Read Tangkhul Naga WUNGVA̱-WUNGVĀ 17 Bible Online

WUNGVA̱-WUNGVĀ 17 - Tangkhul Naga bible

WUNGVA̱-WUNGVĀ 17

¹Ephraim kaphungramli Micah hoda mi akha leisai.

²Kala ana ava̱va̱li hānga, “Nawui lupāsā thingkha shākha khuithui kahaiwui vang nana khonkashi, kala I khanāli hāngkasang chi, yanglu, lupāsā chi iwui pāngli lei, ina kakhuina.” Kala ava̱va̱na hānga, “Inaoli PROHOna somiranu.”

³Ana lupāsā thingkha shākha chi ava̱va̱li hanmi; kala ava̱va̱na hānga, “Inaomayarawui vang lupā chi ipāngwui eina PROHOwui mangāli tharchigat kahaina, rukkakhui mima kala langkakhui meoma̱ sākhui khavai ina nali miluira.”

⁴Chieina lupā chi ana ava̱va̱li hankhami eina, ava̱va̱na lupāsā shākhani chi khuilaga lupā kasaali mida rukkakhui kala langkakhui mima akha semmida Micahshi shimli haihai.

⁵Kala Micahna khorum khavai khorumshim akha leisai, ana ephod akha eina meoma̱ akha da sākhuilaga chi mayon khavai anaomayara akhali pāngmon sāngasaka.

⁶Atam chitharan Israelli awunga maleisā mada mi kachiva̱na kachichāwui mikyanli khamashung chi sāsai.

⁷Atam chitharan Judah shangwui eina Bethlehemwui mi akha Judahli leisai, a Levinaona, ana chili yaorai.

⁸Kala Judahwui Bethlehemwui eina kha̱ kateili asom khavai ana vai; ana zazatta Ephraim kaphungramli khalei Micahwui shimli vāshunga.

⁹Kala Micahna ali hānga, “Na kachiwui eina kharākhala?” Ana ngahānkai, “Judahwui Bethlehemli kapama Levinaona, kala ina ram zatmamānda shimpam phākazatna.”

¹⁰Chieina Micahna ali hānga, “Ili ngasopamlu, kala iwui avāva̱ kala pāngmon thada pammilu; kala kumkumli ina lupāsā tharārā mira, kashankachon, kashakazā mira.”

¹¹Chieina Levipa china ali ngasopam khavai mayāhaowa, kala awui naomayara thāda ngasopama.

¹²Kala Micahna Levipa chili chipamda ana pāngmonpam chi mi, kala awui shimli pamruma.

¹³Chiwui thili Micahna hānga, “Ara PROHOna ili reisang ngasakhaora da thei; kaja ina Levinao akhali pāngmon sanghaira.”