Read Tangkhul Naga WUNGVA̱-WUNGVĀ 19 Bible Online

WUNGVA̱-WUNGVĀ 19 - Tangkhul Naga bible

WUNGVA̱-WUNGVĀ 19

¹Atam chitharan, Israelli awunga mangavāranglakha, Levinao akhana Ephraim kaphungramwui apam katā akhali vāpāna. Ana Judahli khalei Bethlehemwui sha̱nao akha angashirva̱ sākhavai khui.

²Kala angashirva̱ china ali malungvāthaida, ana avāva̱wui shim Judah ramwui Bethlehemli yāmungda kachāng mati apama.

³Khaleilaga gahara china ali shurungda ali hanung khavai rao akha kala gadhā khani da thānphungda avāva̱wui shimli vai, kala a kharā chi theilaga ngalāva̱wui avāva̱na mathānthup eina samphanga.

⁴Kala awova̱, apreiva̱wui avāva̱na, pamsanghaolu jihaoda, ana chili phāshak phazāngarumda kathumthang apisanga.

⁵Kala khamatethang ana ngathorthak zatkhavai sai; kha awova̱na, “Phazākhuilaga zatnaolu” da arihāli hānga.

⁶Chithāda ani phazālaga ngalāva̱wui avāva̱na hānga, “Aja ngayā ringphālak eina ngasāmkhuilu.”

⁷Ana zatkhavai ngakarkathui eina awova̱na panglāk eina hānghaida pamsanghaowa.

⁸Kala ana kaphangāthang ngathorthak zatkhavai salui; kha sha̱naopashi avāva̱na, “Phazālaga zatnaolu” da hānga. Chieina athum zimik khamakhei eina tangda ngasāmkhui, kala ani phāshak phazai.

⁹Chieina angashirva, kala awui rao athum zatukida kasā eina, awova̱, ngalāva̱shi avāva̱na hānga, “Yanglu, ara kazing yinguki jihaira hili pisanghaolu. Zimik tāmamānda ngazinhaira, leishiri eina ngasāmkhuilu akhama ngathorthāk nathum zatta shim ungnaolu.”

¹⁰Kha mipa china mapisangmara jihaoda zathaowa, kala Jebusli (chiya Jerusalem) kāroda khalei pam chili vāshunghaowa. Awui gadhā khani kala awui angashirva̱ zangda ali ngasozatsai.

¹¹Athumna Jebus ungshungnanai zimik tunki jihairasai, awui rao china, “Ithum Jebus keinung hili zangda arui ngayā chili pisanghaosa” da hānga.

¹²Kha awui akhavāna ali, “Israelnao makhaning, yur kateiwui keinungli mapisangmara, Gibe-ahli apiusa” jihaowa.

¹³Kala awui raoli hānga, “Ralu, Gibe-ahli maningakha Ramahli vameida akhali apisa.”

¹⁴Chieina athumna zatta Gibe-ahli Benjaminwui lam vākashung eina zimik tunhaowa,

¹⁵kala athumna Gibe-ahli vāshungda ngayā chili api khavai zanga. Chili zangda keinung chiwui kayāng khamashāli apama; kha athumli khipānakha shimzun sākhavai mahokhuithuwa.

¹⁶Kala yanglu, ngazinshong kasarnao akha lui vālaga ungrāsai; a Benjaminshiwui mi, Ephraim kaphungramwui eina Gibe-ahli rakapāna mina.

¹⁷Kala ana yangkhavā eina kha̱mibing chi keinungwui kayāngli pamkasa theida hānga, “Nathum kali vāki kaji? Kala kachiwui eina kharākhala?”

¹⁸Chieina ana mipa chili ngahānkai, “Ithum Judahli khalei Bethlehemwui eina Ephraim kaphung katāva̱li khalei iramli ungushida kazatna. Ina Judahli khalei Bethlehemli vālaga shimli ungusi kajina, kha khipānakha ili shimzun mamithuwa.

¹⁹Ithumna gadhāwui zātla khuiphungda lei; I kala ipreiva̱ngarā kala ili khangayur raonaobingwui vang kashakazā kala drakhāra̱, mavātlakla khuiphungserda lei.”

²⁰Chieina kasara china hānga, “Chingrihairanu; nathumwui khavavāt ina ngarānmira, kayangchangli mapialu.”

²¹Chithāda ana awui shimli thanunglaga gadhā zātla khuimi, athumli phei pheongasakta phāshak phazā ngasaka.

²²Kala athumna tho-uda ringphāshap kaji eina, yanglu, keinung chiwui shuikhangarui mibingna ashi shim rākuinamlaga rākathanga; kala shimva̱ kasara chili hānga, “Nashi shimli kharāpa khuishoklu, ithum ali phasa ngarumra.”

²³Kala shimva̱ china shoklaga hānga, “Ivānaongarā, chikathā khayākhamalā ot masāmialu, a hi iwui shimzunna, hiyākha zakkashi ot masāmilu.

²⁴Yanglu, awui angashirva̱ eina inao ngalāva̱ leili, anili chihoshoka, nathumwui sakapai sālu, kha mipa hili makhangatun ot masāpaimara.”

²⁵Kha mibing china ali manganāsangmithuwa. Chieina awui angashirva̱li shimenshokmihaowa, ngayā langpongda athumna preiva̱ chili makhangatun ot sāda zingthanlam chihohaowa.

²⁶Preiva̱ china zingthanlam shimva̱wui khāmongpheili ungsaosanghaowa, kala kazing kahor eina tangda chithāda leisai.

²⁷Kala agaharana ngathor zatukida khāmong thuikasho eina angashirva̱ chi khāmongthingli poktitlaga leisai.

²⁸Ana, “Thuilu, zatusa” da hānglala mangahānkālakthuwa. Chieina agaharana gadhā tungli khangkālaga aramli khuiunghaowa.

²⁹Kala ana shimli ungkashung eina ghainao akha khuilaga angashirva̱wui asā chi aphei apāng ngalaklaga khum tharāda khani sākhui, kala asā chi Israelwui leiret kachiva̱li yaovā ngasaka.

³⁰Chi kathei mi saikorana, “Egyptwui eina shoklaga aja rāshungda Israelwui mibingli hikathā ot mashoklakranga, katheila matheilakmana; hiwui pongli phaninglaga machuklu” da hānga.