Read Tangkhul Naga 1 JOHN 4 Bible Online

1 JOHN 4 - Tangkhul Naga bible

1 JOHN 4

¹Leikashebing, Manglā kachiva̱li mashitsangalu: kha Varewui eina samkaphang manglākā maningkhala kaji chāng yanglu, kaja mikhanama marān kachungkha okathuili shokhaira.

²Hithada nathumna Varewui Manglākā maningmakhala kaji theikhuipaira; chiya, Jishu Khristana mikumo akha sāda rai da hāngkaphat mi kachiva̱ chi Varewui Manglāna;

³ kala Jishuli makhamayā kachiva̱ Varewui maningmana. Hi rārada nathumna shākahai kala okathuili leiping kahai Khristali makhamayāwui manglāna.

⁴Naoshinaobing, nathum Varewui nao sāhaoda minama paokazatbingli nathumna yuihaira, kaja nathumwuili khalei a china okathuili khalei a chili hakmei.

⁵ Athuma okathuiwuina, chieina athumna khamatui chi okathuiwuina kala okathuina athumwui tui khui.

⁶ Ithumva Varewuina, Vareli theikahaibingna ithumwui tui khuisanga; kha Varewui mi makhaningbingna makhuisangmana. Hithada sāda khamashung manglā eina makhamashung manglāwui khangatei theishapa.

⁷ Leikashebing, ithum akha eina akha leishi ngaroksa, kaja leikashi hi Varewui eina kharāna. Leishikatha mi chi Varewui naona.

⁸Maleishikatha a chiya Vareli matheimana; kaja Vare hi leikashena.

⁹ Varena awui leikashi ithumli hithada chithei; awui naohonaotong chihorāda awui mangā eina ithumli kahui samphang khavai sai.

¹⁰ Leikashi kaho chi hithai; ithumna Vareli leishikhare maningmana kha ana ithumli leishida ithumwui morei pheomi khavaiwui vang maseimi khavai Anaomayarali chihorāmi.

¹¹Leikashebing, Varena ithumli hiyākha leishiakha ithum akha eina akha leishi ngarokphalungrali.

¹² Vareli khipānakha mik eina matheilakranga, kha ithum akha eina akha leishingarokakha Vare ithumwuili lei, kala awui leikashi chi ithumwuili pong ngasaka.

¹³ Ithum Varewuili leihaoda a ithumwuili lei kaji ithumna theishingkhuihaira. Khikhalajila awui Manglā ithumli mihaira.

¹⁴ Chiwui vang eina okathuiwui Huikhame sākhavai Varena Anaomayara mihaira kaji hi ithumna mik eina theida mi kachiva̱li kahāngna.

¹⁵Jishu hi Varewui naona da hāngkaphata a chili Vare lei, kala Vareli a lei.

¹⁶Chieina Varena ithumli leikashi khalei chi ithum khalattana thei kala shitsanga. Vare leikashena, leikashili khalei a chi Vareli lei kala Varena ali lei.

¹⁷ Bichar zimiksholi ninganungmei khavai ithumwui lungli leikashi chi pongngasaka kala chi ithumna samphangra, khikhalajila okathuili ithumwui mirin hi Khristawui thāpapamma.

¹⁸Leikashili khangachee maleimana. Kākashung leikashina khangachee shimān ngasaka. Chiwui vang eina, ngacheekazarbing hi leikashi makākashungna kaja khangachee hili khayon ot lei.

¹⁹ Varena leishikharewui vang ithumna leikashina.

²⁰ Kachikathāna “I Vareli leishi” jilaga avānaoli yangkharingakha a kakapikna, kaja ana mik eina kathei achināli maleishiakha, mik eina makathei Vareli maleishirarmana.

²¹Chieina Khristana hithada kahāngna; Vareli leikashe china avānaolila leishiphalungra.