Read Tangkhul Naga WUNGVA̱-WUNGVĀ 21 Bible Online

WUNGVA̱-WUNGVĀ 21 - Tangkhul Naga bible

WUNGVA̱-WUNGVĀ 21

¹Chitharan Israelwui mibingna Mizpahli leilakha, “Benjaminli ithum khipākhawui naongalāva̱ mafachithotpaimara” da khangashit akha sai.

²Kala mibingna Bethelli vāda, ngazin vāshungda Varewui mangāli ngavaoda chapsasui akhoruma.

³Kala athumna hānga, “O PROHO, Israelwui Vare, Israelwui alungli aja Israel shang akha vātkahai hi kathāda shok khangasakkhala?”

⁴Kala athumna akhama kathā ngathorthak thuilaga hanphut akha sākhuida rikkatā kachigat kala ningyatchigat chigata.

⁵Kala Israelwui mibingna hānga, “Israel shang saikorawui ngachaili khipā PROHOwui kakazip hili marāzangmakhala?” Kaja athumna Mizpahli leilakha kasaka khangashit sālaga PROHOwui mangāli khipa marāma, “Makharā mi chi thiphalungra” da hānga.

⁶Kala Israel mibingna achinā Benjaminli lumashanlakhaowa, kala, “Shang akha aja Israelwui eina katatshokhaira, da hānga.

⁷Ashiwui taihaida khalei mibingli, athumwui preiva̱̱ samphang khavai khisausi? Kaja ithumwui naongalāva̱ ngarā athumli mafachithotpaimara da ithum PROHO ming singda ngashithaira.”

⁸Kala athumna hānga, Mizpahli PROHOwui kazip chili makharā Israelwui shang chi khipāshikhala? da ngahāna, kala yanglu, Jebesh-gileadwui eina mi akhala marāmana.

⁹Kaja mi kazipkakhui chitharan, yanglu, Jabesh-gileadwui mi akhala mazangsāthuwa.

¹⁰Chieina yarui ashangva̱na, athumwui ngachaili pingmeikap kaje mi thingtharāda khanili kasoda, “Vālu, chili khalei Jabesh-gileadwui mi saikora, prei-naosan zangda sāthatserhaolu.

¹¹Hithāki kajina kaja mayarnao katonga, kala mayarnaoli ngaso kahaiya sha̱nao katonga nathumna sāthatphalungra.”

¹²Kala athumna Jabesh-gileadli khalei saikorawui alungli mayarnaoli mangasolakrang kaje kachingva̱ shāmati samphanga; kala athumna Canaanwui ngaleili khalei Shilohli athumli khuiunga.

¹³Chiwui thili yarui ashangva̱na Rimmonwui lunghārkhurli yāmngathumkapama Benjaminnaobingli rai masāluimara da pao chihovai.

¹⁴Kala Benjaminnaobingna atam chili latunga; kala athumna Jabesh-gileadwui ngalānao khuiung kahai chi athumli mihaowa; kha chila athumwui vang mapeithuwa.

¹⁵Kala mibingna Benjaminwui shangli lumashanhaowa, kaja PROHOna Israel ngachaili kakai leingasakhaowa.

¹⁶Chiwui thili yarui ashangva̱wui khararnaobing china hānga, “Benjaminwui taihaida khalei mibingli athum preiva̱ samphang khavai ithum khi sāusikhala? Kaja Benjaminwui sha̱naobing sāthatserhaira.

¹⁷Kala athumna hānga, Israelwui eina Benjamin kaho shangnao hi mashimānchao khavai, athum kharing mibingli shimluikat leingasakra.

¹⁸Chithālala ithumwui naongalāva̱bingli mafavā ngasakpaimara. Kaja, Benjaminli preiva̱ khami mi chi khonkashi ngasaranu” da athumna ngashithairasai.

¹⁹Chiwui vang athumna hānga, “Yanglu, Bethelwui atungshong, Bethelwui eina Shechemli vākhavai chanreiwui zingshoshong, kala Lebanonwui azingshong, Shiloh kaho chili PROHOwui phanit kum kachida sāchinga.”

²⁰Kala athumna Benjaminnaobingli kasoda hānga, “Drakhā yāmgui chili vāda arimpamsālu,

²¹kala Shilohwui ngalānaobing pheichak kasāli shokzangakha mi kachiva̱na ngalānao akharip shoktukkhuilu, kala preiva̱̱ sāda naram Benjaminli unghaolu da kasoi.

²²Kala avāva̱ ngarā, lah apā ngarāna mamayāmada rāhāngakha, ithumna ‘Lumashanda athumli ngachon khavai ithumli mayāmihaolu; khikhalajila athum preiva̱ sākhavai rai ngararlaga preiva̱ khuikhami maningmana, nathumna kakhuila makhuimirarmana; nathumwui khayon maningmana’” da hānghaora.

²³Chiwui mashing athishurda Benjaminnaobingna chithāda sai, kala pheichak kasā sha̱naobingwui eina preiva̱ sākhavai akharip tukkhui; kala chiwui thili kachichashiwui apamli unglaga keinung ungsakāda pamhaowa.

²⁴Kala Israelwui mibingla apam chiwui eina ngapakhaida kachichāshi shang, kala kachichā ramli ungserhaowa.

²⁵Atam chitharan Israelli awunga maleisāmana; kachichāwui mashun ning athishurda pansai.