Read Tangkhul Naga WUNGVA̱-WUNGVĀ 1 Bible Online

WUNGVA̱-WUNGVĀ 1 - Tangkhul Naga bible

WUNGVA̱-WUNGVĀ 1

¹Joshua thikahaiwui thili Israelwui mibingna Vareli, “Ithumwui vang Canaannaobingli ngarar khavai khipāna vārirakhala?” da ngahāna.

²PROHOna hānga, “Judahna thānra; yanglu, ngalei hi ina awui pāngli horsangmihaira.”

³Kala Judahna achinā Simeonli hānga, “Ili mikahai leiret chili ili ngasokālu, chithāda Canaannaobingli ithumna vāngararra; kala chithāda sāda nali mikahai leiret akakhui tharan ila nali ngasovāra.” Chieina Simeonna ali ngasovai.

⁴Chieina Judahna khavā eina PROHOna Canaannaobing eina Periznaobing chi athumwui pāngli horsangmi; kala athum mi thingtharāli Bezekli shaothatta maikashi mi.

⁵Athumna Bezekli vāda Adoni-bezekli ngararra, kala Canaannaobing eina Periznaobingli yuihaowa.

⁶Adoni-bezek yāmhaowa; kha athumna ali kharomkhuilaga awui pangva̱, kala pheiva̱bing katattāmiserhaowa.

⁷Chieina Adoni-bezekna hānga, “Awunga hangshini kala athumwui pheiva̱ pangva̱bing katattāmiserhaida iwui table zingli zaneng ngamuizāsai; ina sākahai chi tākam eina Varena athut hāngsangmihaira”. Kala athumna ali Jerusalemli khuiunga, kala a chili thisanghaowa.

⁸Kala Judahwui mibingna Jerusalemli ngararda chi khui, kala raighai eina sāthatserhaowa, kala keinungla mei sa̱tamihaowa.

⁹Chiwui thili Judahwui mibingna kaphungramli kapambing, Negebli kala angakoli kapam Canaannaobingli ngarar khavai tai.

¹⁰ Kala Judahna Hebronli (Khare kachāng Kiriath-arba hokasa apam chili); Canaannaobingli angararda Sheshai kala Ahiman eina Tamaili yuihaowa.

¹¹Chiwui eina athumna Debirwui mibingli angararra. Debir kaho aming hi, khareli Kiriath-sepher hosai.

¹²Kala Calebna hānga, “Kiriath-sepherli ngararlaga khayuiapāli inao ngalāva̱ Achsahli apreiva̱ sāda mira.”

¹³Kala Calebwui agato Kenazwui naomayara Othni-elna yuihaida ana ali anaongalāva̱ Achsah mihaowa,

¹⁴Sha̱nao china ali fakhavā eina, ana avāva̱ Calebli lui pokhavai hānga; chieina ana gadhātungwui eina katā tharan Calebna ali hānga, “Na khi pongaikhala?”

¹⁵Ana ali hānga, “Nana ili Negebli pamngasakhaoda ura̱pam akhala milu.” Chieina Calebna shangkhamato ura̱pam eina tākhamaze ura̱pam chi ali mihaowa.

¹⁶Moseswui awova̱, Kennaopa chiwui naotungbingna Arad ngalemwui Negebli khalei lamhāngshong Judah lamhāngwui khaneirong keinungwui eina Judah mibingli ngasoda kai; kala athumna chili vāda chiwui mibingli okthuiruma.

¹⁷Kala Judahna achinā Simeonli ngasoda vai, kala athumna Zephatli kapam Canaannaobingli angararra, kala saikora sākazammiserhaowa. Chiwui vang eina keinung chiwui aming Hormah hokahaina.

¹⁸Judahna Gaza kala chiwui leiretbing khui; Ashkelon kala chiwui leiretbing, Ekron kala chiwui leiretbingla khuiserhaowa.

¹⁹Kala PROHOna Judahli ngasomida ana kaphungram saikora vākhuisera, kha ana tampākli khaleibing, mariwui siguigari khangavāwui vang, athumli makashamrarthuwa.

²⁰ Kala Mosesna hāngkahai thāda; Hebron Calebli mihaowa, kala ana Anakwui naomayara kathum chi chiwui eina kashamshokhaowa.

²¹ Kha Jerusalemli pamkasā Jebusnaobingli Benjaminwui mibingna makashamana; chiwui vang eina aja rāshungda Jerusalemli Jebusnaobing eina Benjaminwui mibing pamrumda lei.

²²Josephwui shimkhur mibingna Bethelli angarara, kala PROHOna athumli ngasomiya.

²³Kala Josephwui shimkhurna Bethelli ara̱yang khavai (khareli apam chili Luz hosai) chihovai.

²⁴Kala ra̱khayangbingna keinungwui eina mi akha shokrākasa theida athumna, “Ithumli keinung zangkhavai shongfa kahāngmilu, chieina nali ithumna kaphā sāmira” da hānga.

²⁵Chieina ana keinung zangkhavai shongfa chi athumli chitheimi; kala athumna keinung chi zangkai, kha mi chieina awui shimkhurli chihohaowa.

²⁶Kala mipa china Hitnaobingwui ngaleili vāda keinung akha vāsākai, kala aming Luz da phoka; aja eina tangda chi hochingda lei.

²⁷ Manassehna Beth-sheanli khalei kha̱bing kala chiwui mibingli makashamana, lah Taanach kala chiwui kha̱bingli khalei mibing, lah Dor kala chiwui kha̱bingwui mibing, lah Ibleam kala chiwui kha̱bing, Megiddo, lah chiwui kha̱bingli khalei mi makashamhaimana; kha Canaannaobingna chili pamshānhaowa.

²⁸Israelna pangshap reikasang eina Canaannaobingli thoukai phungngasaka, kha athumli kashamchao majimana.

²⁹ Kala Gezerli khalei Canaannaobingli Ephraimanobingna makashamana; kha Canaannaobingna athumli Gezerli pānruma.

³⁰Kitronwui mibing, lah Nahalalwui mibinglila Zebulunna makashamana, kha Canaannaobingna athumli pānruma, kala thoukai kaphunga sāngasaka.

³¹Asherna Accowui mibing, lah Sidonwui mibing, lah Ahlabwui mibing, lah Achzibwui mibing, lah Helbahwui mibing, lah Aphikwui mibing, lah Rehobwui mibingli makashamana;

³²kha Ashernaobingna apam chili leikasā Canaannaobingli panruma; kaja athumna athumli makashamana.

³³Naphtalina Beth-shemesh, lah Beth-anathwui mibingli makashamana, kha ngalei chili leikasā Canaannaobingli ngasopama; chithālala Bethshemeshwui mibing, Beth-anathwui mibing chili athumwui vang thoukai kaphunga sāngasaka.

³⁴Amornaobingna Danwui mibingli kaphungramli kashamvāhaowa, kaja athumna athumli tampākshong matā ngasakmana.

³⁵Amornaobingna Har-heresli, Aijalonli, kala Sha-albimli pamshanhaowa, kha Josephshi shimkhurwui pāng ritlak eina parda athumli thoukai phungngasaka.

³⁶Kala Amorwui thari chi Akrabbim ashan Sela eina thuilaga atungshong khalei china.