Read Tangkhul Naga WUNGVA̱-WUNGVĀ 16 Bible Online

WUNGVA̱-WUNGVĀ 16 - Tangkhul Naga bible

WUNGVA̱-WUNGVĀ 16

¹Samsonna Gazali khavā eina, chili khayorva̱ sha̱nao akha leisāda ana ali ngasopiya.

²“Samson hili rāhaira” da Gazawui mibingli kahāng eina, athumna apam chi kuinamhailaga ngayā pongda keinung chiwui ngaveili arimpi. Kala athumna ngayā pongda kasaikha pamda, “Ithum ngathor kazing kathang eina tangda rimpamlaga ali sāthatnaosa” da ngazeka.

³Kha Samsonna ngayā sailung eina tangda pilaga sailungphup ngakarthuilaga ngaveiwui khāmongla, khāmongthingla, veiruithingla sutkhuilaga ayartuili ngava̱thuihaowa, kala Hebronwui mangāli khalei kaphungton chili ahormihaowa.

⁴Hiwui thili Sorek tampākli khalei Delilah kaho sha̱nao akhali ana leishi.

⁵Kala Philistinewui wungnaobingna ali rāhānga, “Kontrenda ali suikhuilu, kala awui pangshap kali lei, kala ithumna kachikathā apong eina ali yuikhuida khalapkhuira kaji ngahānkhuilu; chieina ithum kachiva̱na nali lupāsā thingkha shākharip mira.”

⁶Chieina Delilahna Samsonli, “Nawui pangshap kali leikhala, kala kathāda sakha mi akhana nali pheipāng khalapta yuikhuipairakhala, ili kahāngmilu” da ngahāna.

⁷Chieina Samsonna ali hānga, “Kalikha athumna ili malākhara̱, khanganao shini eina khalaphaiakha, iwui pangshap ngazanhaora, kala I icha-chama mi thāpapamhaora.”

⁸Chieina Philistinewui wungnaobingna malā khara̱ khanganao shini khuivāmi, kala ana chi eina ali khalaphaowa.

⁹Chitharan ana mibingli alungshongwui kā akhali yāmngathumpam ngasaka. Kala ana Samsonli hānga, “Samson, Philistinenao rāhaira!” Kha ana lengchenra̱ meina chuitā kahai thāda malākhara̱ chi shireishathaowa. Chithāda awui khangathuma pangshap kali lei kaji matheirarthuwa.

¹⁰Kala Delilahna Samsonli hānga, “Yanglu, nana ili ngashan sānganaohaira, kala kapikta hānghaira; kathāda nali khalapkhuipairakhala, ili kahāngmilu.”

¹¹Kala ana ali hānga, “Seipeng kadhar mashijinlakrang kaji eina khalapakha I ngazanhaora, kala I icha-chama mi thāpapamhaora.”

¹²Chieina Delilahna seipeng kadhar khuida ali chieina khalaphaowa, kala “Samson! Philistinenao rāhaira!” da ali hānglui. Mibingna alungshong kā khangateili rimpamsai. Kha ana seipeng chi kazaira̱nao sākashat thāda ngakhunshathaowa.

¹³Chieina Delilahna Samsonli hānga, “Arui eina tangda nana ili ngashan sānganaoda kapikta lei; nali kathāda khalapkachangrakhala, ili kahāngmilu.” Ana hānga, “Ikuisam peng shini shida shireitālaga chi rāli raknarhailaga marikasui sa̱shantithaiakha, I ngazanhaora, kala I icha-chama mi thāpapamhaora.”

¹⁴Chieina ana kapi atamli Delilahna sam kashirei peng chi rāli rakshantitmihaowa; kala marikasui eina sa̱shantithailaga, “Samson! Philistinenao rāhaira” da hānga. Kha ana ngakarthuilaga marikasui raknar kahai rā eina rā-thing shimenthuihaowa.

¹⁵Sha̱naopava̱na ali hānga, “Ili nawui ning maleila nana kathāda ‘Ili leishiya’ jipaira? Nana ili kathum shida ngashan sānganaohaira kala nawui pangshap kali leikhala kaji mahāngmimana.”

