli akhavā masaalu; kha yaobingna sha̱khui khavai acham sāchitheilu.

⁴Chieina Yaokahoma akhavā kharā tharan mashimānkapai tekhamateiwui kuihon chi nathumna samphangra.

⁵ Chithada sāda khanuithotbing ararnaobingwui kahāng nganālu kala nathum akha eina akha otram ngatha̱mi ngarok khavai khangahuiwui sāri ngavailu, kaja hithada kapihaida lei; “Varena langkasobingli ngasunga kha khangahuiale lumashanmi.”

⁶Chiwui vang eina nathum Varewui pāngthei kharei chiwui azingli hamsanglu, chithākha awui atam kachāli nathumli khāngchikatra.

⁷ Nathumwui malungkharing saikora awui pāngli horsanglu, ana nathumli yangmilaka.

⁸Mikringda ngasharlu, nathumwui yangkashe chipee chi kazingkha̱ thada nirlaga kachikathāli shaikhavai zatung zatvāda phāzatta lei.

⁹Shitsangtitta ngasunglu, khiwui vangkhala kaja okathuili nachinā ngarāla chikathā kachotkachāng phungda lei kaji nathumna thei.

¹⁰Kha nathumna kasha̱nakha kachotkachāng samphang kahaiwui thili Khristali ngarum kahaiwui vang katang makhavai tekhamatei samphangrum khavai hokhuikhame, lumashankatha Varena nathumli kākashung, khangazip, pangshap kala rungshing kahai mira.

¹¹Katang makhavai pangshap chi awui ngasāranu. Amen.

¹²Shitsangkapai ichinā Silaswui khangachon khuilaga sha̱lak kahai chithi hi kagapina. Kasatkasang eina ngasoda tui hi Varewui lukhamashanlaka da shākhi khamina. Tui hili nganingtitlu.

¹³Nathumli kapangkakhui thada Varena kapangkhui kahai Babylonli khalei kala inaomayara kathā Marknala nathumli shālam chiphunli.

¹⁴Shitkasangbingwui leishāt eina akha eina akha shālam sāngaroklu. Khristali kazanga nathum saikorali chingrihairanu.