Read Tangkhul Naga WUNGVA̱-WUNGVĀ 15 Bible Online

WUNGVA̱-WUNGVĀ 15 - Tangkhul Naga bible

WUNGVA̱-WUNGVĀ 15

¹Khaleilaga, kehu hatkachāng, Samsonna yaonao akha khuiphunglaga apreiva̱li samphang khavai vai, kala ana “Ipreiva̱wui kāli zangura” da hānga. Kha apreiva̱wui avāva̱na mazang ngasakthuwa.

²Awova̱na hānga, “Nana ali kachangkhat eina chinhao-aili da ina phaninghaowa; chieina ina ali nasotali mikahaina. Agatuiva̱na ali mathākhamei maningmala? Ali khuitha̱lu.”

³Kala Samsonna athumli hānga, “Ajawui hile ina Philistinenaoli zakshida kasā tharan ili phen khavai maleimana.”

⁴Chieina Samsonna ramfa shākathum atukkhuida kala zārmeila khuida ana ramfa khanini eina akhamei ngasunlaga chiwui ngachaili meila hokthangmiserhaowa.

⁵Kala ana zārmei chili mei thothailaga ramfabing chi chihokhami eina Philistinenaowui hātphui kahai, lah mahātrang kaji mā kala olive yāmgui meina chuikhup tāmihaowa.

⁶Chiwui thili Philistinenaobingna, hi khipānakhala da khangathing eina, “Timnapawui arihā Samsonna; apreiva̱ awova̱na awui ngasotali mikahaiwui vangna,” da athumna ngahānkai. Chiwui vang Philistinenaobingna vāda avāva̱ eina anao ngalāva̱li meili horsanghaowa.

⁷Kala Samsonna athumli hānga, “Nathumna hithāda kasāwui vang ina kachangkhat eina nathumwuitungli athut khuira, kala I hili mapamluimara.”

⁸Kala ana yaithathailaga kachungkha sāthatmihaowa, kala a Etamwui lungkhur akhali apamhaowa.

⁹Chiwui thili Philistinenaobingna Judahli rairum asālaga Lehili vākai.

¹⁰Kala Judahwui mibingna hānga, “Khiwui vang ishili rākakaikhala?” Athumna hānga, “Samsonna ithumli sāmi kahai thāda alila sami khavai tukkhuikida khārana.”

¹¹Chieina Judahwui mi thing kathum Etamwui lungkhur pamli tai, kala Samsonli hānga, “Ithumli Philistinenaobingna mungda lei kaji na matheimala? Nana sākahai hi khikhala?” Chieina ana athumli hānga, “Athumna ili kasā thāda inala athumli kasāna.”

¹²Athumna ali hānga, “Ithum nali Philistinewui pāngli horsangmi khavai tukkhuikida kharāna.” Samsonna athumli hānga, “Nathumna ili masāthatmarada ili shākhi sālu.”

¹³Athumna, “Khikha mathālakmara, kha athumwui pāngli horsangmi khavaimang khalapkhuiki kajina.” da hānga, Chieina athumna seipeng kadhar khani eina khalaplaga lunghārtungwui eina khuitai.

¹⁴Ana Lehili ungkashung eina Philistinenaobingna mathānda vaoda rāngaroka; kha PROHOwui manglāna awuitungli pangshap zangmida, apāngli khalap kahai seipeng chi meina chuishat kahai thāda shireipatshathaowa.

¹⁵Kala ana chichangli gadhā makhāra̱kui khanganao akha leisāda chi apāng eina yonkhuiya, kala chieina ana ngaphitkachupta mi thingkha shākha thihaowa.

¹⁶Kala Samsonna hānga, “Gadha makhāra̱kui eina, khorkhorwuitungli khorkhor, gadhā makhāra̱kui eina mi thingkha ina shaothathaira.”

¹⁷Ana chi hānghailaga makhāra̱kui chi apangwui eina horhaowa; kala apam chili Ramath-lehi hohaowa.

¹⁸Ali ra̱changlakhaida ana PROHOli ngakaoda hānga, “Nana mayāmida naraowui pāng eina kahaka kankhami ot sāhaira; kala ara ina ra̱kachang eina thida ahui marimkashokbingwui pāngli tazangrala?”

¹⁹Chieina Varena Lehili khalei angako akhawui eina tara̱ okshok ngasaka, kala ana chi mangkhui, kala ning ungrāsai kala pangshap samphangluishita. Chiwui vang apam chili En-hakkore hokahaina; arui eina tangda chi Lehili leida lei.

²⁰Kala Philistinenaobingwui atamli Samsonna Israelli kum maga munga.