¹⁶Kala thangkachida saklak eina ngahānching kajiwui vang, ningkharakna thiki jihaowa.

¹⁷Chieina ana awui ningli mangathumlakla hānghaowa. “Ikuili kuisighai maparlakranga,” kaja “Ishava̱wui wuklungli leilakhawui eina ili Varewui vang Nazirite akha sāda phaishok kahaina. Ikui sithang iwui pangshap iwui eina thuihaora, kala I ngazanhaora, kala I icha-chama mi thāpapamhaora.”

¹⁸Awui ningli khalei saikora hānghaira da Delilahna kathei eina, Philistinewui wungnaobingli hokhuida hānga, “Akhashida rāluilu, ana ili awui khangathum saikora hānghaira.” Chieina wungnaobing china lupā athumwui pāngli khuirai.

¹⁹Ana Samsonli awui khaishāngli chipetlaga mi akha hokhuida, shini shida khalap kahai sam chi sitāmi ngasakhaowa. Chiwui thili ana singkharot nganaolala a pangshap maleiluithuwa,

²⁰kala ana “Samson! Philistinenao rāhaira” da kahāng eina ngakarthuirasai. Kala “Ngathānthangwui thāda ina yāmshokshapa” da hānga. Kha ali PROHOna mangasomiluimana kaji a matheisāthuwa.

²¹Chieina Philistinenaobingna tukkhuilaga amik latshokmithaowa, kala Gazali khuivālaga pithrai khānghui eina khalaphaowa; kala apam chili narhailaga mā shirei ngasaka.

²²Kha awui kuisam sitā kahai chi shokphokluihaowa.

²³Philistinewui wungnaobingna athumwui vare Dagonli haklak kahai pha̱kaphayā akha sāda ringpha ngarum khavai kazipa; kaja athumna hānga, “Ithumwui yangkashe Samsonli ithumwui varena ithumwui pāngli horsangmihaira.”

²⁴Kala ali mibingna kathei eina athumwui vareli sochikata; kaja athumna hānga, “Ithumwui yangkashe, ithumwui mi kachungkhali athut khuida shaokathat mi chili ithumwui varena ithumwui pāngli sangmihaira!”

²⁵Athumwui ning ringphāshap kaji eina, athumna hānga, “Samsonli hokhuilu, ithumli ana kumei sāchitheiranu.” Chieina athumna phātopwui eina akhuishoka kala ana athumwui mangāli kumei sai. Athumna ali pakra̱wui ngachaili nganing ngasaka,

²⁶kala apāngli thara̱da thānkazata mayara chili Samsona hānga, “Shimwui phungva̱ khani chi kachitheilu, chili kashaikhuiga” da hānga.

²⁷Chitharan shimlung chili sha̱nao mayarnao, kala Philistinewui wungnaobing pamsai, kala Samsonna kumei kasā chi khayang shimtungli sha̱nao mayarnao thing kathum sha̱kha pamsai.

²⁸Chieina Samsonna PROHOli ngakaoda hānga, “O PROHO Vare, ili kaphaningungmilu da ina seihā sali, akhashidamāng pangsang ngasakmilu da poli; O Vare, imik khanini latshokmi kahaiwui vang Philistinenaobingwuitungli athut khuimilu.”

²⁹Kala shim chiwui phungva̱ alungtho khani chili Samsonna awui pāng uishong eina akhali, yāshong eina akhali poklaga yāng eina tuka.

³⁰Kala Samsonna hānga, “Philistinenaobingli ngasoda I thihaoga.” Chiwui thili ana pamzangda awui yāng khuishokta nura; kala shim chi ja̱haida wungnaobing, kala mibing, saikorali minrorserhaowa. Chithāda awui mirinli ana sākathat saikorali chithangmāng sākathatna chungmeiya.

³¹Chiwui thili achināngarā, kala awui shimkhurwui mina akhuilaga, avāva̱ Manoahwui chikhur, Zorah eina Eshta-olli ungchifahaowa. Ana Israelli kum maga̱ mungsai.