Read Tangkhul Naga 2 PETER 2 Bible Online

2 PETER 2 - Tangkhul Naga bible

2 PETER 2

¹ Khare kachāngla minama marānbing shokhaira. Chi tākam eina nathumwui lungli minama ojābing shokra. Athumli kankhame akhavālila mamayāmada shimān khavai kala makhamashung tui tamchitheira. Chieina athum khalattali athumwui tamkachithei china shimān ngasakra.

²Mi kachungkhana athumwui sokhamasap chili shurra kala athumwui otsak chiwui vang khamashung shongfa chilila mashātra.

³Karāmhaoda minama ojābing hina nathumli athumwui ningkap eina semkakhui khararchān chieina kateizāra, kaja hikathā mibing hiya shimānphalungra kaji hi achālakhawui eina hāngmarān kahaina, kha atam kasha̱nakhawui vang mashimānki kaji thasālala athum chiya shimānphalungra.

⁴Kaja morei sāhaikha kazingraobingli eina tangda Varena yangkhei kahai maleimana, athumli kazeiramli haida bichartam marāranglakha eina tangda tangmangting kahaipamli tuknarhaiakha,

⁵ achālakhawui okathuilila Varena yangkhei kahai maleila shimān ngasakta khangarong hākashoka Noah eina athum katei shini chi maningla Varena ali makachāpabingli tara̱kaphong eina shimān ngasakakha,

⁶ Varena Sodom eina Gomorrah keinung khani chili malungkhavāt thada mei eina shimān khangasak hi Vareli makachapbingli naoda khi shokrakhala da theikhuikhavai saakha,

⁷ mikumona masākhangayi acham-aram kazatbingwui vang ning chotkhame kaphā a Lotli Varena kanmiakha,

⁸(Kaja khamashung khangaronga china athumwui ngachaili okthuida athumwui makaphā otsak chi kathei kashā eina thangkachida awui ningli khāngchinga)

⁹khamashungbingli kathada kachotkachāngwui eina kanshokrakhala kala bichar sāki kaji zimiksho marāranglakha makaphābingli kathada tandi mida narhairakhala kaji Prohona thei.

¹⁰Matailak eina ningkakachai phasāwui khamathangli kashurbing kala Varewui pangshapli makachāpbingli tandi mira. Athum hi kapingla ping, lāngkasola langsoda kazingraobinglila khangachee maleila mashātphāphai.

¹¹Athumli yāng pangshap leikhameia kazingraobing eina tangda Prohowui mangāli athumli mashātta mamatuimana.

¹²Athum hiya ning makazang ramsā rengkhuilaga sāthat khavai pharā kahai sāyur kathāna. Athumna matheikharar chili zeilaga hāngphāphā kajiwui vang sāyurbingwui kashimān thada athumli shimān ngasakra.

¹³Kala athumna khanang ngasak kahai thada athumlila khanang ngasakra. Ngashun langpongda phasāwui ringkaphā samphang khavai kasā chi athumwui kapena. Sākharekli ringphāshonshon kaje athum hikathāli phāshak phazā khangarumwui maikashi kala khayākhamalā samphang khavaina.

¹⁴Athum phophākhangai mikyanmāng eina yanga kala morei ot kasāli kapen mavaimana. Ning khangazanbingli athumna suikhui kala athumwui ningli kākharāmna pemtinghai. Athum khonshi kahai naongarāna!

¹⁵ Khamashung pongwui eina ma̱thuihaida khangui otsak eina lanli leikashe Beorwui naomayara Balaamwui thi shurhaowa.

¹⁶ Chieina khak makashoka gadhāna mitui matuida awui sāyon kahai chiwui vang kharara kala marān chiwui otsak chi khāmmihaowa.

¹⁷Athum hiya thengkahai ura̱wok kala masina phankazat leichui kathāna. Varena kazeiramli athumwui vang pam ngarānhaida lei.

¹⁸Athumna mangkhama̱wui lāngsot tui tham-tham matuida moreiwui eina yāmshoknanaida khalei athumli phasāwui khamathang eina suiya.

¹⁹Athumna ningkhān mirada ngashitzata, kha athum khalatta shimānhaoki kaji makaphā-makhayāwui raobingna. Kaja kachikathā ot akhana mi akhali yuihaiakha mipā chi ot chiwui raona.

²⁰Huikhame Proho Jishu Khristawui mangā eina theithangmeida okathuiwui khamakhaowui eina yāmshoklaga chiwui khalenli tāzangluiakha, khare mirinli khanaopā zakshimei.

²¹Athumna kathara ningkhami chi thatheihailaga chiwui eina yāmluishitki kajiwui vanga khamashung khangaronga apong chi matheisālak kajina phamei.

²²Chānsamtuili “Fa̱na maloshokhailaga zālui kala hokli ra̱vaimihailaga khorchopli ngakhorlui.” kaji hi athumwui vang mashunglaka.