Read Tangkhul Naga 2 PETER 3 Bible Online

2 PETER 3 - Tangkhul Naga bible

2 PETER 3

¹Leikashebing! Chithi hi ina nathumli kapi kakhanena, kala chithi khaninili nathumwui ning mathuklui khavai ina phaningung khangasakna;

²achālakha kathara marānbingna hāngmarānmi kahai kala Huikhame Prohowui ningkhami chi nathumwui paokazatbingwui mangā eina phaningungchingphalungra.

³Rimeikapta nathumna hi bhap tāphalungra kaja khanaowa zimiksholi mana̱kashebing shokta athumli khalattawui khamathangna singyuida athumna nathumli mana̱shida

⁴hithada hāngra, “A rāluishitra kaji tuingashit chi kali vāhao? Ishavā ngarā thithang eina thuida ot saikora haokaphokli leikasā chi tākam eina aruila leichingpapamli”

⁵ Achālakha Varena kasoda kazing eina okathui sākhui kaji hi thatheilaga athumna matheirekthuwa. Okathui hi tara̱wui eina, tara̱ eina sākhui,

⁶kala tara̱na kaja phongkhashilong tara̱na kachama okathui chi shimān ngasakpapama;

⁷kha arui leida khalei kazingram eina okathui hi Varena ngaraikachā kakaso mida mei eina sāshimān khavai phāri kahaina, kaja mashitkasangbingli bichar sālaga shimān ngasaki kaji zimikshowui vang haikahaina.

⁸ Leikashebing! tui hi khamalai masālakalu, kaja Prohowui miktāli thangkha eina zingkum thingkha khangatei maleimana. Awui vanga khanini chi ngaraichai.

⁹Prohona ngashit kahai chi aruila maungshung ngasakmana da kaikhana phaninga, kha mi khipālikha mashimān ngasakkhangaiwui vang ana nathumli ngaraikhamina, kaja mi saikorali athumwui moreiwui eina ningngateikhui ngasakngai.

¹⁰Kha Prohowui zimiksho chi khale thada rāra. Chithang kazingramla akhon panglāk eina ngashumda shimānhaora kala chiwui alungli khalei saikora mei eina chuitāserhaora.

¹¹Ot saikora hithada shimān ngasaki jihaoda nathum kachikathā mi ngasāra? Nathumwui mirin chi kathar eina Vareli chigatphalungra.

¹² Varewui zimiksho ngaraimamānda; chi thākta rāngasak khavai sālu—kazingram meina chuida shimānhaoki kaji kala kazingramli khalei saikora menghaoki kaji zimiksho chi.

¹³ Kha awui ngashit kahai athishurda khamashung khangarongbingna pānki kaji kadhara kazingram eina okathui chiwui vang ithumna khangaraina.

¹⁴Chiwui vang eina leikashebing! nathumna zimiksho hi ngaraimamānda Varewui miktāli nathum tharda kala achuk kapeia ngasāda ali ngasoda chingri eina okthuirum khavai sālu.

¹⁵Prohowui ningzinghākharing chi nathumli kahui samphang khavai atam khamina, kaji hi ithumwui leikashe Paulnala ali mikahai thangkhamei chiwui athishurda nathumli kapihaira.

¹⁶Hiwui pongli kakapi tharan ana chithi katongali maram hi kapichinga. Awui chithibingli kasak kaikhala zanga, chibing chi matheithangkhama ningsā makhangazipabingna kathara lairikwui tui kaikha khalatphāphākhui kaji thada kasakbing chi athumna nguida tamkachithei lei. Chiwui vang eina athum khalattali kashimān khuirākhui.

¹⁷Kha ivānaongarā, nathumna hi rida theihaira, ningngasharlu, nathumli ain makhavai mibingna thannguihaipaishina kala nathumwui ningsā khangazip shimān ngasakhaipaishina.

¹⁸Kha ithumwui Proho kala Huikhame Jishu Khristawui lukhamashan kala aworwui lungli nathum rarsanglu. Awui mingli aruila, naodala mashimānda tekmateichingra̱nu. Amen.