Read Tangkhul Naga 1 JOHN 5 Bible Online

1 JOHN 5 - Tangkhul Naga bible

1 JOHN 5

¹ Jishu hi Messiahna da shitkasanga mi chi Varewui naona, kala Avāva̱li leikashe mi china Anaolila leishi.

²Varewui naongarāli leikashi hi Vareli leishida awui kahāng khanganā chi eina theikhui.

³ Vareli leikashiwui vang awui ningkhami khamayona, kala awui ningkhami ritnā kahai maleimana.

⁴ Khikhalajila Varewui nao kachiva̱na okathuili maishi ngasakshapa kala shitkasang mangā eina okathuili ithumna khayuina.

⁵Jishu hi Varivarawui Naomayarana da shitkasanga china okathuili khayui maningmala?

⁶ Ra̱kahikwui tara̱ eina kathiwui ashee ngasoda kharā chi Jishu Khristana. Ana tara̱māng eina marāmana, kha tara̱ eina ashee khanini ngasoda rai,

⁷kala Manglāna chiwui shākhina. Kaja Manglā hi khamashungana.

⁸Chiwui shākhi kathum lei: Manglā, Tara̱ kala Ashee; kathum hi mayā ngaroksera.

⁹ Miwui shākhili ithumna shitsanga, kha Varewui shākhina pangmeikhara kala Varena Anaomayarawui pongli shākhi mihaira.

¹⁰ Chiwui vang eina Varewui Naoli shitkasanga mi china awui wuklungli shākhi hi lei; kha Vareli mashitkasangbingna ali kakapika sāngasakhaowa, kaja Varena Anaomayarawui pongli kahāng chi athumna mashitsangmana.

¹¹Varena ithumli kharing Manglā mihaira, kala hi Anaomayarawui mangā eina ithumna samkaphangna kaji hina shākhina.

¹² Naomayarali khuikasang mi china kharing hi samphanga, kha makhuikasang mi china kharing masamphangmana.

¹³ Varewui Naomayarali makashimān kharing lei kaji theikhavai ina hi kagapina.

¹⁴ Ithumna awuili ningkhanganung hi lei kaja awui ningkachāng athishurda ithumna poakha ana khuisangmi.

¹⁵Ithumna kapo chi ana mirada theiakha ithumna kapo chi samphanghaira da thei,

¹⁶kachikathā mi akhana, avānao akhana mathikapai morei kasā theiakha ana awui vang seihā sāmiranu, chieina mathikapai morei kasāwui vanga Varena ali ringngasakra. Thikapai morei lei; chikathāwui vang seihā sāmilu da ina kahāng maningmana.

¹⁷Khalāng kasā saikora moreisera, kha mathikapai morei lei.

¹⁸ Varewui nao khipānakha morei sālui sālui majimana kaji ithumna thei, kaja Varewui Naomayarana ali yangmihaida makaphā china ali khikha masāthukmana.

¹⁹Apuk-apaga hi makaphā pangshapwui azingli leilala ithum Varewuina kaji ithum thei.

²⁰ Varewui Naomayara rāhaira kala ithumli theishingkhui ngasakhaira kaji ithumna thei. Ithum khamashunga Vare, Anaomayara Jishu Khristali ringrumda lei. Hi khamashunga Vare kala makashimān Kharing china.

²¹Inaongarā, meoma̱li makhorumalu.