Read Tangkhul Naga WUNGVA̱-WUNGVĀ 14 Bible Online

WUNGVA̱-WUNGVĀ 14 - Tangkhul Naga bible

WUNGVA̱-WUNGVĀ 14

¹Samsonna Timnahli tāda, apam chili Philistinewui ngalānao akha theihaowa.

²Chiwui thili ana unglaga avā eina ava̱va̱li, “Timnahli Philistine ngalānao akha ina thei, ipreiva̱ sākhavai ali hāngsangmilu” da hānga.

³Kha avā eina ava̱va̱na ali hānga, “Nawui theisāwui nao ngalāva̱bingwui alungli sha̱nao akhala mazangmala, maningkha ithumwui mibingwuili mazangthuda ahui marimkashoka Philistinenaoli napreiva̱ sākhavai akhuiphalungrala?” Kha Samsonna avāva̱li hānga, “Iwui vang ali khuimilu, kaja ana ili ningyāng ungngasaklaka.”

⁴Hi PROHOwui khangarāna kaji avā eina ava̱va̱na matheisāmana; kaja Philistinenaobingli ngasung khavai ana atam kachā khayangna. Chitharan Philistinena Israelwuitungli mungsai.

⁵Chieina Samsonna avā eina ava̱va̱li ngasoda Timnahli tai, kala ana Timnahwui drakhā yāmguili vai. Kala yanglu, kazingkha̱nao akhana ali nirshokrāsai;

⁶kala PROHOwui manglāna awuitungli pangshap rāzangmi, kala kazingkha̱ chili mina yaonao shaokathat thāda paisor eina makhā serkhaimihaowa; apāngli khikha masingmana. Kha ana kasā chi avā eina ava̱va̱li khikha mahāngmana.

⁷Chiwui thili ana ngalāva̱ chili khararchān asai, kala ana Samsonli ningyāng ungngasakhaowa.

⁸Kala khaleilaga ngalāva̱li hokhui khavai vai, kala kazingkha̱wui kathingun chi yangkhavai chiwui ngalemli vai, kala yanglu, kazingkha̱wui asā alungli gahā zangda khuira̱la zangsai.

⁹Ana pāng eina kaokhuilaga shaimamānda zata, kala avā eina ava̱va̱lila khuiungmida anila shaiya. Kha kazingkha̱ kathingunwui eina kakhuina kaji anili mahāngmana.

¹⁰Kala avāva̱na ngalāva̱ shiwuili tai, kala Samsonna chili zātkhān akha sai; kaja yaronnaobingna chithāda sāsā ji.

¹¹Kala chiwui mibingna ali theida zātkhān chili ngasotnao thumra horai.

¹²Kala Samsonna athumli hānga, “Ina nathumli pakhon akha hāngga; kalikhada nathumna hiwui kakhalat ili phanitpei zimiksho shinithangwui alungli hāngmishapakha, ina nathumli khamenga kachon kala shivai kachon thumrā mira;

¹³kha nathumna chi mahāngmirarakha, ili khamenga kachon thumrā kala shivai kachon thumrā mira.” Athumna ali “Nawui pakhon chi hānglu, ithum nganāusa” da hānga.

¹⁴Kala ana athumli hānga, “Kashaiya chiwui eina khikhakha shaikhavai shoka. Kapangawui eina khikhakha kashima samphanga.” Kala athumna kathumthangwui alungli pakhon chi khikhalada mahangrarthuwa.

¹⁵Khamatethang athumna Samson preiva̱li hānga, “Nagaharali, pakhon chiwui kakhalat hāngmi khavai kontrenlu; chi maningakha nalila, nashāvāwui shimla ithumna mei thottāhaora. Ithumli chām sāsangmi khavai phakazā kahola?”

¹⁶Kala Samson preiva̱na chapsasui hānga, “Na ili yangkharinga, kala maleishimana; iramnaoli pakhon hānglaga chiwui kakhalat ili mahāngmana.” Ana hānga, “Yanglu, ishāvālila lah ishava̱lila tui hi mahāngmana; laga ina nali hangrala?”

¹⁷Ngalāva̱na awui ngalemli zimiksho shinithang phanit peida chapsasui ngahānchinga; kala kashinethang ana hāngmihaowa, kaja ana ali kontrenshon kontrenthaihaowa. Chiwui thili sha̱nao china pakhon chi aramnaoli hānghaowa.

¹⁸Chieina kashinethang zimik matunranglakha keinungwui mibingna ali hānga, “Khuira̱li shimkhamei khi lei? Kazingkha̱li pangkhamei khi lei?” Ana athumli hānga, “Nathumna iwui muklanaoli tandi masāsi kaje, nathumna kachilikha eina tangda iwui pakhon chi matheilakmara.”

¹⁹Kala PROHOwui manglāna awuitungli pangshap eina ngasomida, Samsonna Ashkelonli tai kala keinung chiwui mi thumra shaothatlaga athumwui kashankachon chi pakhon chiwui kakhalat hāngkhamebing chili mihaowa. Kala malungvātnāhaida avāva̱wui shimli unghaowa.

²⁰Kala Samsonna preiva̱li aniwui shakazā atamli nganingkhame awui ngasotali mihaowa.