Read Tangkhul Naga WUNGVA̱-WUNGVĀ 2 Bible Online

WUNGVA̱-WUNGVĀ 2 - Tangkhul Naga bible

WUNGVA̱-WUNGVĀ 2

¹PROHOwui kazingraona Gilgalwui eina Bochimli shanga. Kala ana hānga, “Ina nathumli Egyptwui eina thānshokmi, kala ina navāngarāli ngashit kahai lam hili nathumli thanungmihaira. Ina hānga, ‘Nathumli ngashit kahai chi ina makailakmara;

² kala nathum hiwui mibingli tuingashit masāpailakmana, nathumna athumwui hanphutbing shaokhaiphalungra.’ Kha nathumna iwui kahāng manganāmana. Nathum hi khi kasākhala?

³Chiwui vang eina ina arui kahāng hina, ina athumli nathumwui mangāli makashamshokmara; kha athum nathumwui yangkashe ngasāra, kala athumwui varebingna nathumwui vang khalen ngasāra.”

⁴PROHOwui kazingrao china tui saikora hi kahāng shālaga Israelwui mibingna vaoda chapngachai.

⁵Kala apam chi athumna Bochim da phokmi, kala apam chili athumna PROHOli pha̱phayai.

⁶ Joshuana mibingli chiho kahai eina, Israelwui mibingna kachichāwui shimlui khuikhavai unghaowa.

⁷Kala mibingna Joshuawui thotli kala ali okpeikhamei khararnaobing, Israelwui vang PROHOna kahaka ot sāmi kahai saikora katheiya athum ringlakha eina tangda athumna PROHOli otram ngatha̱sai.

⁸Kala Nunwui naomayara PROHOwui rao Joshua kum shākha tharā okthuilaga thihaowa.

⁹ Kala athumna ali awui luiyar Gaash kaphungwui zingtun Ephraimwui kaphungram, Timnath-heres chili chifahaowa.

¹⁰Kala chiwui mithot saikora chila awova̱ ngarāwuili vāserhaowa; kala athumwui thili PROHOli makathei kala ana Israelwui vang sāmi kahai otsak makathei khangatei thot akha shoka.

¹¹Kala Israelwui mibingna Baalli khorumda PROHOwui mangāli makhayā otmāng sai.

¹²Athumna PROHO, avāva̱ ngarāwui Vare, Egypt ngaleiwui eina thānshokkhame chili horhaowa; athumna khangatei varebing, athumli kuimareida khalei yurbingna khokharumli shurthuihaoda, athumna PROHOli malungvātngasaka.

¹³Athumna PROHOli horhaowa, kala Baal eina Ashtarothli otram ngatha̱ya.

¹⁴Chiwui vang PROHOwui malungkhavāt Israelwuitungli rāhaowa, kala ana athumli kuimareida kapambing athumwui yangkashebingwui pāngli horsangmihaowa, chithāda sāda athum yangkashibingli mangasungrarthuwa.

¹⁵Prohona hāngmathin kahai kala ngashit kahai thada athumwui raivāt kachida PROHOwui pāngna athumli ngasunghaowa, chiwui vang athum chotlakhaowa.

¹⁶Chiwui thili athumli sākakathānabingwui pangshapwui eina kankhui khavai PROHOna wungva̱-wungvā shokngasaka.

¹⁷Thalala athumna athumwui wungva̱-wungvāwui tui makhuimana; kaja athumna vare khangateibingli shurda khayorawui otsak sāzata kala athumli khoruma, kala avāva̱ ngarāna kazata apongli mazatla, PROHOwui ningkhami manganāla kala mashurla thaklāk eina mai ngareithuihaowa.

¹⁸PROHOna wungva̱-wungvā kapangkasang tharan PROHOna athumli ngasomi, kala wungva̱-wungvā leilakha eina tangda ana mibingli yangkashibingwui eina kanmi; kaja athumli chotta khanang khangasakwui vang ringkhangā chi shālaga PROHOna athumli lumashanmi.

¹⁹Kha wungva̱-wungvābing thikahai tharan, athumna mai ngareithuihaida athumwui avāva̱ ngarābingli zakshimeida sai; katei varebingli ngareithuihaida khokharumla khoruma, kala athumwui makaphā otsak, lah ngakaishitingting kahaila mahorhailakmana.

²⁰Chiwui vang PROHOwui malungkhavāt Israelwuitungli tāhaowa; kala PROHOna hānga, “Khikhalajila mibing hina avāva̱ ngarāli ina tuingashit sāda kaso kahai chi athumna ngakaishi, kala athumna iwui kahāng makhanganāwui vang,

²¹Joshuana kathi tharan ana taikahai kachikathā yur akha eina tangda ina athumwui mangāli makashamshokmimara,

²²kaja avāva̱ ngarāna kasā thāda athumna sanikā masānikhala da Israelli ina chāng yangkhavai kasāna.”

²³Chiwui vang PROHOna yurbing chili makasham kajina, kala athumli Joshuawui pāngli mahorsangkhamina.